ເມື່ອກ້າວເຂົ້າສູ່ໄລຍະໃກ້ທີ່ຈະໝົດປີແລ້ວ ຫຼາຍຄົນອາດຕ້ອງການຢາກທີ່ຈະຮູ້ວ່າຕົນເອງນັ້ນຕ້ອງເສີມ, ປັບປ່ຽນ ຫຼື ແກ້ໄຂບ່ອນໃດແດ່ກ່ຽວກັບການບໍລິຫານເງິນຂອງຕົນເອງ. ເຊິ່ງໃນມື້ນີ້ພວກເຮົາຈະພາໄປກວດສອບກ່ຽວກັບສຸຂະພາບທາງດ້ານເງິນ ທີ່ຈະຊ່ວຍໃຫ້ທ່ານສາມາດບໍລິຫານເງິນຂອງຕົນເອງໃຫ້ເໝາະສົມໃນການໃຊ້ສອຍຕ່າງໆ ແລະ ເປັນພື້ນຖານທີ່ຈະນຳມາໃຫ້ເຮົານັ້ນມີການເຕີບໂຕທາງດ້ານການເງິນໃນອະນາຄົດ, ໂດຍຈະມີການກວດສອບດັ່ງລຸ່ມນີ້.
- ປຽບທຽບຊັບສິນກັບໜີ້ສິນຂອງຕົນເອງ
ປະເພດສິນຊັບ
- ສິນຊັບທີ່ມີສະພາບຄ່ອງ ໄດ້ແກ່: ເງິນສົດ ແລະ ບັນຊີເງິນຝາກປະຢັດ.
- ສິນຊັບເພື່ອການລົງທຶນ ໄດ້ແກ່: ເງິນຝາກປະຈຳ, ຫວຍເງິນຝາກປະຢັດ ແລະ ມູນຄ່າຫຼັກຊັບໂດຍລວມ
- ສິນຊັບສ່ວນຕົວ ໄດ້ແກ່: ເຮືອນ, ລົດ, ແລະ ຂອງມີຄ່າຕ່າງໆ (ທີ່ຜ່ອນຈ່າຍໝົດແລ້ວ, ເຮົາເປັນເຈົ້າຂອງໂດຍສົມບູນ).
ປະເພດໜີ້ສິ້ນ
- ໜີ້ສິນໄລຍະສັ້ນ ໄດ້ແກ່: ເປັນໜີ້ບັດເຄຣດິດ, ໜີ້ສິນຊໍາລະສິນຄ້າ, ໜີ້ບັດເງິນສົດອື່ນໆທີ່ມີອາຍຸບໍ່ເກີນ 1 ປີ
- ໜີ້ສິນໄລຍະຍາວ ໄດ້ແກ່: ໜີ້ສິນຈາກການຜ່ອນຊື້ເຮືອນ, ໜີ້ສິນຈາກການຜ່ອນຊື້ລົດ ເຊິ່ງມີອາຍຸຫຼາຍກວ່າ 1 ປີຂຶ້ນໄປ
ເມື່ອຮູ້ກ່ຽວກັບສິນຊັບ ແລະ ໜີ້ສິນແລ້ວເຮົາກໍຈະເລີ່ມປະເມີນກັນເລີຍໂດຍໃຊ້ສູດ
ຊັບສິນທີ່ຄວນຈະມີ = ອາຍຸ X ລາຍໄດ້ຕໍ່ປີ X 10%
ຕົວຢ່າງ: ເມື່ອລວມສິນຊັບ ແລະ ໜີ້ສິນທັງໝົດຂອງ ທ້າວ ກ ຈະມີຊັບສິນ 100,000,000 ກີບ ແລະ ໜີ້ສິນ 50,000,000 ກີບ ເຮົາຈະໄດ້
ຊັບສິນທີ່ມີຢູ່ໃນປັດຈຸບັນ 100,000,000-50,000,000 = 50,000,000 ກີບ
ຈາກນັ້ນເຮົາມາຄຳນວນ “ຊັບສິນທີ່ຄວນຈະມີ” ເຊິ່ງສາມາດຄຳນວນໄດ້ດັ່ງສູດລຸ່ມນີ້
ອີງຈາກຕົວຢ່າງຂ້າງເທີງ: ທ້າວ ກ ມີອາຍຸ 31 ປີ ມີເງິນເດືອນ 500,000 ກີບ (x 12 ເດືອນ = 6,000,000 ກີບຕໍ່ປີ)
ຊັບສິນທີ່ທ້າວ ກ ຄວນມີ = 31 x 6,000,000 x 10% = 18,600,000 ກີບ
ສະຫຼຸບໄດ້ວ່າ: ຈາກຊັບສິນປັດຈຸບັນທຽບກັບຊັບສິນທີ່ຄວນຈະມີ (50,000,000 : 18,600,000)
ໝາຍຄວາມວ່ທ້າວ ກ ມີຊັບສິນຫຼາຍກ່ວາຊັບສິນທີ່ຄວນຈະມີ.
