ລັດຖະບານແຫ່ງ ສປປ ລາວ, ກະຊວງອຸດສາຫະກຳ ແລະ ການຄ້າ, ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ລົງນາມສັນຍາການຄ້າສະບັບໃໝ່ ພ້ອມຫາລືຫຼາຍບັນຫາ ຊຸກຍູ້ການຄ້າ 2 ສົ້ນ ໃຫ້ຂະຫຍາຍຕົວ 10-15% ຕໍ່ປີ.
ພິທີລົງນາມດັ່ງກ່າວ ມີຂຶ້ນເມື່ອບໍ່ດົນມານີ້ ທີ່ໂຮງແຮມ ເມືອງແທັງ, ນະຄອນຫຼວງວຽງຈັນ ໂດຍໃຫ້ກຽດລົງນາມໂດຍ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ແລະ ທ່ານ ຫງວຽນ ຫົ່ງ ຢຽນ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ. ພ້ອມມີບັນດາກົມກອງ ທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.
ພາຍໃຕ້ສັນຍາສະບັບດັ່ງກ່າວ ສອງກະຊວງອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ ໄດ້ປຶກສາຫາລືກ່ຽວກັບການຈັດຕັ້ງຜັນຂະຫຍາຍ ເພື່ອບັນລຸເປົ້າໝາຍການເພີ່ມມູນຄ່າການຄ້າສອງຝ່າຍ ໃຫ້ບັນລຸ 10-15% ຕໍ່ປີ ທີ່ລັດຖະບານສອງປະເທດໄດ້ກຳນົດ ໃນນັ້ນ ເນັ້ນໃສ່ບັນດາກຸ່ມວຽກທີ່ເປັນບູລິມະສິດ ເປັນຕົ້ນ ວຽກງານການເຈລະຈາສັນຍາການຄ້າ, ການຄ້າຕ່າງປະເທດ, ການສົ່ງເສີມການຄ້າ ແລະ ການຜະລິດ ເພື່ອສົ່ງອອກ ພ້ອມທັງ ການອຳນວຍຄວາມສະດວກທາງດ້ານການຄ້າ, ການພົບປະ ແລະ ແລກປ່ຽນທັງພາກລັດ-ພາກທຸລະກິດ ແລະ ບັນດາແຜນງານຕ່າງໆ ເພື່ອໃຫ້ບັນລຸເປົ້າໝາຍທີ່ໄດ້ກຳນົດໄວ້.
ອີງຕາມການລາຍງານຂອງ ສຳນັກຂ່າວສານຫວຽດນາມ ໃນ 3 ເດືອນຕົ້ນປີນີ້, ການຄ້າສອງສົ້ນລະຫວ່າງຫວຽດນາມ ແລະ ລາວ ບັນລຸ 417,8 ລ້ານໂດລາສະຫະລັດ, ຫຼຸດລົງ 1,8% ທຽບກັບໄລຍະດຽວກັນ 2023. ຫວຽດນາມ ສົ່ງອອກຜະລິດຕະພັນນ້ຳມັນ, ເຫຼັກກ້າ, ກົນຈັກ ແລະ ອຸປະກອນມາໃຫ້ລາວ ແລະ ລາວແມ່ນສົ່ງ ຢາງພາລາ, ໄມ້, ແຮ່ເຫຼັກ ແລະ ແຮ່ທາດຕ່າງໆໄປໃຫ້ຫວຽດນາມ.
ສັນຍາສະບັບດັ່ງກ່າວ ໄດ້ມີການປັບປຸງຂໍ້ຕົກລົງຮ່າໂນ້ຍ 2007 ວ່າດ້ວຍການສ້າງເງື່ອນໄຂຄົນ, ພາຫະນະ ແລະ ສິນຄ້າຜ່ານແດນ ເພື່ອໃຫ້ສາມາດຮອງຮັບສະພາບການປ່ຽນແປງໃໝ່ ແລະ ທັນກັບສະພາບຄວາມເປັນຈິງ ໃນການເຄື່ອນໄຫວວຽກງານຂອງ ຂະແໜງ ອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ. ນອກນີ້ຍັງໄດ້ ປຶກສາຫາລືກ່ຽວກັບ ການຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈກ່ຽວກັບການຄ້າຊາຍແດນ ແລະ ພື້ນຖານໂຄງລ່າງການຄ້າຊາຍແດນ ລາວ-ຫວຽດນາມ ແລະ ບົດບັນທຶກກ່ຽວກັບການຕ້ານ ແລະ ສະກັດກັ້ນການຄ້າຂາຍນອກລະບົບ (ຄ້າຂາຍເຖື່ອນ) ຕາມຊາຍແດນ.
