ອິນໂດເນເຊຍແມ່ນປະເທດທີ່ມີທ່າແຮງທາງດ້ານການຄ້າ ແລະ ການລົງທຶນສູງ. ດ້ວຍຊັບພະຍາກອນທຳມະຊາດທີ່ອຸດົມສົມບູນ ບວກກັບປະຊາກອນທີ່ຢູ່ໃນອາຍຸທີ່ພ້ອມສຳລັບເຮັດວຽກຫຼາຍ ແລະ ຂະໜາດເສດຖະກິດໃຫຍ່ທີ່ສຸດໃນອາຊີຕາເວັນອອກສຽງໃຕ້.
ຈາກຜົນການນັບຄະແນນສຽງທີ່ບໍ່ເປັນທາງການສຳລັບການເລືອກຕັ້ງທົ່ວໄປຂອງອິນໂດເນເຊຍໃນວັນທີ 14 ກຸມພາ 2024 ທີ່ຜ່ານມາ, ສະແດງໃຫ້ເຫັນວ່າ Prabowo Subianto, ອະດີດນາຍພົນ ແລະ ລັດຖະມົນຕີກະຊວງປ້ອງກັນປະເທດອາຍຸ 72 ປີ, ໄດ້ຮັບຄະແນນສຽງຫຼາຍກວ່າ 50% ຂຶ້ນເປັນປະທານາທິບໍດີຄົນໃໝ່ຂອງອິນໂດເນເຊຍ. ການປ່ຽນແປງຜູ້ນຳປະເທດຄັ້ງທຳອິດໃນຮອບ 10 ປີແມ່ນເກີດຂຶ້ນທ່າມກາງຄວາມນກັງວົນຈາກນັກລົງທຶນທີ່ລໍຖ້າຕາມການເຄື່ອນໄຫວຂອງ Prabowo Subianto.
ແນວທາງບໍລິຫານປະເທດຂອງ Prabowo Subianto ນັ້ນໄດ້ສຸມໃສ່ການເຕີບໂຕດ້ານເສດຖະກິດ 8% ແລະ ການເພິ່ງພາດ້ານພະລັງງານຂອງປະເທດໂດຍຜ່ານ Biodiesel ຈາກຕົ້ນປາມນໍ້າມັນ. ນັກວິເຄາະຄາດວ່າເສດຖະກິດອິນໂດເນເຊຍໃນປີ 2024 ຈະເຕີບໂຕ 4,5-5%.
ນອກຈາກນີ້, ພັກຂອງ Prabowo Subianto ຍັງໄດ້ໃຫ້ຄໍາໝັ້ນສັນຍາວ່າຈະສືບຕໍ່ນະໂຍບາຍຂອງອະດີດປະທານາທິບໍດີ Jokowi. ໂດຍເນັ້ນໜັກໃສ່ການພັດທະນາສິນຄ້າ ຫຼື ການບໍລິການຂອງສິນຄ້າໄປໃຫ້ເຖິງມືລູກຄ້າ, ໂຄງສ້າງພື້ນຖານ, ຊັບພະຍາກອນທໍາມະຊາດ ແລະ ເສດຖະກິດມະຫາພາກ.
- 7 ອຸດສາຫະກໍາທີ່ໂດດເດັ່ນຂອງອິນໂດເນເຊຍໃນປີ 2024, ທີ່ນັກລົງທຶນຄວນຈັບຕາເບິ່ງມີດັ່ງນີ້:
1. ການຂຸດຄົ້ນບໍ່ແຮ່ປາຍນ້ຳ:
– ຄວາມຂັດແຍ້ງກັນລະຫວ່າງຣັດເຊຍ-ຢູເຄຣນ ສົ່ງຜົນດີຕໍ່ການສົ່ງອອກສິນຄ້າຂອງອິນໂດເນເຊຍ. ເນື່ອງຈາກວ່າລາຄາສິນຄ້າໂພກປະພັນທີ່ສູງຂຶ້ນ ສົ່ງຜົນໃຫ້ເສດຖະກິດອິນໂດເນເຊຍເຕີບໂຕ.
– ສິນຄ້າໂພກປະພັນຍັງເປັນກະດູກສັນຫຼັງຂອງເສດຖະກິດອິນໂດເນເຊຍ. ໂດຍສະເພາະບັນດາສິນຄ້າທີ່ສຳຄັນເຊັ່ນ: ຖ່ານຫີນ, ນ້ຳມັນປາມ, ນິກເກິລ ແລະ ຢາງພາລາແມ່ນສິນຄ້າສົ່ງອອກຫຼັກໆຂອງປະເທດ.
