ການລົງທຶນລະຫວ່າງປະເທດຫວຽດນາມ ແລະ ປະເທດລາວ ແມ່ນມີມາຕັ້ງແຕ່ດົນນານແລ້ວ ພ້ອມທັງມີປະຫວັດສາດທີ່ດີຕໍ່ກັນ ຄຳເວົ້າທີ່ຕິດປາກປະຊາຊົນທັງລາວ ແລະ ຫວຽດນາມ “ອ້າຍນ້ອງລາວ-ຫວຽດນາມ”. ຜ່ານມາຫວຽດນາມ ໄດ້ລົງທຶນຫຼາຍໂຄງການຢູ່ລາວ ພິເສດແມ່ນ ສົ່ງເສີມດ້ານການສຶກສາ, ເສດຖະກິດ ແລະ ອື່ນໆ.
ການລົງນາມໃນສົນທິສັນຍາມິດຕະພາບ ແລະ ຄວາມຮ່ວມມືລະຫວ່າງຫວຽດນາມ-ລາວ ມິດຕະພາບໃນອະດີດຈົນຮອດປັດຈຸບັນ ສະທ້ອນໃຫ້ເຫັນວ່າທັງສອງປະເທດມີຄວາມສຳພັນທີ່ຮັດແໜ້ນຫຼາຍຂຶ້ນນັບມື້ ໂດຍສະເພາະດ້ານເສດຖະກິດ. ຄວາມສຳພັນລະຫວ່າງການຄ້າແມ່ນເພີ່ມຂຶ້ນໃນລະຫວ່າງສອງປະເທດ.
ຄວາມສຳພັນການຄ້າລະຫວ່າງສອງປະເທດລາວ-ຫວຽດນາມ ໃນປີ 2022 ມີມູນຄ່າການຄ້າປະມານ 1,7 ພັນລ້ານໂດລາສະຫະລັດ ເພີ່ມຂຶ້ນ 24% ຈາກປີ 2021 ໃນຂະນະທີ່ການສົ່ງອອກຈາກຫວຽດນາມມາຍັງ ສປປ ລາວ ເຕີບໂຕຂຶ້ນຢ່າງສົມດຸນມູນຄ່າສູງເຖິງ 656 ລ້ານໂດລາສະຫະລັດ ເພີ່ມຂຶ້ນ 10,4% ສ່ວນການນຳເຂົ້າກໍເພີ່ມຂຶ້ນ 34,6% ເປັນ 1,047 ພັນລ້ານໂດລາສະຫະລັດ.
ການລົງທຶນໂດຍກົງລະຫວ່າງປະເທດຂອງ ສປປ ລາວ ແລະ ຫວຽດນາມ ສໍາລັບການລົງທຶນໂດຍກົງຈາກຕ່າງປະເທດ (FDI) ຂອງຫວຽດນາມໃນນາມ ສປປ ລາວ ມີມູນຄ່າສູງກວ່າ 5,34 ພັນລ້ານໂດລາສະຫະລັດ ໃນ 239 ໂຄງການ ແລະ ລາວ ຍັງເປັນປະເທດອັນດັບ 1 ຈາກ 78 ປະເທດ ທີ່ຫວຽດນາມເຂົ້າໄປລົງທຶນ ໂດຍໃນໄລຍະ 5 ປີທີ່ຜ່ານມາ ຜູ້ປະກອບການຫວຽດນາມ ໄດ້ຊຳລະພາສີ ແລະ ພາລະຜູກພັນທາງການຄັງອື່ນໆ ໃຫ້ແກ່ ສປປ ລາວ ປະມານ 200 ລ້ານໂດລາສະຫະລັດຕໍ່ປີ.
ສ່ວນ ສປປ ລາວ ກໍມີການລົງທຶນ (FDI) 10 ໂຄງການຢູ່ໃນປະເທດຫວຽດນາມ ໂດຍການລົງທຶນຈົດທະບຽນລວມມູນຄ່າ 71 ລ້ານໂດລາສະຫະລັດ ເຊິ່ງຫວຽດນາມມັກຈະຕິດ 1 ໃນ 3 ປະເທດທຳອິດທີ່ມີຍອດເງິນລົງທຶນໂດຍກົງໃນຕ່າງປະເທດສູງສຸດຂອງ ສປປ ລາວ. ການຄ້າລາວ-ຫວຽດນາມ ຜ່ານມາຈະມີຜົນປະໂຫຍດໃຫ້ແກ່ກັນລວມທັງການນຳເຂົ້າ ແລະ ການສົ່ງອອກ.
ການເຕີບໂຕດ້ານການຄ້າສະທ້ອນໃຫ້ເຫັນເຖິງການສົ່ງເສີມດ້ານການຂ້າມພົມແດນລະຫວ່າງ 2 ປະເທດ ປະກອບກັບຫວຽດນາມ ແລະ ສປປ ລາວ ໄດ້ຮ່ວມກັນຈັດການປະຊຸມ ເພື່ອເຊື່ອມທຸລະກິດຫວຽດນາມກັບລາວ ໃນດ້ານສິນຄ້າກະເສດ ອາຫານ ແລະ ສິນຄ້າອຸປະໂພກ-ບໍລິໂພກ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
