ອີງຈາກສະຖິຕິຂອງກົມພາສີ ຫວຽດນາມ ພົບວ່າ ຫວຽດນາມຍັງເປັນຜູ້ສົ່ງອອກເກີບລາຍໃຫຍ່ທີ່ສຸດເປັນອັນດັບ 2 ຂອງໂລກ ຮອງຈາກຈີນ ເມື່ອເດືອນກຸມພາທີ່ຜ່ານມາ ດ້ວຍມູນຄ່າການຊື້ຂາຍກວ່າ 1,170 ລ້ານໂດລາ.
ໂດຍການຜະລິດເກີບຂອງຫວຽດນາມນັ້ນ ຖືກສົ່ງອອກໄປຫຼາຍກວ່າ 150 ປະເທດທົ່ວໂລກ ທຽບເທົ່າກັບ 10% ຂອງຕະຫຼາດໂລກ, ໂດຍ 2 ເດືອນຕົ້ນປີ 2024 ສສ.ຫວຽດນາມ ສົ່ງອອກເກີບໄປຕ່າງປະເທດແລ້ວ ມູນຄ່າລວມກວ່າ 3,100 ລ້ານໂດລາ.
ໂດຍຕະຫຼາດຫຼັກທີ່ຫວຽດນາມສົ່ງອອກເກີບໄປຫຼາຍກວ່າໝູ່ແມ່ນ ເມຣິກາ ເຊິ່ງມີມູນຄ່າການຊື້ຂາຍເຖິງ 1,100 ລ້ານໂດລາ ເພີ່ມຂຶ້ນ 25% ເມື່ອທຽບປີຕໍ່ປີ ຄິດເປັນຈຳນວນຫຼາຍກວ່າ 1/3 ຂອງການສົ່ງອອກເກີບທັງໝົດ ຂອງຫວຽດນາມ.
ຂະນະທີ່ ຈີນເປັນຜູ້ນຳເຂົ້າເກີບຈາກຫວຽດນາມ ເປັນອັນດັບ 2 ດ້ວຍມູນຄ່າກວ່າ 318 ລ້ານໂດລາ ເພີ່ມຂຶ້ນ 11,4% ເມື່ອທຽບປີຕໍ່ປີ ຮອງລົງມາແມ່ນ ເບວຢຽມ 191 ລ້ານໂດລາ.
ຢ່າງໃດກໍຕາມ, ອີງຕາມຍຸດທະສາດພັດທະນາອຸດສາຫະກຳແຜ່ນແພ, ໜັງ ແລະ ເກີບໜັງຂອງຫວຽດນາມຮອດປີ 2030, ຫວຽດນາມ ໃຫ້ຄຳໝັ້ນສັນຍາຈະສ້າງວົງເງິນສົ່ງອອກເກີບເຖິງ 27-28 ຕື້ໂດລາ ໃນປີ 2025 ແລະ 38 – 39 ຕື້ USD ໃນປີ 2030.
ຕິດຕາມຂ່າວທັງໝົດຈາກ LaoX: https://laox.la/all-posts/