– ໃນປີ 2014, ອິນໂດເນເຊຍໄດ້ເລີ່ມຫ້າມສົ່ງອອກແຮ່ທາດດິບ. ເພື່ອຊຸກຍູ້ການລົງທຶນຈາກຕ່າງປະເທດໃນຂະແໜງການບໍ່ແຮ່ປາຍນ້ຳ ແລະ ພັດທະນາໂຮງຫຼອມໂລຫະໃນທ້ອງຖິ່ນ.
2. ນິກເກິລ:
– ອິນໂດເນເຊຍໄດ້ຫ້າມການສົ່ງອອກແຮ່ນິກເກິລໃນປີ 2019 ແລະ ໄດ້ສົ່ງເສີມການແປຮູບແຮ່ນິກເອັນກ່ອນທີ່ຈະສົ່ງອອກ. ນະໂຍບາຍດັ່ງກ່າວໄດ້ສົ່ງຜົນກະທົບທາງບວກຕໍ່ເສດຖະກິດ ເເລະ ສາມາດດຶງດູດນັກລົງທຶນຈາກຕ່າງປະເທດອີກດ້ວຍ.
– ການສົ່ງອອກນິກເກິລແປຮູບຂອງອິນໂດເນເຊຍເພີ່ມຂຶ້ນຈາກ 1 ຕື້ໂດລາສະຫະລັດໃນປີ 2015 ຂຶ້ນເປັນ 30 ຕື້ໂດລາສະຫະລັດໃນປີ 2022.
3. ຕ່ອງໂສ້ການສະໜອງແບັດເຕີຣີລົດໄຟຟ້າ:
– ອິນໂດເນເຊຍມີແຮ່ທາດນິເກິລເປັນຈຳນວນຫຼວງຫຼາຍ ເຊິ່ງມີຄວາມສຳຄັນຢ່າງຍິ່ງຕໍ່ອຸດສາຫະກຳ EV ໃນທົ່ວໂລກ
– ອິນໂດເນເຊຍມີເປົ້າໝາຍທີ່ຈະເປັນສູນກາງ EV ໃນທົ່ວໂລກ ແລະ ເປັນ 1 ໃນ 3 ບັນດາຜູ້ຜະລິດແບັດເຕີຣີ EV ຊັ້ນນຳຂອງໂລກ.
– ບໍລິສັດຜະລິດລົດຍົນ BYD ຂອງຈີນມີແຜນຈະສ້າງໂຮງງານຢູ່ອິນໂດເນເຊຍ ດ້ວຍເງິນລົງທຶນ 1,5 ຕື້ໂດລາສະຫະລັດ.
– ລັດຖະບານອິນໂດເນເຊຍມີແຜນຈະນຳເຂົ້າແຮ່ລີທຽມຈາກອົສຕຣາລີໃຫ້ໄດ້ 60,000 ໂຕນໃນປີ 2024.
4. ຖ່ານຫີນ:
– ອິນໂດເນເຊຍແມ່ນປະເທດສົ່ງອອກຖ່ານຫີນໃຫຍ່ອັນດັບສາມໃນໂລກ.
– ຖ່ານຫີນແມ່ນຜະລິດຕະພັນສົ່ງອອກຫຼັກໆ ທີ່ສາມາດສ້າງລາຍຮັບໃຫ້ອິນໂດເນເຊຍປະມານ 3,000 ລ້ານໂດລາສະຫະລັດຕໍ່ເດືອນ.
– ອິນໂດເນເຊຍໄດ້ສົ່ງອອກຖ່ານຫີນໄປຍັງຕະຫຼາດ ຈີນ, ອິນເດຍ, ເກົາຫຼີໃຕ້, ຍີ່ປຸ່ນ, ຫວຽດນາມ ເເລະ ຟີລິບປິນ.
5. ໂຄງສ້າງພື້ນຖານ:
– ລັດຖະບານອິນໂດເນເຊຍໃຫ້ຄວາມສຳຄັນຕໍ່ການພັດທະນາພື້ນຖານໂຄງສ້າງ. ໂດຍຕ້ອງການເງິນທຶນປະມານ 400 ຕື້ໂດລາສະຫະລັດ ສໍາລັບການລົງທຶນດ້ານພື້ນຖານໂຄງສ້າງ
– ຊຸກຍູ້ພາກເອກະຊົນໃຫ້ເຂົ້າມາມີສ່ວຍຮ່ວມໂດຍຜ່ານ PPP (Public Private Partnership).
– ມອບໂອກາດສໍາລັບໂຄງການພະລັງງານ ແລະ ໂຄງສ້າງພື້ນຖານຂະໜາດນ້ອຍ ແລະ ຂະໜາດໃຫຍ່ໃນພາກຕາເວັນອອກຂອງອິນໂດເນເຊຍ.
