ເຊົ້າວັນຈັນ, ສະພາແຫ່ງຊາດໄດ້ໄຂກອງປະຊຸມສະໄໝວິສາມັນເທື່ອທີ 1 ຂອງຕົນຂຶ້ນ, ໂດຍບັນດາສະມາຊິກສະພາແຫ່ງຊາດກຽມພິຈາລະນາຮັບຮອງເອົາ ວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ເປັນບູລິມະສິດສູງສຸດລະດັບຊາດຂອງລັດຖະບານ.
ກອງປະຊຸມຄັ້ງນີ້ ດຳເນີນພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ໂດຍໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ.
ກອງປະຊຸມເຊິ່ງດຳເນີນໄປເປັນເວລາ 5 ວັນ (ຕັ້ງແຕ່ວັນທີ 6-10 ກໍລະກົດ ທີ່ນະຄອນຫຼວງວຽງຈັນ), ໄດ້ເຕົ້າໂຮມເອົາບັນດາການນຳຂັ້ນສູງຂອງພັກ ແລະ ລັດ, ສະມາຊິກລັດຖະບານ ແລະ ສະມາຊິກສະພາແຫ່ງຊາດ ເພື່ອປຶກສາຫາລືກ່ຽວກັບບັນດານະໂຍບາຍດ້ານເສດຖະກິດທີ່ສຳຄັນ, ທົບທວນຄືນຄວາມຄືບໜ້າໃນໄລຍະ 6 ເດືອນຕົ້ນປີ 2026 ແລະ ພິຈາລະນາກົດໝາຍສຳຄັນດ້ານການເງິນ.
ໃນການກ່າວເປີດກອງປະຊຸມ, ທ່ານ ໄຊສົມພອນ ໄດ້ກ່າວວ່າ ກອງປະຊຸມສະໄໝວິສາມັນຄັ້ງນີ້ ສ່ອງແສງໃຫ້ເຫັນເຖິງຄວາມຕັດສິນໃຈຂອງພັກ ແລະ ລັດຖະບານ ໃນການຫັນເອົາມະຕິກອງປະຊຸມໃຫຍ່ ຄັ້ງທີ XII ຂອງພັກ ມາເປັນການຈັດຕັ້ງປະຕິບັດຕົວຈິງ ແລະ ເລັ່ງລັດການພັດທະນາປະເທດຊາດ.
ທ່ານກ່າວຕື່ມວ່າ ພັກ ແລະ ລັດ ຍັງສືບຕໍ່ເອົາການພັດທະນາເສດຖະກິດເປັນໃຈກາງຂອງນະໂຍບາຍແຫ່ງຊາດ ເພື່ອຍົກລະດັບຊີວິດການເປັນຢູ່ຂອງປະຊາຊົນ ແລະ ສະໜັບສະໜູນ ສປປ ລາວ ໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີນີ້.
ດ້ວຍການທີ່ປະເທດຊາດກຳລັງມຸ່ງໜ້າໄປສູ່ຈຸດໝາຍທີ່ເໜືອກວ່ານັ້ນ, ທ່ານກ່າວວ່າ ລັດຖະບານພວມສູ້ຊົນເພື່ອບັນລຸເປົ້າໝາຍໄລຍະຍາວ ໃນການກາຍເປັນປະເທດທີ່ມີລາຍຮັບປານກາງຫາສູງ ພາຍໃນປີ 2055.
ທ່ານຍັງໄດ້ກ່າວຕື່ມອີກວ່າ: “ບົນພື້ນຖານດັ່ງກ່າວນີ້, ຄຽງຄູ່ກັບຄວາມພະຍາຍາມຢ່າງຕໍ່ເນື່ອງ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ທີ່ໄດ້ຈັດຕັ້ງປະຕິບັດໃນຊ່ວງປີ 2021-2025 — ພັກ ແລະ ລັດຖະບານ ຈຶ່ງໄດ້ສະເໜີໃຫ້ມີການຮັບຮອງເອົາ ວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ, ເຊິ່ງເປັນເປົ້າໝາຍຫຼັກຂອງກອງປະຊຸມສະໄໝວິສາມັນ ເທື່ອທີ 1 ນີ້.”
