ນະຄອນຫຼວງວຽງຈັນ ວາງແຜນອອກກົດລະບຽບການຈອດລົດໃຫ້ເຂັ້ມງວດຂຶ້ນ ເພື່ອແກ້ໄຂບັນຫາລົດຕິດ
ຮ່າງຂໍ້ກຳນົດດັ່ງກ່າວແນໃສ່ການຈອດລົດຜິດລະບຽບ, ການເກັບຄ່າບໍລິການໂດຍບໍ່ໄດ້ຮັບອະນຸຍາດ ແລະ ການນຳໃຊ້ພື້ນທີ່ສາທາລະນະໃນທາງທີ່ຜິດ, ພ້ອມທັງສົ່ງເສີມການບໍລິການຈອດລົດທີ່ປອດໄພ ແລະ ສະດວກສະບາຍກວ່າເກົ່າ.
ນະຄອນຫຼວງວຽງຈັນ ກຳລັງສະເໜີກົດລະບຽບການຈອດລົດທີ່ເຂັ້ມງວດກວ່າເກົ່າ ເພື່ອປ້ອງກັນບໍ່ໃຫ້ຜູ້ຂັບຂີ່ຈອດລົດກີດຂວາງເສັ້ນທາງ, ຄວບຄຸມຄ່າຈອດລົດ ແລະ ຫຼຸດຜ່ອນບັນຫາການສັນຈອນແອອັດໃນທົ່ວນະຄອນຫຼວງ.
ຂໍ້ກຳນົດທີ່ສະເໜີມານັ້ນ ຈະຫ້າມການຈອດລົດຊ້ອນຄັນ, ການຈອດລົດລັດທາງເຂົ້າ-ອອກ, ແລະ ການນຳເອົາສິ່ງຂອງມາຈອງບ່ອນຈອດລົດສາທາລະນະ. ຜູ້ໃຫ້ບໍລິການຈອດລົດກໍຈະປະເຊີນກັບການຄວບຄຸມທີ່ເຂັ້ມງວດຂຶ້ນ ກ່ຽວກັບວິທີການເກັບຄ່າບໍລິການ ແລະ ການຄຸ້ມຄອງສະຖານທີ່ຈອດລົດຂອງຕົນ.
ມາດຕະການດັ່ງກ່າວມີຈຸດປະສົງເພື່ອແກ້ໄຂບັນຫາທີ່ຄຸ້ນເຄີຍສຳລັບຜູ້ຂັບຂີ່ໃນນະຄອນຫຼວງວຽງຈັນ, ເຊິ່ງມັກຈະມີລົດຈອດຕາມຖະໜົນທີ່ຫຍຸ້ງຍາກ, ຢູ່ໜ້າຮ້ານຄ້າ ແລະ ໃກ້ກັບທາງເຂົ້າອາຄານ ເຊິ່ງກີດຂວາງການສັນຈອນ ແລະ ເຮັດໃຫ້ຜູ້ຂັບຂີ່ຄົນອື່ນໆ ພ້ອມທັງຄົນຍ່າງຕາມທາງຍ່າງໄປມາໄດ້ຍາກ ແລະ ບໍ່ປອດໄພ.ໜັງສືພີມວຽງຈັນໃໝ່ລາຍງານ
ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ, ທ່ານ ບຸນຍາວັດ ນີຣະໄຊຍ໌, ໄດ້ລາຍງານກ່ຽວກັບຮ່າງກົດລະບຽບທີ່ສະເໜີດັ່ງກ່າວ ໃນກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນ ຊຸດທີ V ເມື່ອວັນທີ 12 ພະຈິກ.
ທ່ານ ບຸນຍາວັດ ກ່າວວ່າ ຮ່າງຂໍ້ຕົກລົງນີ້ຈະສ້າງກົດລະບຽບທີ່ຊັດເຈນຂຶ້ນ ສຳລັບການຄຸ້ມຄອງ ແລະ ພັດທະນາສະຖານທີ່ຈອດລົດ, ໂດຍມີຈຸດປະສົງເພື່ອປັບປຸງການສັນຈອນ, ຄວາມປອດໄພເທິງທ້ອງຖະໜົນ ແລະ ຄຸນນະພາບຂອງການບໍລິການຈອດລົດ.
ພາຍໃຕ້ຂໍ້ສະເໜີນີ້, ສະຖານທີ່ຈອດລົດຈະຖືກແບ່ງອອກເປັນ ເຂດຖາວອນ ແລະ ເຂດຊົ່ວຄາວ. ແຕ່ລະເຂດຈະຕ້ອງມີການກຳນົດຂອບເຂດທີ່ຊັດເຈນ, ມີຊ່ອງຈອດລົດ, ມີປ້າຍຈະລາຈອນ ແລະ ປ້າຍບອກທາງເພື່ອແນະນຳຜູ້ຂັບຂີ່.
