ໃນວັນສຸກທີ່ຜ່ານມາ, ສະມາຊິກສະພາຢູໂຣບ ແລະ ບັນດາປະເທດສະມາຊິກໄດ້ຕົກລົງທີ່ຈະຫ້າມການສົ່ງອອກຂີ້ເຫຍື້ອພລາສຕິກໄປຫາບັນດາປະເທດທີ່ບໍ່ແມ່ນກຸ່ມ OECD, ເຊິ່ງສ່ວນໃຫຍ່ແມ່ນປະເທດທີ່ຮັ່ງມີນັບຕັ້ງແຕ່ກາງປີ 2026 ເປັນຕົ້ນໄປ, ໂດຍຂໍ້ຕົກລົງດັ່ງກ່າວໄດ້ມີຂຶ້ນຢູ່ນະຄອນຫຼວງໄນໂຣບີ, ປະເທດເຄັນຢາ, ເພື່ອສ້າງສົນທິສັນຍາລະດັບໂລກກ່ຽວກັບມົນລະພິດຈາກພລາສຕິກ.
Pernille Weiss, ສະມາຊິກສະພາຢູໂຣບຂອງເດນມາກກ່າວວ່າ “ເປັນອີກຄັ້ງໜຶ່ງ ທີ່ພວກເຮົາກຳລັງປະຕິບັດຕາມວິໄສທັດຂອງພວກເຮົາທີ່ວ່າ: ຂີ້ເຫຍື້ອຈະແມ່ນຊັບພະຍາກອນກໍຕໍ່ເມື່ອເຮົາມີການຈັດການຢ່າງເໝາະສົມ ແລະ ບໍ່ສົ່ງຜົນເສຍຕໍ່ສະພາບແວດລ້ອມ ຫຼື ສຸຂະພາບຂອງມະນຸດບໍ່ວ່າຈະໃນກໍລະນີໃດກໍຕາມ”
ນອກນີ້, ການສົ່ງອອກຂີ້ເຫຍື້ອພລາສຕິກໄປຍັງ 38 ປະເທດໃນກຸ່ມ OECD (ອົງການຈັດຕັ້ງສາກົນທີ່ມີຈຸດປະສົງເພື່ອຊຸກຍູ້ການເຕີບໂຕເສດຖະກິດ ແລະ ການຄ້າຂອງໂລກ) ຈະຕ້ອງຢູ່ພາຍໃຕ້ເງື່ອນໄຂເຂັ້ມງວດຫຼາຍຂຶ້ນ. ນີ້ລວມເຖິງພັນທະທີ່ຈະໃຊ້ຂັ້ນຕອນການແຈ້ງບອກລ່ວງໜ້າ ແລະ ການຍິນຍອມເຫັນດີນຳ, ພ້ອມຍັງຕ້ອງໄດ້ມີການຕິດຕາມກວດກາການປະຕິບັດຕາມກົດລະບຽບຢ່າງໃກ້ຊິດ.
ໂດຍໃນຂໍ້ຕົກລົງດັ່ງກ່າວໄດ້ຖືກປະກາດໃນຂະນະທີ່ມີການເຈລະຈາໂດຍສະຫະປະຊາຊາດສຳລັບການປະຕິບັດເພື່ອແນໃສ່ການຫຼຸດຜ່ອນມົນລະພິດພລາສຕິກທີ່ເກີດຂຶ້ນໃນເຄັນຢາ.
ຫຼັງຈາກທີ່ໃຊ້ເວລາຫ້າປີຫຼັງຈາກການນໍາໃຊ້ກົດລະບຽບນີ້ ບັນດາປະເທດທີ່ບໍ່ແມ່ນສະມາຊິກ OECD ຈະສາມາດຮ້ອງຂໍອະນຸຍາດໃນນຳເຂົ້າຂີ້ເຫຍື້ອພລາສຕິກຈາກຄະນະກຳມະການສະພາຢູໂຣບ (EU Commission), ເຊິ່ງເປັນຝ່າຍອົງການບໍລິຫານຂອງກຸ່ມ ແລະ ຈະຖືກຍົກເລີກຄຳສັ່ງຫ້າມ ຖ້າພວກເຂົາພິສູດໄດ້ວ່າພວກເຂົາສາມາດເຮັດໄດ້ ແລະ ປະຕິບັດກັບຂີ້ເຫຍື້ອພລາສຕິກຢ່າງເໝາະສົມ.
ແລະເພື່ອໃຫ້ໝັ້ນໃຈວ່າຈະບໍ່ເຮັດຜິດຕາມກົດລະບຽບ, ຜູ້ເຈລະຈາຈະຕ້ອງຈັດຕັ້ງກຸ່ມຂຶ້ນເພື່ອປະສານການດຳເນີນງານຂອງປະເທດສະມາຊິກເພື່ອກວດກາ ແລະ ປ້ອງກັນໃນພາກສ່ວນນີ້.
“ການຫ້າມສົ່ງອອກຂີ້ເຫຍື້ອພລາສຕິກໄປຍັງປະເທດທີ່ບໍ່ແມ່ນສະມາຊິກ OECD ຖືເປັນການຕັດສິນໃຈທີ່ສຳຄັນ, ເຖິງຢ່າງໃດກໍຕາມ, ເປັນເລື່ອງໜ້າຜິດຫວັງທີ່ວ່າບໍ່ໄດ້ມີການຫ້າມສົ່ງອອກຢ່າງເດັດຂາດ ແລະ ບໍ່ມີການຫ້າມສົ່ງຂີ້ເຫຍື້ອພລາສຕິກທີ່ເປັນອັນຕະລາຍ ແລະ ຂີ້ເຫຍື້ອປະສົມໄປຍັງຕຸຣເຄຍ, ທີ່ເປັນທັງຜູ້ນໍາເຂົ້າຂີ້ເຫຍື້ອພາສຕິກທີ່ໃຫຍ່ທີ່ສຸດໃນສະຫະພາບຢູໂຣບ ແລະ ເປັນສະມາຊິກ OECD”
ໃນເມື່ອກ່ອນ, ພລາສຕິກສ່ວນໃຫຍ່ໃນຢູໂຣບໄດ້ຖືກເຜົາຖິ້ມ ແລະ ໜ້ອຍກວ່າ 1 ໃນ 3 ຖືກນໍາກັບມາໃຊ້ໃໝ່. ນັກເຄື່ອນໄຫວດ້ານສິ່ງແວດລ້ອມເຊື່ອວ່າມີພລາສຕິກບາງຊະນິດໄດ້ຖືກສົ່ງໄປຕ່າງປະເທດ, ໂດຍສະເພາະແມ່ນປະເທດທີ່ທຸກຍາກ ເຊິ່ງຈົບລົງດ້ວຍການຝັງກົບ ແລະ ຖືກປະຖິ້ມໄວ້ເປັນກອງ.
ອີງຕາມການລາຍງານຂອງສະຫະພາບຢູໂຣບ ການຜະລິດພລາສຕິກທົ່ວໂລກເພີ່ມຂຶ້ນຈາກ 1.5 ລ້ານໂຕນໃນປີ 1950 ເປັນ 359 ລ້ານໂຕນໃນປີ 2018 ແລະ ໃນຖານະທີ່ເປັນສ່ວນໜຶ່ງຂອງຂໍ້ຕົກລົງສີຂຽວ, 55% ຂອງຂີ້ເຫຍື້ອຫຸ້ມຫໍ່ພລາສຕິກຄວນຈະຖືກນໍາມາໃຊ້ຄືນໃນປີ 2030.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