ຢູ່ກອງປະຊຸມຄັ້ງນີ້, ສະພາແຫ່ງຊາດຈະພິຈາລະນາ 4 ວາລະສຳຄັນຄື: ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈຳ 6 ເດືອນຕົ້ນປີ, ການຮັບຮອງເອົາວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ, ແລະ ການພິຈາລະນາຮ່າງກົດໝາຍວ່າດ້ວຍຄັງເງິນແຫ່ງລັດສະບັບໃໝ່ ພ້ອມດ້ວຍການປັບປຸງກົດໝາຍວ່າດ້ວຍງົບປະມານແຫ່ງລັດ.
ທ່ານຍັງໄດ້ຮຽກຮ້ອງໃຫ້ບັນດາສະມາຊິກສະພາແຫ່ງຊາດ ຈົ່ງຄົ້ນຄວ້າພິຈາລະນາບັນດາຂໍ້ສະເໜີຕ່າງໆທີ່ຢູ່ຕໍ່ໜ້າຢ່າງຖີ່ຖ້ວນ ແລະ ຮ່ວມມືກັນເພື່ອໃຫ້ບັນລຸຄວາມເປັນເອກະພາບກັນ ກ່ຽວກັບບັນດາມາດຕະການຕ່າງໆທີ່ຈະສ້າງຜົນປະໂຫຍດໃຫ້ແກ່ປະເທດຊາດ.
ໃນການລາຍງານຜົນງານ 6 ເດືອນຂອງລັດຖະບານ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ກ່າວວ່າ ສປປ ລາວ ຍັງສາມາດຮັກສາການເຕີບໂຕທາງດ້ານເສດຖະກິດໄວ້ໄດ້ ເຖິງແມ່ນວ່າຈະສືບຕໍ່ປະເຊີນກັບຄວາມບໍ່ແນ່ນອນຂອງໂລກ, ຄວາມເຄັ່ງຕຶງທາງດ້ານພູມສາດການເມືອງ ແລະ ໄພທຳມະຊາດກໍຕາມ.
ເຖິງວ່າຈະມີສິ່ງທ້າທາຍເຫຼົ່ານີ້, ທ່ານນາຍົກລັດຖະມົນຕີກ່າວວ່າ ມາດຕະການທີ່ເດັດຂາດຂອງພັກ, ລັດຖະບານ ແລະ ອົງການປົກຄອງທ້ອງຖິ່ນຂັ້ນແຂວງ ໄດ້ຊ່ວຍໃຫ້ເສດຖະກິດຍັງສາມາດສືບຕໍ່ຂະຫຍາຍຕົວໄດ້.
ອີງຕາມບົດລາຍງານ, ສປປ ລາວ ມີການເຕີບໂຕຂອງລວມຍອດຜະລິດຕະພັນພາຍໃນ (GDP) ຢູ່ທີ່ 5% ໃນໄລຍະ 6 ເດືອນຕົ້ນປີ 2026, ເຊິ່ງລວມມູນຄ່າເສດຖະກິດທັງໝົດ 199.987 ຕື້ກີບ, ເທົ່າກັບ 48% ຂອງແຜນການປະຈຳປີທີ່ສະພາແຫ່ງຊາດໄດ້ຮັບຮອງ.
ລາຍຮັບແຫ່ງລັດບັນລຸໄດ້ 44.956 ຕື້ກີບ, ຫຼຶ ເທົ່າກັບ 54% ຂອງແຜນການປີ, ເຊິ່ງເພີ່ມຂຶ້ນ 19% ເມື່ອທຽບໃສ່ໄລຍະດຽວກັນຂອງປີຜ່ານມາ.
ການຄ້າຕ່າງປະເທດບັນລຸໄດ້ຫຼາຍກວ່າ 10,1 ຕື້ໂດລາສະຫະລັດ, ສາມາດສ້າງການດຸນການຄ້າໄດ້ 1,159 ຕື້ໂດລາສະຫະລັດ ເຖິງແມ່ນວ່າການສົ່ງອອກແຜງໂຊລາເຊວ, ແຮ່ຄຳ ແລະ ຜະລິດຕະພັນເຈ້ຍ ຈະຫຼຸດລົງກໍ່ຕາມ.
ລັດຖະບານຍັງໄດ້ລາຍງານຄວາມຄືບໜ້າໃນການແກ້ໄຂບັນຫາສັງຄົມທີ່ສຳຄັນ. ໃນໄລຍະ 6 ເດືອນຕົ້ນປີ, ເຈົ້າໜ້າທີ່ສາມາດດຳເນີນຄະດີຢາເສບຕິດໄດ້ 1.786 ຄະດີ, ຈັບກຸມຜູ້ຕ້ອງສົງໄສ 4.025 ຄົນ ແລະ ນຳສົ່ງຜູ້ຕິດຢາເສບຕິດຈຳນວນ 7.046 ຄົນ ເຂົ້າສູນບຳບັດ.
