ໃນວັນອັງຄານທີ່ຜ່ານມາ, ລາຄາຂອງນ້ຳມັນໄດ້ປີດການຊື້ຂາຍໃນໄລຍະຕົ້ນຂອງປີ 2024 ໄດ້ບໍ່ຄ່ອຍດີເທົ່າໃດ, ເນື່ອງຈາກຄວາມຄາດຫວັງໃນການປັບຫຼຸດອັດຕາດອກເບ້ຍລົງ ແລະ ຄວາມກັງວົນທີ່ທະວີຄວາມຮຸນແຮງຂຶ້ນຢູ່ທະເລແດງທີ່ອາດຈະສົ່ງຜົນກະທົບຕໍ່ການສະໜອງ.
ລາຄານ້ຳມັນດິບ West Texas Intermediate (WTI) ສໍາລັບການຈັດສົ່ງມອບໃນເດືອນກຸມພາຫຼຸດລົງ 1.27 ໂດລາ, ໂດຍປິດທີ່ 70.38 ໂດລາ/ບາເຣວ. ໃນສ່ວນຂອງນ້ຳມັນດິບ Brent ງວດສຳລັບການຈັດສົ່ງມອບໃນເດືອນມີນາຫຼຸດລົງ 1.15 ໂດລາ, ໂດຍປິດຢູ່ທີ່ 75.89 ໂດລາ/ບາເຣວ.
ສາເຫດທີ່ລາຄາຂອງນ້ຳມັນຫຼຸດລົງແມ່ນເກີດຈາກຄວາມຄາດຫວັງທີ່ຫຼຸດລົງຂອງນັກລົງທຶນກ່ຽວກັບການປັບຫຼຸດອັດຕາດອກເບ້ຍໃນປີ 2024, ໂດຍອັດຕາດອກເບ້ຍທີ່ຫຼຸດລົງຈະຊ່ວຍຫຼຸດຜ່ອນຕົ້ນທຶນໃນການກູ້ຍືມຂອງຜູ້ບໍລິໂພກ ເຊິ່ງນີ້ສາມາດກະຕຸ້ນການເຕີບໂຕທາງດ້ານເສດຖະກິດ ແລະ ຄວາມຕ້ອງການຂອງນ້ຳມັນໄດ້.
ສະກຸນເງິນໂດລາໄດ້ມີການແຂງຄ່າຂຶ້ນໃນວັນອັງຄານທີ່ຜ່ານມາ, ໃນຂະນະທີ່ລາຄາຂອງຮຸ້ນກັບຫຼຸດລົງ ສົ່ງຜົນໃຫ້ລາຄາຂອງນ້ຳມັນປັບຕົວລົງຕາມ. ເງິນໂດລາທີ່ແຂງຄ່າຂຶ້ນນັ້ນເຮັດໃຫ້ລາຄານ້ຳມັນແພງຂຶ້ນສຳລັບນັກລົງທຶນທີ່ຖືຄອງສະກຸນເງິນອື່ນໆ
ໃນໄລຍະທຳອິດລາຄາຂອງນ້ຳມັນ WTI ໄດ້ເພີ່ມຂຶ້ນຫຼາຍກວ່າ 2% ຫຼື ເໜືອລະດັບ 73 ໂດລາ, ຫຼັງຈາກທີ່ສື່ສຳນັກຂ່າວລາຍງານວ່າ ອີຣານໄດ້ສົ່ງເຮືອຮົບ Alborz ເຂົ້າສູ່ທະເລແດງ ເຊິ່ງນີ້ຈະເພີ່ມຄວາມເຄັ່ງຕຶງໃນພູມີພາກ.
ທັງນີ້, ອີຣານໄດ້ສົ່ງເຮືອຮົບ Alborz ເຂົ້າໄປໃນທະເລແດງ, ຫຼັງຈາກກອງທັບເຮືອອາເມຣິກາໄດ້ທຳລາຍເຮືອ 3 ລຳຂອງພວກກະບົດ Houthi ເຊິ່ງແມ່ນກຸ່ມປະກອບອາວຸດທີ່ໄດ້ຮັບການສະໜັບສະໜູນຈາກອີຣານ, ໂດຍການເຄື່ອນໄຫວຂອງອີຣານແມ່ນມີທ່າອ່ຽງທີ່ຈະເຮັດໃຫ້ສະຖານະການຢູ່ທະເລແດງເພີ່ມທະວີຮຸນແຮງຂຶ້ນ ແລະ ອາດເຮັດໃຫ້ການເຄື່ອນໄຫວປ້ອງກັນທະເລແດງຂອງກອງທັບເຮືອອາເມລຣິກາມີຄວາມຫຍຸ້ງຍາກຂຶ້ນຕື່ມ.
ບໍລິສັດ Maersk (MAERSKb.CO) ຂອງເດນມາກ ແລະ Hapag-Lloyd (HLAG.DE) ຂອງເຢຍລະມັນກ່າວວ່າ “ເຮືອຂົນສົ່ງນ້ຳມັນຂອງພວກເຂົາຈະຫຼີກເວັ້ນການໃຊ້ເສັ້ນທາງທະເລແດງທີ່ໃຫ້ການເຂົ້າເຖິງຄອງ Suez”
ຄວາມຂັດແຍ້ງໃນຄັ້ງນີ້ອາດສົ່ງຜົນເປັນວົງກວ້າງ ແລະ ອາດຈະປິດເສັ້ນທາງນ້ຳທີ່ສຳຄັນໃນການຂົນສົ່ງນ້ຳມັນ. ອີງຈາກການສຳຫຼວດຂອງນັກວິເຄາະ ແລະ ຜູ້ຊ່ຽວຊານໄດ້ຄາດການວ່າ: ລາຄານ້ໍາມັນດິບ Brent ຈະຢູ່ທີ່ 82.56 ໂດລາ/ບາເຣວໃນປີນີ້, ເຊິ່ງເພີ່ມຂຶ້ນເລັກນ້ອຍຈາກຄ່າສະເລ່ຍໃນປີ 2023 ທີ່ 82.17 ໂດລາ. ການເຕີບໂຕໃນທົ່ວໂລກທີ່ອ່ອນແອອາດຈະເຮັດໃຫ້ຄວາມຕ້ອງການໃນນ້ຳມັນຈຳກັດ, ແນວໃດກໍຕາມຄວາມເຄັ່ງຕຶງທາງດ້ານພູມສາດສາມາດສະໜັບສະໜູນລາຄາຂອງນ້ຳມັນເພີ່ມຂຶ້ນຕື່ມໄດ້.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/