ບໍລິສັດ Energy Absolute Public Company Limited ຈາກປະເທດໄທ (EA) EA ຜູ້ຮ່ວມກໍ່ຕັ້ງ Super Holding Company ກັບ ສປປ ລາວ ເພື່ອຄຸ້ມຄອງທຸລະກິດພະລັງງານສະອາດໃນລາວ ຖືກຖອດອອກຈາກ SET ESG Ratings ຫຼື ລາຍຊື່ຮຸ້ນຍືນຍົງຂອງຕະຫຼາຍຮຸ້ນໄທ ຫຼັງຜູ້ບໍລິຫານ ຖືກກ່າວໂທດ ວ່າມີການສໍ້ໂກງໃນບໍລິສັດ.
ອີງຕາມການຂອງຫ້ອງການຄະນະກໍາມະການກຳກັບຫຼັກຊັບ ແລະ ຕະຫຼາດຫຼັກຊັບ ແຫ່ງປະເທດໄທ (ກລຕ) ໄດ້ກ່າວຫາ ທ່ານ ສົມໂພດ ອາຫຸໄນ ແລະ ທ່ານ ອາມອນ ຊັບທະວີກຸນ, ຜູ້ອໍານວຍການ ແລະ ຜູ້ບໍລິຫານຂອງບໍລິສັດ Energy Absolute Public Company Limited (EA), ລວມທັງ ທ່ານ ໄພເລີດ ເຕຊະລັດຕະໂນ ໃນກໍລະນີຂອງການເຂົ້າຮ່ວມການສໍ້ລາດບັງຫຼວງເພື່ອໃຫ້ໄດ້ຮັບຜົນປະໂຫຍດທີ່ບໍ່ເໝາະສົມ, ລວມທັງຕົນເອງ ແລະ ຜູ້ອື່ນ.
ພາຍຫຼັງເຫດການດັ່ງກ່າວ ຕະຫຼາດຫຼັກຊັບ ຄະນະເຮັດວຽກການລົງທຶນແບບຍືນຍົງໄດ້ມີມະຕິຖອນ EA ອອກຈາກບັນຊີລາຍຊື່ຮຸ້ນທີ່ຍືນຍົງ SET ESG Ratings ເພາະວ່າບໍລິສັດ ຂາດຄຸນສົມບັດຕາມມາດຕະຖານ SET ESG Ratings ທີ່ກຳນົດໄວ້ “ຕ້ອງບໍ່ແມ່ນບໍລິສັດທີ່ຖືກເຈົ້າໜ້າທີ່ ຫຼືອົງການທີ່ກ່ຽວຂ້ອງຖືກກ່າວຫາ ຫຼື ຖືກຕັດສິນລົງໂທດ ຫຼື ຜູ້ອໍານວຍການ ຫຼື ຜູ້ບໍລິຫານໄດ້ຖືກກ່າວຫາ ຫຼື ຖືກຕັດສິນລົງໂທດໃນການກະທໍາຜິດໂດຍເຈົ້າໜ້າທີ່ຫຼືອົງການທີ່ກ່ຽວຂ້ອງກັບເລື່ອງການປົກຄອງຂອງບໍລິສັດ ທີ່ສ້າງຜົນກະທົບທາງດ້ານສັງຄົມ ຫຼື ສິ່ງແວດລ້ອມ.”
ໂດຍ ກລຕ ໄດ້ກ່າວຫາບຸກຄົນທັງ 3 ທີ່ກະທຳຜິດໃນໄລຍະປີ 2013-15 ໂດຍຮ່ວມກັນສໍ້ໂກງ ດ້ວຍວິທີ ຈັດຊື້ອຸປະກອນ ຈາກຕ່າງປະເທດ ແລະ ຈັດຊື້ໂປຣແກຣມຊອບແວ ເພື່ອໃຊ້ໃນໂຄງການກໍ່ສ້າງພະລັງງານແສງອາທິດ ຜ່ານບໍລິສັດຍ່ອຍຂອງ EA ສອງບໍລິສັດ ໄດ້ແກ່ ບໍລິສັດ EA Solar ນະຄອນສະຫວັນ ຈຳກັດ ແລະ ບໍລິສັດ EA Solar ລໍາປາງ ຈຳກັດ. ໂດຍຂະໜາດຂອງການສໍ້ໂກງຄັ້ງນີ້ ທັງ 3 ຄົນ ໄດ້ຮັບຜົນປະໂຫຍດລວມກວ່າ 3,465 ລ້ານບາດ.
