ອຳນາດການປົກຄອງນະຄອນຫຼວງວຽງຈັນ ຮຽກຮ້ອງໃຫ້ພາກເອກະຊົນ-ພາກລັດ ສົມທົບກັນຈັດຕັ້ງປະຕິບັດມາດຕະການຮີບດ່ວນ ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ການເງິນ ຕິດພັນກັບໄພເງິນເຟີ້, ອັດຕາແລກປ່ຽນທີ່ເພີ່ມຂຶ້ນ ແລະ ໜີ້ສິນຕ່າງປະເທດ.
ເມື່ອບໍ່ດົນມານີ້ ຕົວແທນຈາກພາກລັດ ແລະ ພາກທຸລະກິດ ນະຄອນຫຼວງວຽງຈັນ ໄດ້ພົບປະກັນທີ່ເຂດພັດທະນາ ວຽງຈັນໄຊເສດຖາ ເພື່ອປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບການຫາທາງແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ໂດຍການເປັນປະທານ ຂອງ ທ່າ ອາສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ.
ທ່ານ ດຣ ອາດສະພັງທອງ ກ່າວວ່າ: ຄວນມີການຮ່ວມມືຢ່າງແໜ້ນແຟ້ນລະຫວ່າງລັດຖະບານ ແລະ ພາກເອກະຊົນ ກ່ຽວກັບມາດຕະການ ແລະ ກົນໄກເພື່ອແກ້ໄຂບັນຫາດັ່ງກ່າວ ລວມທັງການສົ່ງເສີມສິນຄ້າພາຍໃນເພື່ອຂາຍ ແລະ ສົ່ງອອກ ແລະ ຫຼຸດຜ່ອນການນໍາເຂົ້າຈາກປະເທດເພື່ອນບ້ານ.
ປັດໄຈຫຼັກຂອງອັດຕາເງິນເຟີ້ແມ່ນຄວາມຕ້ອງການສູງ ທ່າມກາງຄວາມສາມາດໃນການສະໜອງທີ່ບໍ່ພຽງພໍ ເຊັ່ນ: ການຂາດຜະລິດຕະພັນພາຍໃນ ເຮັດໃຫ້ຕ້ອງມີການນໍາເຂົ້າເພື່ອຕອບສະໜອງຄວາມຕ້ອງການຂອງຕະຫຼາດ. ນອກນັ້ນ, ຍັງມີປັດໄຈຕ່າງໆເຊັ່ນ: ການຂາດແຄນເງິນຕາຕ່າງປະເທດເພື່ອສະໜອງໃຫ້ແກ່ຫົວໜ່ວຍທຸລະກິດທີ່ດໍາເນີນທຸລະກິດນໍາເຂົ້າ-ສົ່ງອອກ, ການຊໍາລະໜີ້ສິນ.
ທ່ານ ຄຳແພງ ໂພຄຳ ຫົວໜ້າສະຖາບັນວິທະຍາສາດສັງຄົມ ແລະ ເສດຖະກິດ ນະຄອນຫຼວງວຽງຈັນ ກ່າວຕໍ່ກອງປະຊຸມ ວ່າ ໃນໄລຍະປີ 2019-2023, ນະຄອນຫຼວງວຽງຈັນ ຕ້ອງຮັບມືກັບ 3 ວິກິດຄື: ການລະບາດຂອງພະຍາດໂຄວິດ-19, ອັດຕາເງິນເຟີ້ ແລະ ລາຄານໍ້າມັນແພງ. ບັນຫາດັ່ງກ່າວສົ່ງຜົນກະທົບຕໍ່ການເຕີບໂຕຂອງເສດຖະກິດ ແລະ ສົ່ງຜົນໃຫ້ເກີດບັນຫາສັງຄົມຢ່າງຮ້າຍແຮງ.
ບັນຫາເຫຼົ່ານີ້ສົ່ງຜົນກະທົບຕໍ່ການລົງທຶນຂອງພາກລັດ ແລະ ເອກະຊົນ, ການຜະລິດກະສິກຳ, ການບໍລິຫານຂອງລັດຖະບານ, ແລະ ຄ່າໃຊ້ຈ່າຍປະຈໍາວັນຂອງຄົວເຮືອນ.
ທ່ານ ຄຳແພງ ຍັງກ່າວຕໍ່ອີກວ່າ ປະຊາຊົນຍັງປະເຊີນກັບບັນຫາທາງສັງຄົມເຊັ່ນ: ຄວາມສາມາດໃນການຈ່າຍຄ່າຮຽນຂອງລູກຫຼານ ໄດ້ຫຼຸດລົງ, ໃນຂະນະທີ່ສະຖາບັນການສຶກສາ ແລະ ໂຮງຮຽນວິຊາຊີບບໍ່ມີນັກຮຽນຍ້ອນວ່າພວກເຂົາບໍ່ສາມາດຈ່າຍຄ່າຮຽນໄດ້.
