ບໍ່ວ່າຈະເປັນໄວເຮັດວຽກ, ນັກຮຽນ, ນັກສຶກສາ, ທຸກຄົນຍ່ອມຕ້ອງປະສົບກັບຄວາມກົດດັນ, ຄວາມເມື່ອຍລ້າ, ຄວາມວິຕົກກັງວົນ ຫຼື ບັນຫາຕ່າງໆທີ່ຢູ່ພາຍໃນ ເຊິ່ງວ່າປາສະຈາກບໍ່ໄດ້ຢູ່ແລ້ວ. ເຖິງແມ່ນວ່າພາຍນອກທ່ານພະຍາຍາມສະແດງໃຫ້ທຸກຄົນເຫັນວ່າ” ບໍ່ມີຫຍັງ, ບໍ່ເປັນຫຍັງ, ຂ້ອຍເຮັດໄດ້ ຍັງດໍາລົງຊີວິດປົກກະຕິ ແລະ ເບິ່ງຄືວ່າມີຄວາມສຸກ” ແຕ່ພາຍໃຕ້ໃບໜ້າທີ່ຍິ້ມແຍ້ມແຈ່ມໃສ ໃນຄວາມເປັນຈິງແລ້ວ ແມ່ນບໍ່ສາມາດຮັບມັນໄວ້ໄດ້ແລ້ວ.
ເມື່ອປຽບທຽບພາວະດັ່ງກ່າວໃສ່ກັບເປັດທີ່ຢູ່ໃນນໍ້າ ພາຍນອກເບິ່ງຄືສະໜຸກສະບາຍ, ລອຍຕົວຊ້າໆຢູ່ເທິງໜ້ານ້ຳ, ເບິ່ງແລ້ວສະຫງົບງຽບ, ບໍ່ໄດ້ມີຫຍັງພົວພັນກັບໃຜ. ແຕ່ຖ້າເບິ່ງເລິກກວ່ານັ້ນ ແທ້ຈິງແລ້ວຕີນຂອງເປັດ ແມ່ນເຄື່ອນໄຫວຢ່າງຕໍ່ເນື່ອງເພື່ອຮັກສາການຊົງຕົວ ຫຼື ເພື່ອການຢູ່ລອດຂອງຕົວເອງບໍ່ໃຫ້ຈົມນໍ້າ. ສະນັ້ນ, ມະຫາວິທະຍາໄລສະແຕນຟອດ (Stanford University) ຈຶ່ງນິຍາມພາວະນີ້ວ່າ “Duck Syndrome” ຫຼືສະຖານະຂອງຄວາມເມື່ອຍລ້າຈາກບັນຫາຕ່າງໆ.
ວິທີການຈັດການກັບ Duck Syndrome
1. ບໍ່ມີຫຍັງຄົງຢູ່ຕະຫຼອດໄປ
ບໍ່ມີຫຍັງໄດ້ມາງ່າຍໆ ທຸກໆຄົນທີ່ປະສົບຜົນສໍາເລັດລ້ວນແຕ່ຕ້ອງປະເຊີນກັບຄວາມກົດດັນ, ຄວາມເມື່ອຍລ້າ, ສິ່ງທ້າທາຍຕ່າງໆທີ່ມາເຂົ້າ. ເຖິງແນວໃດກໍຕາມ, ຢ່າເອົາໃຈໃສ່ ຫຼື ສົນໃຈຄົນອື່ນຫຼາຍເກີນໄປຈົນສົ່ງຜົນໃຫ້ໜັກກາຍ ແລະ ສະພາບຈິດໃຈຕົນເອງ.
2. ປະເຊີນກັບສິ່ງທ້າທາຍ
ເຮົາບໍ່ສາມາດຮູ້ໄດ້ເລີຍວ່າຈະປະເຊີນກັບຫຍັງແດ່ໃນອະນາຄົດ. ວິທີທີ່ດີທີ່ສຸດ ແມ່ນເຈົ້າຕ້ອງກຽມພ້ອມຮັບມືກັບສິ່ງທີ່ຈະມາເຖິງ, ຢ່າຢ້ານບັນຫາທີ່ກຳລັງຈະເກີດຂຶ້ນ, ມີຄວາມໝັ້ນໃຈໃນຕົວທ່ານເອງ ແລະ ຄວ້າເອົາທຸກໆໂອກາດທີ່ເຂົ້າມາ, ທຸກຢ່າງລ້ວນແຕ່ເປັນບົດຮຽນ ແລະ ປະສົບການທີ່ດີແກ່ຕົວທ່ານເອງ. ສຸດທ້າຍແລ້ວ, ທຸກຢ່າງກໍຈະຜ່ານໄປຄືດັ່ງທີ່ທ່ານເຄີຍຜ່ານມາ.
3. ປຶກສາກັບຄົນທີ່ໄວ້ໃຈ
ຖ້າຮູ້ສຶກວ່າຕົນເອງບໍ່ສາມາດຮັບມືກັບມັນອີກຕໍ່ໄປ ກໍບໍ່ຈຳເປັນຕ້ອງກົດດັນຕົນເອງຫຼາຍ. ຫາກເຈົ້າເມື່ອຍກໍພັກຜ່ອນ, ຂໍຄຳປຶກສາກັບຄົນອ້ອມຂ້າງ ຫຼື ຄົນທີ່ເຮົາໄວ້ວາງໃຈ ເພາະບາງເທື່ອພວກເຂົາເຄີຍປະສົບກັບເລື່ອງແບບນີ້ມາກ່ອນເຊັ່ນກັນ ແລະ ເຈົ້າອາດຈະໄດ້ຮັບທັດສະນະໃໝ່ໆ ຫຼື ມຸມມອງດ້ານບວກ ເຊິ່ງແນ່ນອນ ນັ້ນຈະສົ່ງຜົນເຮັດໃຫ້ເຈົ້າເຫັນໂລກໄດ້ກວ້າງຂຶ້ນ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