ດັ່ງນັ້ນ, ຈຶ່ງຖືວ່າທ້າວ ກ ມີສຸຂະພາບທາງດ້ານການເງິນໂດຍລວມແມ່ນດີ.
- ບັນທຶກລາຍຈ່າຍ ແລະ ລາຍຮັບປະຈຳວັນ
ແມ່ນການກວດກາເບິ່ງພຶດຕິກຳທາງການເງິນຂອງຕົນເອງໃນປັດຈຸບັນ, ເພື່ອໃຫ້ເຮົາຮູ້ວ່າມີເງິນເຂົ້າມາຫຼາຍປານໃດ ແລະ ເງິນອອກເທົ່າໃດໃນແຕ່ລະມື້ ແລະ ແຕ່ລະເດືອນ. ນີ້ເຮັດໃຫ້ສາມາດເຫັນຈຸດຮົ່ວໄຫຼທີ່ເກີດຂຶ້ນຊ້ຳໆ ໂດຍສະເພາະແມ່ນລາຍຈ່າຍທີ່ບໍ່ຈຳເປັນທີ່ມັກເກີດຂຶ້ນເປັນເປັນປະຈຳໂດຍທີ່ເຮົາບໍ່ຮູ້ຕົວ ເຊັ່ນ: ການຊື້ເຄື່ອງຂອງຕ່າງໆ ຫຼື ຄ່າໃຊ້ຈ່າຍຂອງກິນຫຼິ້ນ, ເຄື່ອງດື່ມ, ກາເຟ, ຄ່າເດີນທາງ… ເມື່ອເຮົາຮູ້ແລ້ວກໍຊອກຫາວິທີທີ່ຈະປັບປ່ຽນ ແລະ ຫຼຸດຜ່ອນການໃຊ້ຈ່າຍເພື່ອອຸດຮູຮົ່ວທີ່ເກີດຂື້ນ.
ເຊິ່ງເປັນວິທີທີ່ງ່າຍໆທີ່ຈະຊ່ວຍວາງແຜນ ຫຼື ປັບປ່ຽນແຜນການທາງດ້ານການເງິນຂອງທ່ານໃຫ້ເໝາະສົມກວ່າຍິ່ງຂຶ້ນ.
- ເຮົາມີລາຍຮັບຫຼາຍກວ່າລາຍຈ່າຍຫຼືບໍ່?
ຄ່າໃຊ້ຈ່າຍທີ່ພວກເຮົາມີທຸກໆເດືອນ ພວກເຮົາກູ້ຢືມເງິນໃນອະນາຄົດເພື່ອຈ່າຍບໍ? ບັດເຄຣດິດ, ບັດເງິນສົດ, ເງິນກູ້, ເງິນກູ້ປະເພດຕ່າງໆ ຖ້າສາມາດຊໍາລະໄດ້ທັນເວລາ ແລະ ໃຊ້ໄດ້ໄວຈະຖືວ່າໂຊກດີ. ແຕ່ສຳລັບໃນໄລຍະຍາວ ຖ້າຍັງເປັນແບບນີ້ ສະຖານະການທາງດ້ານການເງິນອາດຈະຍາກທີ່ຈະໝັ້ນຄົງ.
ໂດຍວິທີການກວດສອບງ່າຍໆສຳລັບການຈັດການກັບໜີ້ສິນໃນແຕ່ລເດືອນກໍຄື
ໜີ້ສິນໃນແຕ່ລະເດືອນ = ລາຍໄດ້ຕໍ່ເດືອນ X 1/3
ຫຼືຖ້າຫາກມີໜີ້ສິນຫຼາຍກວ່າ 1/3 ຂອງລາຍໄດ້ຕໍ່ເດືອນ ເຊັ່ນ ທ້າວ ກ ມີລາຍໄດ້ 600,000 ກີບຕໍ່ເດືອນ ໂດຍພາລະໜີ້ສິນທີ່ລາວຕ້ອງຫ້າມເກີນກໍຄື 200,000 ກີບ. ເຊິ່ງຖ້າຫາກມີຫຼາຍກວ່ານັ້ນກໍຈະຕ້ອງຫາວິທີເພິ່ມລາຍໄດ້ ຫຼື ຫຼຸດຄ່າໃຊ້ຈ່າຍລົງເພື່ອສຸຂະພາບການເງິນທີ່ດີ
ໂດຍທາງແກ້ສຳລັບຄົນທີ່ມີລາຍຮັບທີ່ບໍ່ພຽງພໍກັບລາຍຈ່າຍຈະມີຢູ່ສອງວິທີຄື: ຊອກຫາວິທີຫຼຸດຜ່ອນຄ່າໃຊ້ຈ່າຍ (ເຮັດບັນທຶກລາຍຮັບລາຍຈ່າຍ) ຫຼື ເພີ່ມຊ່ອງທາງລາຍຮັບເພີ່ມເຕີມສໍາລັບຕົວທ່ານເອງ. ບໍ່ວ່າຈະເປັນແບບ active income ຫຼື passive income
- ມີເງິນເຫຼືອໄວ້ເກັບອອມຢູ່ບໍ?