ສະຖາບັນວິທະຍາສາດສັງຄົມ ແລະ ເສດຖະກິດ ນະຄອນຫຼວງວຽງຈັນ ໃຫ້ຮູ້ວ່າ: ໄພເງິນເຟີ້ ແລະ ຄວາມຫຍຸ້ງຍາກທາງດ້ານເສດຖະກິດ-ສັງຄົມ ສາມາດແກ້ໄຂໄດ້ໂດຍການແກ້ໄຂຈາກຈິດສຳນຶກ ແລະ ຄວາມເຊື່ອໝັ້ນຂອງປະຊາຊົນ, ການເກັບຄ່າຊົມໃຊ້ໃຫ້ສູງຂຶ້ນສຳລັບ ສິນຄ້າຕ່າງປະເທດ, ການນຳໃຊ້ຜະລິດຕະພັນພາຍໃນ ແລະ ການບໍລິການເພີ່ມຂຶ້ນ, ສົ່ງເສີມການທ່ອງທ່ຽວເພື່ອດຶງດູດນັກທ່ອງທ່ຽວໃຫ້ຫຼາຍຂຶ້ນ.
ອຳນາດການປົກຄອງຄວນຊຸກຍູ້ການຜະລິດສິນຄ້າພາຍໃນປະເທດເຊັ່ນ: ປາ, ປາແຫ້ງ, ນ້ຳຖົ່ວເຫຼືອງ, ແປ້ງນົວ, ນ້ຳຕານ ເພື່ອຕອບສະໜອງຄວາມຕ້ອງການປະຈຳວັນ, ເພີ່ມທະວີການຜະລິດກະສິກຳ, ຫຼຸດຜ່ອນຕົ້ນທຶນໃນອຸດສາຫະກຳທີ່ເຮັດການຜະລິດພາຍໃນປະເທດ.
ລັດຖະບານຄວນມີນະໂຍບາຍຫຼຸດຕົ້ນທຶນໄຟຟ້າໃຫ້ແກ່ຄົວເຮືອນ, ຊົນລະປະທານ ແລະ ກະສິກຳ ເພື່ອຫຼຸດຕົ້ນທຶນການຜະລິດ ແລະ ຊ່ວຍເຫຼືອປະຊາຊົນຮັບມືກັບບັນຫາເສດຖະກິດ.
ຄວນຫຼຸດລາຍຈ່າຍໃນຂະນະຈັດງານລ້ຽງ, ງານແຕ່ງດອງ, ງານສັງສັນ ແລະ ງານສົບຂະໜາດໃຫຍ່ທີ່ເສຍເງິນ, ປະຊາຊົນຄວນຫຼຸດການໃຊ້ຈ່າຍໃນສິນຄ້າຟຸ່ມເຟືອຍເຊັ່ນ: ລົດ, ເຫຼົ້າ ແລະ ຢາສູບ ເພື່ອຫຼຸດໜີ້ສາທາລະນະ. ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນ ຄວນລົງທຶນໃສ່ແຕ່ສິ່ງຂອງທີ່ຈຳເປັນຢ່າງແທ້ຈິງຕໍ່ຊີວິດຂອງຕົນ.
ຊາວນະຄອນຫຼວງວຽງຈັນ ແລະ ປະຊາຊົນໃນທົ່ວປະເທດຕ້ອງນຳໃຊ້ເງິນກີບໃນການແລກປ່ຽນສິນຄ້າ, ຊື້-ຂາຍສິ່ງມີຄ່າ, ຄ້າຂາຍສິນຄ້າ.
ອຳນາດການປົກຄອງຄວນຫຼຸດພາສີບັນດາຜະລິດຕະພັນທີ່ສົ່ງອອກ ແລະ ການລົງທຶນພາຍໃນປະເທດ ແລະ ເພີ່ມທະວີການເກັບພາສີລາຍຮັບ ເພື່ອຫຼຸດຜ່ອນການໃຊ້ຈ່າຍຢ່າງສິ້ນເປືອງ. ຄວນມີນະໂຍບາຍການເງິນຢ່າງເຂັ້ມງວດ ເພື່ອຫຼຸດຜ່ອນການຂາດດຸນ ແລະ ຄວນນຳເຂົ້າແຕ່ສິ່ງທີ່ຈຳເປັນ.
ທັງນີ້ກໍຄວນເອົາໃຈໃສ່ຍົກສູງຖານະການເງິນຂອງນະຄອນຫຼວງ ແລະ ຊາວນະຄອນຫຼວງວຽງຈັນ ຕ້ອງໄດ້ປະຕິບັດຕາມກົດໝາຍສະເພາະຂອງນະຄອນຫຼວງວຽງຈັນ ເຊັ່ນ: ປະຕິບັດພັນທະໃນການຈ່າຍຄ່າບໍລິການເມືອງ.
ນອກຈາກນີ້ ໃນກອງປະຊຸມ, ຜູ້ເຂົ້າຮ່ວມຍັງໄດ້ປຶກສາຫາລືກ່ຽວກັບຫົວຂໍ້ຕ່າງໆເຊັ່ນ: ນະໂຍບາຍສິນເຊື່ອເພື່ອຊຸກຍູ້ເສດຖະກິດ, ການສົ່ງເສີມການລົງທຶນ ແລະ ແຜນການດຶງດູດນັກທ່ອງທ່ຽວໃຫ້ຫຼາຍຂຶ້ນ.
ຕິດຕາມຂ່າວທັງໝົດຈາກ LaoX: https://laox.la/all-posts/