ພ້ອມດຽວກັນນັ້ນ, ເຈົ້າໜ້າທີ່ບັງຄັບໃຊ້ກົດໝາຍກໍ່ສາມາດມ້າງການເຄື່ອນໄຫວຫຼອກລວງທາງອອນລາຍ (online scam) ໄດ້ 44 ກໍລະນີ ແລະ ກັກຕົວຜູ້ຕ້ອງສົງໄສໄດ້ 4.482 ຄົນ ຈາກ 25 ປະເທດ.
ເພື່ອແກ້ໄຂບັນຫາການຂາດແຄນນ້ຳມັນເຊື້ອໄຟ ແລະ ລາຄາທີ່ເພີ່ມສູງຂຶ້ນ, ລັດຖະບານໄດ້ຫຼຸດພາສີຊົມໃຊ້ນ້ຳມັນເຊື້ອໄຟ, ເພີ່ມການຈັດສັນເງິນຕາຕ່າງປະເທດສຳລັບການນຳເຂົ້ານ້ຳມັນ ແລະ ສືບຕໍ່ຊຸກຍູ້ການນຳໃຊ້ຍານພາຫະນະໄຟຟ້າ.
ເຖິງຈະມີຜົນໄດ້ຮັບທາງເສດຖະກິດທີ່ຕັ້ງໜ້າກໍ່ຕາມ, ທ່ານນາຍົກລັດຖະມົນຕີ ຍອມຮັບວ່າອັດຕາເງິນເຟີ້ຍັງຄົງເປັນສິ່ງທີ່ໜ້າເປັນຫ່ວງ. ລາຄາສິນຄ້າອຸປະໂພກ-ບໍລິໂພກສະເລ່ຍເພີ່ມຂຶ້ນ 8% ໃນໄລຍະ 6 ເດືອນຕົ້ນປີ, ເຊິ່ງສູງກວ່າເປົ້າໝາຍທີ່ສະພາແຫ່ງຊາດວາງໄວ້ຄື 5%, ໃນຂະນະທີ່ເງິນກີບອ່ອນຄ່າລົງ 3,09%.
ສຳລັບໄລຍະທີ່ເຫຼືອຂອງປີນີ້, ລັດຖະບານໄດ້ວາງເປົ້າໝາຍທີ່ຈະເພີ່ມການເຕີບໂຕທາງເສດຖະກິດໃຫ້ບັນລຸ 5,5%, ຍົກລະດັບລາຍຮັບສະເລ່ຍຕໍ່ຫົວຄົນໃຫ້ໄດ້ 2.238 ໂດລາສະຫະລັດ ຕໍ່ປີ, ຂະຫຍາຍການຜະລິດກະສິກຳ, ຊຸກຍູ້ການຜະລິດໄຟຟ້າ ແລະ ການສົ່ງອອກແຮ່ທາດ, ດຶງດູດນັກທ່ອງທ່ຽວສາກົນໃຫ້ໄດ້ 4,46 ລ້ານເທື່ອຄົນ, ແລະ ສືບຕໍ່ປະຕິບັດບັນດາມາດຕະການເພື່ອຮັກສາສະຖຽນລະພາບຂອງລາຄາສິນຄ້າ ແລະ ເງິນຕາແຫ່ງຊາດ.
ພ້ອມກັນນັ້ນ, ທ່ານນາຍົກລັດຖະມົນຕີ ຍັງໄດ້ສະເໜີໃຫ້ສະພາແຫ່ງຊາດຮັບຮອງເອົາຕົວເລກລັດຖະກອນໃໝ່ຈຳນວນ 2.500 ຕໍາແໜ່ງ ສຳລັບປີ 2026 ເພື່ອສ້າງຄວາມເຂັ້ມແຂງໃຫ້ແກ່ວຽກງານການບໍລິຫານລັດໃນຂະແໜງການທີ່ສຳຄັນຕ່າງໆ.
#LaoX #ສະພາແຫ່ງຊາດ #ແກ້ໄຂຄວາມທຸກຍາກ #ທ່ານສອນໄຊ #ນາຍົກ #ປະທານປະເທດ #ການເມືອງ #ການເງິນ #ລັດຖະບານ