ຫຼາຍຄົນມັກທີ່ຈະໃຊ້ຊີວິດຢູ່ກັບປັດຈຸບັນ ໂດຍບໍ່ຄຳນຶງເຖິງອະນາຄົດ, ການທີ່ມີເງິນໃຊ້ພຽງພໍໃນແຕ່ລະມື້ ບໍ່ໄດ້ກາລັນຕີວ່າມື້ໜ້າເຮົາຈະຍັງຫາເງິນໄດ້ແບບເກົ່າຢູ່ຫຼືບໍ່… ດັ່ງນັ້ນ ນອກເໜືອໄປຈາກການຫາເງິນໃຊ້ໃນແຕ່ລະວັນ, ເຮົາຄວນມີເງິນຝາກປະຢັດສໍາລັບເປົ້າໝາຍຕ່າງໆໃນຊີວິດ ແລະ ມີເງິນສຳຮອງໄວ້ໃຊ້ໃນເວລາທີ່ມີເຫດສຸກເສີນ. ໂດຍເງິນທັງສອງສ່ວນນີ້ ມັນບໍ່ຈໍາເປັນຕ້ອງເປັນພຽງແຕ່ເງິນສົດໃນບັນຊີເທົ່ານັ້ນ. ແຕ່ສາມາດແຈກຢາຍໃນຮູບແບບຕ່າງໆ ຫຼື ລົງທຶນເພື່ອເພີ່ມໂອກາດໃນການສ້າງຜົນຕອບແທນໄດ້.
ວິທີຄິດໄລ່ວ່າເຮົາຄວນມີເງິນເກັບເທົ່າໃດ
ເງິນເກັບອອມເພື່ອສຸກເສີນ = ລາຍຈ່າຍແຕ່ລະເດືອນ x 6
ຕົວຢ່າງ ທ້າວ ກ ມີລາຍຈ່າຍແຕ່ລະເດືອນຕົກຢູ່ ເດືອນລະ 450,000 ກີບ, ໂດຍເງິນເກັບທີ່ລາວຄວນຈະມີຄື 450,000 x 6 = 2,700,000 ກີບ. ຖ້າຫາກມີເຫດການທີ່ບໍ່ຄາດຝັນຂຶ້ນ ເງິນສ່ວນນີ້ຈະຊ່ວຍໃຫ້ລາວສາມາດຢູ່ໄດ້ໄປອີກ 6 ເດືອນ
- ການບໍລິຫານເງິນເກັບອອມໃຫ້ມີຜົນຕອບແທນຫຼາຍຂຶ້ນ
ຫຼາຍຄົນອາດຈະຄິດກ່ຽວກັບການລົງທຶນ ແນ່ນອນວ່າການລົງທຶນແມ່ນໜຶ່ງໃນວິທີທີ່ຈະເພີ່ມໂອກາດຂອງທ່ານໃນການສ້າງຜົນຕອບແທນໃຫ້ໄດ້ຫຼາຍຂຶ້ນ. ຢ່າງໃດກໍຕາມ, ກໍຍັງມີຫຼາຍປັດໄຈທີ່ເຂົ້າມາກ່ຽວຂ້ອງ ບໍ່ວ່າຈະເປັນເລື່ອງຂອງສະພາບການໃນຕະຫຼາດ, ອັດຕາການແລກປ່ຽນ, ຄວາມຮູ້ ແລະ ຄວາມສາມາດຂອງນັກລົງທຶນແລະອື່ນໆ.
ໂດຍສິ່ງທຳອິດທີ່ເຮົາຕ້ອງເຮັດແມ່ນຕັ້ງເປົ້າໝາຍ ແລະ ພິຈາລະນາໄລຍະເວລາທີ່ເຮົາຕ້ອງການໃຫ້ບັນລຸເປົ້າໝາຍນັ້ນ ເຊັ່ນ: ການສ້າງບັນຊີເງິນຝາກປະຢັດໃຫ້ກັບຄ່າຮຽນຂອງລູກ ຫຼື ເງິນບໍານານທີ່ໃຊ້ຈ່າຍ, ແຕ່ລະເປົ້າໝາຍຕ້ອງການເງິນທຶນທີ່ແຕກຕ່າງກັນ ແລະ ຄວາມສ່ຽງທີ່ສາມາດຍອມຮັບໄດ້ກໍ່ແຕກຕ່າງກັນ. ດັ່ງນັ້ນ, ທາງເລືອກໜຶ່ງທີ່ໜ້າສົນໃຈຄືການເລືອກຜົນຕອບແທນທີ່ມີທັງການຮັບປະກັນ ແລະ ພາກສ່ວນການລົງທຶນເພື່ອເພີ່ມໂອກາດໃນການສ້າງຜົນຕອບແທນທີ່ສູງຂຶ້ນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
