ໂຄງການສະໜັບສະໜູນການເຊື່ອມໂຍງລະດັບພາກພື້ນອາຊຽນ (ARISE) Plus Laos ໄດ້ສິ້ນສຸດລົງພາຍຫຼັງທີ່ໄດ້ດໍາເນີນການມາຕັ້ງແຕ່ປີ 2019 – 2023 ແລະ ໄດ້ປະສົບກັບຄວາມສໍາເລັດອັນໂດດເດັ່ນ, ອີກທັງເປັນການຊຸກຍູ້ການເຕີບໂຕທາງດ້ານເສດຖະກິດ.
ກະຊວງອຸດສາຫະກຳ ແລະ ການຄ້າ ແລະ ສູນການຄ້າສາກົນ (ITC) ໄດ້ສຳເລັດໂຄງການ ARISE ທີ່ໄດ້ຮັບທຶນຈາກສະຫະພາບຢູໂຣບຢ່າງເປັນທາງການ ທີ່ນະຄອນຫຼວງວຽງຈັນ ໃນວັນພະຫັດທີ 8 ເດືອນທັນວາ ປີ 2023.
ໂຄງການດັ່ງກ່າວໄດ້ພະຍາຍາມທີ່ຈະຊຸກຍູ້ການເຕີບໂຕດ້ານເສດຖະກິດໂດຍລວມ ແລະ ເພີ່ມຄວາມຢືດຢຸ່ນ ໃນການປ່ຽນແປງຂອງດິນຟ້າອາກາດ ແລະ ການສ້າງວຽກເຮັດງານທຳຢູ່ລາວ ໂດຍຜ່ານການລະດົມທຶນຂອງສະຫະພາບຢູໂຣບ.
ໂດຍໂຄງການ ARISE Plus Laos ມີ 3 ເປົ້າໝາຍຫຼັກໆຄື:
- ການເສີມສ້າງການເຊື່ອມໂຍງທາງເສດຖະກິດໃນພາກພື້ນ,
- ສົ່ງເສິີມຄວາມຮູ້ກ່ຽວກັບສິດຕ່າງໆທາງດ້ານການຄ້າ
- ການເສີມສ້າງການບໍລິການເພື່ອສະໜັບສະໜູນທຸລະກິດຂະໜາດນ້ອຍ ແລະ ທຸລະກິດຈຸລະພາກ.
ເຖິງແມ່ນວ່າໂຄງການດັ່ງກ່າວຈະປະສົບກັບຄວາມທ້າທາຍຈາກການແຜ່ລະບາດຂອງພະຍາດ Covid-19 ແລະ ຄວາມບໍ່ໝັ້ນຄົງທາງເສດຖະກິດມະຫາພາກຕະຫຼອດໄລຍະ 5 ປີໃນການດຳເນີນການ, ແຕ່ໂຄງການດັ່ງກ່າວກໍສາມາດບັນລຸຜົນສຳເລັດໄປດ້ວຍດີ.
ໂດຍໃນໂຄງການໄດ້ມີການເຜີຍແຜ່ ແລະ ປັບປຸງຄວາມຮູ້ຈາກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນໃນຫຼາຍວິຊາເຊັ່ນ: ການປູກກາເຟອິນຊີ, ການຄຸ້ມຄອງຄຸນະພາບ ແລະ ການຈັດຫາແຫຼ່ງຊັບພະຍາກອນທີ່ຍືນຍົງໃນຂະແໜງແປຮູບໄມ້.
ໂຄງການດັ່ງກ່າວຍັງໄດ້ເຜີຍແຜ່ແຜນງານການສົ່ງອອກ 2 ສະບັບສໍາລັບ 2 ພາກສ່ວນນີ້. ໂດຍໃຫ້ຂໍ້ມູນຢ່າງລະອຽດກ່ຽວກັບສະພາບການລະດັບໂລກ ແລະ ລະດັບປະເທດ, ໄຈ້ແຍກຄວາມທ້າທາຍຕ່າງໆ ແລະ ວາງແຜນດຳເນີນງານຢ່າງລະອຽດເພື່ອຄວາມສາມາດໃນການແຂ່ງຂັນການສົ່ງອອກ.
ນອກຈາກນັ້ນ, ໃນໂຄງການຍັງໄດ້ມີຜູ້ຊ່ຽວຊານ 10 ຄົນທີ່ສໍາເລັດການສຶກສາຈາກໂຄງການເພື່ອປະເມີນ, ເຝິກສອນ ແລະ ແນະນໍາບໍລິສັດໃນລາວເພື່ອປັບປຸງຄຸນະພາບຜະລິດຕະພັນ.