ໄດ້ປຶກສາຫາລື ກ່ຽວກັບການຄົ້ນຄວ້າເພື່ອກຳນົດຈຸດ ແລະ ສ້າງສາງນໍ້າມັນທີ່ເໝາະສົມ ຢູ່ ສປປ ລາວ ເພື່ອຮອງຮັບການນຳເຂົ້ານ້ຳມັນຈາກ ສສ ຫວຽດນາມ ເນື່ອງຈາກປະລິມານການນຳເຂົ້າໃນໄລຍະຜ່ານມາ ປະມານ 150-160 ລ້ານລິດ/ເດືອນ ຫຼື ມີມູນຄ່າປະມານ 1,5-1,6 ຕື້ ໂດລາ/ປີ, ແຕ່ການນຳເຂົ້າຈາກ ສສ ຫວຽດນາມ ມີພຽງແຕ່ 10% ເທົ່ານັ້ນ. ຖ້າການນຳເຂົ້ານໍ້າມັນເຊື້ອໄຟຈາກ ສສ ຫວຽດນາມ ຂອງ ສປປ ລາວ ເພີ້ມຂື້ນ ກໍ່ຈະສົ່ງຜົນໃຫ້ມູນຄ່າການຄ້າ ສອງຝ່າຍເພີ່ມຂຶ້ນ ໃນຕໍ່ໜ້າ.
ນອກນີ້ ໂອກາດດັ່ງກ່າວ 2 ຝ່າຍຍັງໄດ້ໄດ້ປຶກສາຫາລື ກ່ຽວກັບການຮ່ວມມື ແລະ ພັດທະນາວຽກງານການຄ້າ ເອເລັກໂຕຣນິກ ເຊິ່ງເປັນວຽກງານທີ່ສຳຄັນໃນຍຸກເສດຖະກິດ ດິຈິຕອນ ເຊິ່ງເຫັນໄດ້ວ່າ ວຽກງານດັ່ງກ່າວແມ່ນສາມາດປະກອບສ່ວນປະມານ 25% ຂອງ ມູນຄ່າການຄ້າ ຫຼື ມີມູນຄ່າປະມານ 18 ຕື້ ໂດລາ ຢູ່ ສສ ຫວຽດນາມ ໃນປີ 2023 ແລະ ຄາດວ່າ ປີ 2025 ຈະສາມາດບັນລຸໄດ້ 20 ຕື້ໂດລາ.
ກອງປະຊຸມໄດ້ເຫັນດີ ສະເໜີໃຫ້ມີການສ້າງຕັ້ງຄະນະເຮັດວຽກ, ຄະນະສະເພາະກິດ ແລະ ຄະນະປະສານງານຮ່ວມກັນ ລະຫວ່າງກະຊວງອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ ເພື່ອຜັນຂະຫຍາຍໃນລວງເລິກ ໃນການຈັດຕັ້ງປະຕິບັດບັນດາສັນຍາ, ບົດບັນທຶກຄວາມເຂົ້າໃນ, ແຜນງານ ແລະ ກິດຈະກຳການຮ່ວມມື ໃຫ້ເປັນຮູບປະທຳ ແລະ ຮັບປະກັນເຖິງໝາກຜົນສຳເລັດ ໃນການຈັດຕັ້ງປະຕິບັດວຽກງານເຫຼົ້ານັ້ນ.
ກອງປະຊຸມໄດ້ເຫັນດີ ເພື່ອຊຸກຍູ້ໃຫ້ມີການເພື່ອເຜີຍແຜ່ບັນດາເນື້ອໃນຈິດໃຈຂອງສັນຍາການຄ້າ, ບົດບັນທຶກຄວາມເຂົ້າໃຈ ແລະ ນິຕິກຳອື່ນໆ ໃຫ້ບັນດາພາກລັດທັງສູນກາງ-ທ້ອງຖິ່ນ ແລະ ພາກທຸລິດ ເພື່ອໝູນໃຊ້ບັນດານິຕິກຳດັ່ງກ່າວໃຫ້ເກີດປະໂຫຍດສູງສຸດ ໃຫ້ແກ່ ລາວ ແລະ ຫວຽດນາມ.
ຂໍ້ມູນ: ກະຊວງອຸດສາຫະກຳ ແລະ ການຄ້າ
ຕິດຕາມຂ່າວທັງໝົດຈາກ LaoX: https://laox.la/all-posts/