ແຕ່ຢ່າງໃດກໍຕາມ, ພາຍຫຼັງເຫດການດັ່ງກ່າວ ທ່ານ ສົມໂພດ ອາຫຸໄນ ປະທານເຈົ້າໜ້າທີ່ບໍລິຫານຂອງ ບໍລິສັດ ໄດ້ອອກມາປະຕິເສດວ່າບໍໄດ້ມີການສໍ້ໂກງຕາມທີ່ ກລຕ ກ່າວຫາ ພ້ອມລາອອກຈາກ ຕຳແໜ່ງ ເພື່ອສະແດງຄວາມໂປ່ງໃສ.
ປັດຈຸບັນ EA ໄດ້ແຕ່ງຕັ້ງ ຄະນະກຳມະການ ແລະ ຜູ້ບໍລິຫານຊຸດໃໝ່ ຈຳນວນ 4 ທ່ານ ໄດ້ແກ່: ທ່ານ ສົມໃຈນຶກ ເອງຕະກູນ ຂຶ້ນເປັນຮັກສາການປະທານເຈົ້າໜ້າທີ່ບໍລິຫານ, ທ່ານ ຊັດຊະວານ ຈີລະວະນົນ, ທ່ານ ວະສຸ ກົມກ້ຽງ ແລະ ທ່ານ ຊັດພົມ ສີປະທຸມ ຂຶ້ນເປັນກຳມະການບໍລິສັດ.
ເຫດການດັ່ງກ່າວ ຖື ເປັນເຫດການໃຫຍ່ໃນວົງການຮຸ້ນ ແລະ ທຸລະກິດໄທ ເປັນທີ່ໜ້າກັງວົນວ່າ ຈະສ້າງຜົນກະທົບຫຍັງແດ່ຕໍ່ກັບຊື່ສຽງຂອງບໍລິສັດ ທີ່ຕອນນີ້ກຳລັງອອກຮຸ້ນກູ້ ເພື່ອລະດົມທຶນຄັ້ງໃຫຍ່ ນອກຈາກນີ້ກໍຍັງມີຄວາມກັງວົນໂຄງການໃຫຍ່ໆ ຢ່າງ ລົດເມໄຟຟ້າ, ແບັດເຕຣີລົດໄຟຟ້າ ລວມໄປເຖິງ ບໍລິສັດ Super Holding Company ທີ່ຮ່ວມກັບ ສປປ ລາວ ໃນຂະນະທີ່ ທ່ານ ສົມໂພດ ອາຫຸໄນ ຈະພົບກັບສິ່ງທ້າທາຍຫຍັງຫຼືບໍ່.
ໂດຍໃນຕົ້ນເດືອນ ພຶດສະພາ ທີ່ຜ່ານມາ ລັດຖະບານ ແຫ່ງ ສປປ ລາວ ຕາງໜ້າໂດຍກະຊວງການເງິນ ບໍລິສັດ Energy Absolute Public Company Limited ຈາກປະເທດໄທ (EA) ໄດ້ຮ່ວມມືສ້າງຕັ້ງບໍລິສັດຮ່ວມທຶນຊື່ວ່າ Super Holding Company ເພື່ອຄຸ້ມຄອງທຸລະກິດພະລັງງານສະອາດເກີນ 7GW ກ້າວໄປເຖິງເປົ້າໝາຍທີ່ລາວຈະກາຍເປັນ “ໝໍ້ໄຟແຫ່ງອາຊີ” ແລະ ເປັນເຄື່ອງຈັກທາງເສດຖະກິດອັນໃໝ່ໃຫ້ກັບ ສປປ ລາວ.
ທີ່ມາ:
https://www.facebook.com/photo.php?fbid=1016761816487490&set=pb.100044610421582.-2207520000&type=3
https://www.facebook.com/share/p/PJ31L7KtLxMQ6qNc
https://www.facebook.com/share/p/TH1rj9F8DbDEnRX5
ຕິດຕາມຂ່າວທັງໝົດຈາກ LaoX: https://laox.la/all-posts/