ໂດຍຫຼັກສູດທີ່ມີຄຸນະພາບນີ້ໄດ້ຖືກເປີດຕົວໃນລາວໃນຖານະຮ້ານຄ້າຄົບວົງຈອນເພື່ອລະບຸຂໍ້ກໍານົດຄວາມຕ້ອງການດ້ານຄຸນະພາບຂອງຕະຫຼາດສົ່ງອອກ, ພ້ອມກັບຄວາມຊຳນານຂອງສະຖາບັນ, ການບໍລິການ ແລະ ລາຍບຸກຄົນ ເພື່ອໃຫ້ໄດ້ຮັບຄວາມຮູ້ຈາກແນວທາງໃນການປະຕິບັດທີ່ດີທີ່ສຸດ.
ພວກເຂົາໄດ້ສຶກສາຄົ້ນຄວ້າ ແລະ ຊອກຫາຜົນກະທົບທີ່ຈະໄດ້ຮັບຫຼັງຈາກທີ່ຮຽນຈົບຫຼັກສູດ ແເລະ ກໍໄດ້ສະຫຼຸບວ່າ ປະເທດລາວຄວນຈະຕ້ອງໝຸນໃຊ້ກຳລັງໃນການສົ່ງເສີມການຄ້າເພື່ອຫຼີກເວັ້ນການສູນເສຍທ່າແຮງໃນການສົ່ງອອກ 7.3 ເປີເຊັນ.
ທ່ານ ດຣ ມາໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ກ່າວວ່າ
“ການຮ່ວມມືກັນລະຫວ່າງກະຊວງອຸດສາຫະກຳ ແລະ ການຄ້າຕໍ່ກັບສະຫະພາບຢູໂຣບ ແລະ ITC ໄດ້ມີມາຍາວນານເຖິງ 15 ປີ. ໂດຍຄວາມມານະພະຍາຍາມເຫຼົ່ານີ້ແມ່ນມີຄວາມກ່ຽວຂ້ອງຢ່າງສູງຕໍ່ຍຸດທະສາດແຫ່ງຊາດຂອງພວກເຮົາໃນການຫັນປ່ຽນເສດຖະກິດ ແລະ ສ້າງສາຄືນໃໝ່ຫຼັງຈາກການແຜ່ລະບາດຂອງ Covid-19, ເພື່ອທີ່ຈະຫຼຸດພົ້ນອອກຈາກສະຖານະປະເທດດ້ອຍພັດທະນາໃນປີ 2026, ຜ່ານການເລັ່ງລັດໃນການເຊື່ອມໂຍງດ້ານການຄ້າ, ກຳຈັດຄວາມທຸກຍາກ ແລະ ເພີ່ມທະວີຄວາມຈະເລີນຮຸ່ງເຮືອງຮ່ວມກັນ”
ທ່ານນາງ Ina Marčiulionytė ເອກອັກຄະລັດຖະທູດສະຫະພາບຢູໂຣບປະຈຳລາວ ກ່າວວ່າ:
“ສະຫະພາບຢູໂຣບ ແມ່ນຄູ່ຮ່ວມມືການຄ້າລາຍທີ 4 ຂອງລາວ ແລະ ຍັງຄົງມີການຊື້ຂາຍບໍ່ຫຼາຍເທົ່າໃດ ໂດຍມີເງິນໝຸນວຽນພຽງເລັກນ້ອຍຢູ່ທີ່ປະມານ 500 ລ້ານໂດລາສະຫະລັດຕໍ່ປີ, ແຕ່ຈາກການສຶກສາທີ່ຜ່ານມາ ປະເທດລາວໄດ້ສະແດງໃຫ້ເຫັນວ່າ ພວກເຂົາມີສັກກະຍະພາບທີ່ດີຂຶ້ນໃນການເພີ່ມລາຍການຊື້ຂາຍກັບພວກເຮົາ, ໂດຍສະເພາະແມ່ນໃນຂະແໜງການທີ່ມີສັກກະຍະພາບຄື: ກະສິກໍາພິເສດເຊັ່ນ ກາເຟ ແລະ ຊາ, ການແປຮູບໄມ້, ພາຍໃຕ້ໂຄງການ ARISE Plus”
ທ່ານນາງ Sylvie Betemps Cochin ຫົວໜ້າຫ້ອງການສູນກາງອາຊີ ແລະ ປາຊີຟິກ ກ່າວວ່າ
“ITC ມີຄວາມຕັ້ງໃຈທີ່ຈະຮ່ວມມືກັບລາວ ແລະ ສະຫະພາບຢູໂຣບໃນການຊອກຫາໂອກາດໃນການລິເລີ່ມໂຄງການໃໝ່ໆ, ເຊິ່ງມີຄວາມສອດຄ່ອງກັບຄວາມຢືດຢຸ່ນ ແລະ ສະພາແຫ່ງຊາດຊຸດທີ 9 ຂອງລັດຖະບານ ໃນແຜນພັດທະນາເສດຖະກິດ – ສັງຄົມສຳລັບປີ 2021 -2025 ທີ່ແນໃສ່ການພັດທະນາເສດຖະກິດສີຂຽວທີ່ເປັນມິດກັບສິ່ງແວດລ້ອມ ແລະ ມະນຸດ.”
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