ຮ່າງດັ່ງກ່າວຍັງຊຸກຍູ້ໃຫ້ຜູ້ໃຫ້ບໍລິການຈອດລົດ ນຳໃຊ້ເຕັກໂນໂລຊີເຂົ້າໃນການຕິດຕາມລົດເຂົ້າ-ອອກສະຖານທີ່ຈອດ, ບັນທຶກຂໍ້ມູນການຈອດລົດ ແລະ ຄິດໄລ່ຄ່າບໍລິການ.
ມາດຕະການເຫຼົ່ານີ້ມີຈຸດປະສົງເພື່ອປັບປຸງຄວາມໂປ່ງໃສ, ເຮັດໃຫ້ການຊຳລະເງິນສາມາດຕິດຕາມໄດ້ງ່າຍຂຶ້ນ ແລະ ຮັດກຸມການຕິດຕາມກວດກາການບໍລິການຈອດລົດ.
ຂໍ້ກຳນົດທີ່ສຳຄັນອັນໜຶ່ງແມ່ນກ່ຽວກັບການເກັບຄ່າຈອດລົດ. ຜູ້ໃຫ້ບໍລິການຈະຖືກຫ້າມບໍ່ໃຫ້ເກັບເງິນເກີນອັດຕາທີ່ລັດຮັບຮອງ ຫຼື ເກັບເງິນໂດຍບໍ່ອອກປີ້ຈອດລົດ.
ຜູ້ຂັບຂີ່ຈະມີສິດໄດ້ຮັບຮູ້ຄ່າຈອດລົດ ແລະ ເງື່ອນໄຂການບໍລິການ. ພວກເຂົາສາມາດຮຽກຮ້ອງເອົາປີ້ ແລະ ໃບຮັບເງິນເພື່ອເປັນຫຼັກຖານໃນການຊຳລະ.
ກົດລະບຽບທີ່ສະເໜີ ຈະຮຽກຮ້ອງໃຫ້ຜູ້ໃຫ້ບໍລິການຕ້ອງມີພະນັກງານມາຄຸ້ມຄອງສະຖານທີ່ຈອດລົດ ແລະ ມີກ້ອງວົງຈອນປິດ, ໄຟເຍືອງທາງ ແລະ ຮັກສາຄວາມສະອາດ.
ສະຖານທີ່ຈອດລົດຍັງຕ້ອງຈັດສັນບ່ອນຈອດລົດບຸລິມະສິດ ສຳລັບຄົນພິການ, ຜູ້ອາຍຸສູງ ແລະ ແມ່ຍິງຖືພາ.
ລົດທີ່ປະຕິບັດໜ້າທີ່ວຽກງານປ້ອງກັນຊາດ-ປ້ອງກັນຄວາມສະຫງົບ, ລວມທັງລົດກູ້ໄພ, ລົດດັບເພີງ ແລະ ລົດໂຮງໝໍ ຈະໄດ້ຮັບການຍົກເວັ້ນຄ່າຈອດລົດ.
ຮ່າງກົດລະບຽບນີ້ຍັງບໍ່ທັນລະບຸອັດຕາຄ່າຈອດລົດທີ່ຜູ້ຂັບຂີ່ຕ້ອງຈ່າຍຢ່າງຊັດເຈນ. ເຊິ່ງຈະຕ້ອງໄດ້ຮັບການສຶກສາ ແລະ ຮັບຮອງຜ່ານຂັ້ນຕອນຂອງລັດ ໂດຍພິຈາລະນາຈາກປະເພດລົດ, ສະຖານທີ່ຈອດ ແລະ ໄລຍະເວລາໃນການຈອດ.
ຂໍ້ສະເໜີດັ່ງກ່າວເກີດຂຶ້ນ ໃນຂະນະທີ່ນະຄອນຫຼວງວຽງຈັນພວມພະຍາຍາມປັບປຸງລະບົບການຂົນສົ່ງໃນຕົວເມືອງ, ລວມທັງການພັດທະນາບໍລິການລົດເມໂດຍສານດ່ວນ (BRT).
ໃນເດືອນມີນາ, ສຳນັກຂ່າວສານປະເທດລາວ ໄດ້ລາຍງານກ່ຽວກັບແຜນການສ້າງເຂດຈອດລົດທີ່ກຳນົດໄວ້ 8 ຈຸດ ໃນເມືອງຈັນທະບູລີ ແລະ ສີສັດຕະນາກ, ໂດຍສະເໜີເກັບຄ່າຈອດລົດແຄມທາງ 80 ກີບຕໍ່ນາທີ ພາຍໃຕ້ການຈັດຕັ້ງປະຕິບັດທີ່ເຊື່ອມໂຍງກັບໂຄງການລົດເມໂດຍສານດ່ວນ.
