ເວລາເຮົາທີ່ເຮົາບໍ່ສະບາຍໃຈ ຫຼື ພົບເຈິແຕ່ເລື່ອງຄຽດໆມາ ຫຼາຍຄົນຈະມີວິທີຮັບມືກັບອາລົມໃນທາງລົບທີ່ແຕກຕ່າງກັນ ບໍ່ວ່າຈະເປັນການເບິ່ງຄລິບຕະຫຼົກ, ເບິ່ງຮູບເງົາ, ເບິ່ງຊີຣີ້, ອອກກຳລັງກາຍ ຫຼື ອອກໄປນອກ ແລະ ອື່ນໆ.
ແຕ່ສຳລັບບາງຄົນພຽງແຕ່ເບິ່ງຄລິບແມວ ຫຼື ຮູບແມວກັບເຮັດໃຫ້ຮູ້ສຶກຜ່ອນຄາຍ ແລະ ຮູ້ສຶກດີຂຶ້ນມາໃນທັນທີ. ເຊິ່ງນີ້ມັນບໍ່ໄດ້ແມ່ນພຽງແຕ່ເຮົາຄິດໄປເອງ ຫຼື ເປັນທາດແມວຢູ່ແລ້ວ ເພາະຜູ້ຊ່ຽວຊານຕ່າງໆກໍໄດ້ອອກມາຢືນຢັນ ແລະ ພິສູດວ່າການເບິ່ງຄລິບແມວນັ້ນສາມາດຊ່ວຍເຮົາໃຫ້ດີຂຶ້ນໄດ້ແທ້ໆ.
ອີງຂໍ້ມູນຈາກງານຄົ້ນຄວ້າໂດຍ Jessica Gall Myrick ອາຈານສອນຄະນະສື່ມວນຊົນທີ່ມະຫາວິທະຍາໄລ Indiana University Bloomington ໃນຫົວຂໍ້ທີ່ມີຊື່ວ່າ “ການຄວບຄຸມອາລົມ ແລະ ການເບິ່ງຄລິບວິດີໂອແມວອອນລາຍ: ໃຜເຄີຍເບິ່ງຮູບ ຫຼື ຄລິບແມວ? ເປັນຫຍັງເຈົ້າຕ້ອງເບິ່ງ? ແລະມີຜົນກະທົບແນວໃດ?” ທີ່ໄດ້ຖືກຕີພິມໃນວາລະສານທີ່ເອີ້ນວ່າ Computers in Human Behavior ທີ່ເວົ້າເຖິງພຶດຕິກໍາຂອງມະນຸດ ໃນການນໍາໃຊ້ຄອມພິວເຕີໃນປີ 2015.
ໂດຍພົບວ່າອາສາສະໝັກທີ່ເຂົ້າຮ່ວມໃນການສໍາຫຼວດເກືອບ 7,000 ຄົນ ຮູ້ສຶກວ່າມີພະລັງງານ ແລະ ມີຄວາມຄິດໃນທາງບວກຫຼາຍ, ອາລົມທາງລົບເຊັ່ນຄວາມກັງວົນ, ຄວາມລໍາຄານ ແລະ ຄວາມໂສກເສົ້າແມ່ນຫຼຸດລົງ ຫຼັງຈາກທີ່ເບິ່ງສື່ອອນລາຍກ່ຽວກັບແມວ.
ອາສາສະໝັກສ່ວນຫຼາຍນັ້ນມັກຈະເບິ່ງຄລິບ ຫຼື ຮູບພາບຕ່າງໆກ່ຽວກັບແມວໃນຕອນທີ່ພວກເຂົາເຮັດວຽກ ຫຼື ຕອນຮຽນ ເພາະມັນຈະເຮັດໃຫ້ພວກເຂົາຮູ້ສຶກຜ່ອນຄາຍ ແລະ ຮູ້ສຶກດີຂຶ້ນ. ເຊິ່ງຜູ້ຊ່ຽວຊານຈາກມະຫາວິທະຍາໄລ Oxford ໄດ້ໃຫ້ຄຳອະທິບາຍວ່າ: ແມວແມ່ນສັດທີ່ບໍ່ມີຄວາມສາມາດໃນການສະແດງອອກທາງສີໜ້າ ເຊິ່ງນີ້ໝາຍຄວາມວ່າເມື່ອພວກເຮົາເບິ່ງຮູບພາບຂອງແມວ ໃບໜ້າຂອງແມວຈະຄ້າຍຄືຜືນຜ້າໃບ ທີ່ມະນຸດເຮົາສາມາດຈິນຕະນາການເຖິງອາລົມ ແລະ ຄວາມຮູ້ສຶກຂອງພວກເຮົາໃສ່ລົງໄປໃຫ້ກາຍເປັນງານສິລະປະອອກມາໄດ້
ຫຼືຈະເວົ້າໃຫ້ເຂົ້າໃຈງ່າຍໆວ່າ ທຸກຄົນທີ່ເບິ່ງຮູບແມວກໍຈະມີຄວາມຮູ້ສຶກ ແລະ ຕີຄວາມໝາຍຈາກສີໜ້າຂອງມັນທີ່ແຕກຕ່າງກັນອອກໄປ. ເພາະສະນັ້ນ, ພວກເຮົາສາມາດເຫັນໄດ້ວ່າຮູບພຽງຮູບດຽວທີ່ເອົາມາປ່ຽນແຄັບຊັນ ກໍສາມາດປ່ຽນເລື່ອງລາວຂອງຮູບແມວນັ້ນໆໄດ້ອີກອາລົມໜຶ່ງເສີຍເລີຍ.
ເຊິ່ງນີ້ເຮັດໃຫ້ເວລາຫຼາຍໆຄົນເບິ່ງຮູບແມວ, ກໍອາດຈະເຮັດໃຫ້ພວກເຂົາບໍ່ຮູ້ສຶກເບື່ອ, ແຕ່ກັບມີຄວາມມ່ວນທີ່ໄດ້ຈິນຕະການເຖິງຄວາມຮູ້ສຶກຂອງໃບໜ້າຂອງມັນ ແລະ ມີຄວາມສຸກນັ້ນເອງ.
ດັ່ງນັ້ນ, ຖ້າຫາກເຮົາຮູ້ສຶກໄດ້ຮັບພະລັງງານລົບມາ ຫຼື ເມື່ອຍໃຈຈາກບັນຫາຕ່າງໆທີ່ເຂົ້າມາໃນຊີວິດປະຈຳວັນ ກໍສາມາດນອນຢູ່ເຮືອນ ເປີດພັດລົມເຢັນໆ ແລ້ວເບິ່ງຄລິບແມວທີ່ແສນຈະໜ້າຮັກທີ່ຈະຊ່ວຍເຮົາໃຫ້ຮູ້ສຶກດີ ແລະ ຜ່ອນຄາຍຂຶ້ນ. ເຊິ່ງຫຼັງຈາກທີ່ເບິ່ງຈົບແລ້ວ ບາງທີເຈົ້າອາດຈະເປັນອີກໜຶ່ງຄົນທີ່ຖືກແມວຕົກໄປເປັນທາດລາຍຕໍ່ໄປກໍເປັນໄປ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/