ລັດຖະບານລາວ ເລັ່ງກຽມສະເໜີໂຄງການຍົກລະດັບພື້ນຖານໂຄງລ່າງດ່ານຊາຍແດນລາວ-ຈີນ ດຶງທຶນຊ່ວຍເຫຼືອລ້າຈາກອົງການ CIDCA ເພື່ອແກ້ໄຂຄວາມແອອັດ ແລະ ຂະຫຍາຍຊ່ອງທາງຂົນສົ່ງ. ການເຄື່ອນໄຫວນີ້ມີເປົ້າໝາຍເພື່ອຍົກລະດັບລະບົບໂລຈິສຕິກ ພ້ອມກະຕຸ້ນການຄ້າ, ການລົງທຶນ ແລະ ການທ່ອງທ່ຽວ ເຊິ່ງຈະເປັນກໍາລັງແຮງສໍາຄັນໃນການຂັບເຄື່ອນເສດຖະກິດມະຫາພາກຂອງຊາດໃຫ້ເຕີບໂຕຢ່າງກ້າວກະໂດດ.
ກະຊວງການເງິນລາຍງານວ່າ ການເຄື່ອນໄຫວດັ່ງກ່າວມີຂຶ້ນໃນວັນທີ 4 ພຶດສະພາ 2026 ຜ່ານມາ ທີ່ຫ້ອງການຄະນະກໍາມະການຮ່ວມມືລາວ-ຈີນ (ຄລຈ), ໂດຍການເປັນປະທານຮ່ວມຂອງ ທ່ານ ນາງ ແສງເດືອນ ໄຊຍະສອນ ຮອງປະທານ ຄລຈ ແລະ ທ່ານ ລິດຕາ ຂັດທິຍະ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມດ້ວຍຕາງໜ້າຈາກກະຊວງການຕ່າງປະເທດ, ກະຊວງການເງິນ ແລະ ພາກສ່ວນກ່ຽວຂ້ອງ.
ກອງປະຊຸມໄດ້ສຸມໃສ່ປຶກສາຫາລືການກະກຽມວຽກງານປັບປຸງດ່ານຊາຍແດນ ບໍ່ເຕ່ນ-ບໍ່ຫານ ແລະ ດ່ານອື່ນໆ ເພື່ອຜັນຂະຫຍາຍຂໍ້ຕົກລົງຂອງການນໍາສູງສຸດທັງສອງປະເທດ ໂດຍສະເພາະການກະກຽມບົດສະເໜີໂຄງການເພື່ອຂໍນໍາໃຊ້ງົບປະມານຊ່ວຍເຫຼືອລ້າຈາກ ສປ ຈີນ ເຂົ້າໃນການຈັດຕັ້ງປະຕິບັດຕົວຈິງ.
ວຽກງານຈຸດສຸມລວມມີການສ້າງອາຄານກວດກາຮ່ວມສໍາລັບຜູ້ໂດຍສານຢູ່ດ່ານສາກົນສະຖານີລົດໄຟລາວ-ຈີນ, ການສະໜອງຂໍ້ມູນເຕັກນິກເພື່ອປັບປຸງເສັ້ນທາງ 13 ເໜືອ ຊ່ວງບໍ່ເຕ່ນ-ບໍ່ປຽດ ແລະ ການຮ່ວມມືກັບແຂວງຢູນນານ ເພື່ອຊຸກຍູ້ໂຄງການກໍ່ສ້າງຊ່ອງທາງ 12 ເລນ ສໍາລັບລົດຂົນສົ່ງສິນຄ້າ.
ນອກຈາກນີ້, ຍັງໄດ້ກຽມສະເໜີຍົກລະດັບດ່ານປາງໄຮ ຢູ່ເມືອງສິງ ແຂວງຫຼວງນໍ້າທາ, ດ່ານລານຕຸຍ ຢູ່ເມືອງຍອດອູ ແຂວງຜົ້ງສາລີ ແລະ ການກໍ່ສ້າງເສັ້ນທາງເຊື່ອມຈອດຕ່າງໆ ເພື່ອແນໃສ່ເຮັດໃຫ້ການສັນຈອນໄປມາ ແລະ ການຂົນສົ່ງສິນຄ້າຂ້າມແດນມີຄວາມສະດວກວ່ອງໄວຂຶ້ນ.
ເພື່ອຮັບປະກັນໃຫ້ແຜນການຮ່ວມມືເພື່ອການພັດທະນາດັ່ງກ່າວປະກົດຜົນເປັນຈິງ, ກອງປະຊຸມໄດ້ມອບໝາຍໃຫ້ກະຊວງ ຍທຂ ເປັນເຈົ້າການຫຼັກໃນການກະກຽມບົດສະເໜີໂຄງການ ແລະ ຂໍ້ມູນເຕັກນິກທັງໝົດ, ຂະນະທີ່ກະຊວງການຕ່າງປະເທດຮັບຜິດຊອບປະສານງານດ້ານຫຼັກການຊາຍແດນ ແລະ ໃຫ້ ຄລຈ ເປັນສູນກາງສັງລວມຂໍ້ມູນເພື່ອນໍາສະເໜີຕໍ່ອົງການຮ່ວມມືເພື່ອການພັດທະນາສາກົນແຫ່ງຊາດຈີນ (CIDCA) ຢ່າງເປັນທາງການ.
ການພັດທະນາພື້ນຖານໂຄງລ່າງດ່ານຊາຍແດນຄັ້ງນີ້ ຖືເປັນວຽກງານຈຸດສຸມຍຸດທະສາດ ທີ່ບໍ່ພຽງແຕ່ຈະຊ່ວຍປົດລັອກຂໍ້ຈໍາກັດດ້ານການຂົນສົ່ງໃນປັດຈຸບັນເທົ່ານັ້ນ, ແຕ່ຍັງເປັນການເປີດປະຕູຮັບເອົາກາລະໂອກາດໃໝ່ທາງດ້ານການຄ້າ ແລະ ການທ່ອງທ່ຽວ ເຊິ່ງຈະສ້າງຜົນປະໂຫຍດອັນມະຫາສານຕໍ່ການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງປະຊາຊົນລາວໃນອະນາຄົດ.
#LaoXperts #LaosChinaRelations #BorderInfrastructure #LaoEconomy #Logistics #CrossBorderTrade #EconomicDevelopment