ຮ່າງໃໝ່ທີ່ສະເໜີຕໍ່ສະພາ ຍັງບໍ່ໄດ້ຢືນຢັນວ່າ ອັດຕາດັ່ງກ່າວຈະຖືກນຳໃຊ້ຢ່າງກວ້າງຂວາງໃນທົ່ວນະຄອນຫຼວງ ຫຼື ບໍ່.
ອີກໜຶ່ງຂໍ້ກຳນົດທີ່ສຳຄັນແມ່ນ ກ່ຽວກັບວິທີການນຳໃຊ້ລາຍຮັບຈາກການຈອດລົດ.
ອີງຕາມຮ່າງກົດລະບຽບ, ລາຍຮັບຈາກການບໍລິການຈອດລົດຈະຖືກມອບເຂົ້າໃນລະບົບງົບປະມານຂອງລັດ ແລະ ສາມາດຊ່ວຍສະໜອງທຶນເຂົ້າໃນການບຳລຸງຮັກສາທາງ, ການປັບປຸງພື້ນຖານໂຄງລ່າງ, ການພັດທະນາການຂົນສົ່ງສາທາລະນະ ລວມທັງລົດເມໂດຍສານດ່ວນ, ແລະ ການທຳຄວາມສະອາດຕົວເມືອງ.
ຂໍ້ກຳນົດທີ່ສະເໜີນີ້ ຍັງຈະເພີ່ມຄວາມຮັບຜິດຊອບໃຫ້ແກ່ຜູ້ຂັບຂີ່ໃນການປະຕິບັດຕາມປ້າຍຈອດລົດ, ນຳໃຊ້ສະຖານທີ່ທີ່ກຳນົດໄວ້ ແລະ ຫຼີກລ່ຽງການກີດຂວາງທາງເຂົ້າອາຄານ ແລະ ສະຖານທີ່ອື່ນໆ.
ຜູ້ໃຫ້ບໍລິການຈອດລົດຈະບໍ່ໄດ້ຮັບອະນຸຍາດໃຫ້ນຳໃຊ້ທາງຍ່າງ ຫຼື ໜ້າອາຄານເປັນບ່ອນຈອດລົດ ໂດຍບໍ່ໄດ້ຮັບອະນຸຍາດ.
ຮ່າງດັ່ງກ່າວແມ່ນພາກສ່ວນໜຶ່ງຂອງຄວາມພະຍາຍາມໃນວົງກວ້າງ ເພື່ອປັບປຸງການຄຸ້ມຄອງຕົວເມືອງ ໃນຂະນະທີ່ນະຄອນຫຼວງວຽງຈັນກຳລັງປະເຊີນກັບຄວາມຕ້ອງການທີ່ເພີ່ມຂຶ້ນ ກ່ຽວກັບເສັ້ນທາງ, ພື້ນທີ່ສາທາລະນະ ແລະ ບໍລິການຂົນສົ່ງ.
ໃນກອງປະຊຸມສະພາຄັ້ງດຽວກັນນີ້, ບັນດາສະມາຊິກຍັງໄດ້ພິຈາລະນາຮ່າງຂໍ້ກຳນົດກ່ຽວກັບຄວາມຮັບຜິດຊອບຂອງເຈົ້າຂອງທີ່ພັກອາໄສ ແລະ ຜູ້ເຊົ່າ, ການຄຸ້ມຄອງກອງທຶນຊ່ວຍເຫຼືອສຸກເສີນ, ການປະເມີນລາຄາທີ່ດິນສະບັບປັບປຸງ ແລະ ມາດຕະການແກ້ໄຂຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ.
ສະພາໄດ້ຖືກເຊີນໃຫ້ກວດກາ ແລະ ປະກອບຄຳຄິດເຫັນຕໍ່ຂໍ້ສະເໜີກ່ຽວກັບການຈອດລົດດັ່ງກ່າວ ກ່ອນທີ່ຈະຕັດສິນໃຈວ່າຈະຮັບຮອງ ຫຼື ບໍ່.
ຮ່າງກົດລະບຽບດັ່ງກ່າວຍັງບໍ່ທັນໄດ້ຮັບການຢືນຢັນວ່າຖືກຮັບຮອງເທື່ອ, ແລະ ຍັງບໍ່ທັນມີການປະກາດວັນທີກ່ຽວກັບການບັງຄັບໃຊ້ກົດລະບຽບນີ້ຢ່າງເປັນທາງການ.
#LaoX #ນະຄອນຫຼວງວຽງຈັນ #Vientiane #ກົດລະບຽບການຈອດລົດ #ParkingRules #ການຈະລາຈອນ #Laos #VientianeTraffic #ຂ່າວລາວ