6. ສຸຂະພາບ ແລະ ຢາ:
– ອິນໂດເນເຊຍມີຕະຫຼາດໃຫຍ່. ອຸດສາຫະກໍາສຸຂະພາບຄາດວ່າຈະໃຫ້ຜົນກໍາໄລທີ່ດີສໍາລັບນັກລົງທຶນຕ່າງປະເທດ.
– ການໃຊ້ຈ່າຍດ້ານສຸຂະພາບປະຈໍາປີແມ່ນເພີ່ມຂຶ້ນຫຼາຍ. ຫຼັງນຳຫຼັກປະກັນສຸຂະພາບທົ່ວໜ້າ (BPJS) ມາໃຊ້ໃນປີ 2014
– ການລົງທຶນໃນໂຮງໝໍ: ອິນໂດເນເຊຍມີຄວາມຕ້ອງການໂຮງໝໍທີ່ຄຸນະພາບສູງເພີ່ມຂຶ້ນ.
– ການຜະລິດອຸປະກອນການແພດ: ອິນໂດເນເຊຍມີນະໂຍບາຍສົ່ງເສີມການຜະລິດອຸປະກອນການແພດພາຍໃນປະເທດ.
– ເຕັກໂນໂລຊີດ້ານສຸຂະພາບ: ມີໂອກາດສໍາລັບການລົງທຶນໃນເຕັກໂນໂລຊີດ້ານສຸຂະພາບເຊັ່ນ: telemedicine ແລະ AI.
7. ການທ່ອງທ່ຽວ:
– ກະຊວງທ່ອງທ່ຽວອິນໂດເນເຊຍເປີດໂອກາດໃຫ້ນັກລົງທຶນຕ່າງປະເທດລົງທຶນເຂົ້າໃນໂຄງການທ່ອງທ່ຽວແບບຍືນຍົງ.
– ແຜນພັດທະນາການທ່ອງທ່ຽວ ຂອງອິນໂດເນເຊຍ ເຊິ່ງມີມູນຄ່າໃນການລົງທຶນປະມານ 1,5 ຕື້ໂດລາສະຫະລັດ ເເລະ ຄາດວ່າຈະສ້າງວຽກເຮັດງານທຳ 1,5 ລ້ານຄົນ ໂດຍຈະເນັ້ນໜັກໄປທີ່:
5 ແຫຼ່ງທ່ອງທ່ຽວໃໝ່: ພັດທະນາແຫຼ່ງທ່ອງທ່ຽວໃໝ່ 5 ແຫ່ງ.
8. ເຂດເສດຖະກິດພິເສດ: 8 ເຂດເສດຖະກິດພິເສດໄດ້ຮັບການກະກຽມສໍາລັບການທ່ອງທ່ຽວ.
– ອິນໂດເນເຊຍຄາດວ່າຈະຕ້ອນຮັບນັກທ່ອງທ່ຽວຕ່າງປະເທດປະມານ 14 ລ້ານຄົນໃນປີ 2024. ຜົນສຳຫຼວດການທ່ອງທ່ຽວປີ 2023 ໃນລະຫວ່າງເດືອນມັງກອນຫາເດືອນພະຈິກ, ອິນໂດເນເຊຍໄດ້ຕ້ອນຮັບນັກທ່ອງທ່ຽວຕ່າງປະເທດປະມານ 10,4 ລ້ານຄົນ.
ແນວໃດກໍດີ, ເຖິງວ່າອິນໂດເນເຊຍເປັນປະເທດທີ່ມີທ່າແຮງດ້ານການຄ້າ ແລະ ການລົງທຶນທີ່ມີໂອກາດເຕີບໂຕຫຼາຍກໍຕາມ. ແຕ່ຍັງມີຫຼາຍປັດໄຈທ້າທາຍທີ່ນັກລົງທຶນຄວນລະມັດລະວັງ. ນອກຈາກນັ້ນ, ສິ່ງທ້າທາຍອີກອັນໜຶ່ງແມ່ນ ມີຄວາມວິຕົກກັງວົນວ່າປະທານາທິບໍດີຄົນໃໝ່ຈະສືບຕໍ່ປະຕິຮູບຕ່າງໆ ໃນປັດຈຸບັນຫຼືບໍ່, ເຊິ່ງຖ້າຫາກປະທານາທິບໍດີຄົນໃໝ່ສາມາດສານມາດສານຕໍ່ການປະຕິຮູບດ້ານຕ່າງໆໄດ້ ກໍຈະສົ່ງເສີມເສດຖະກິດໃນໄລຍະຍາວໄດ້ ເເລະ ມີທ່າແຮງທີ່ຈະຊຸກຍູ້ອິນໂດເນເຊຍໃຫ້ກາຍເປັນປະເທດເສດຖະກິດໃຫຍ່ອັນດັບທີ 5 ຂອງໂລກໃນປີ 2050.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
