ໃນກອງປະຊຸມລັດຖະບານປະຈຳເດືອນເມສາ 2026 ໄດ້ພິຈາລະນາຮ່າງດຳລັດວ່າດ້ວຍກອງທຶນກັນ ແລະ ຄວບຄຸມເຊື້ອພະຍາດເອດ (HIV) ເພື່ອຮັບປະກັນແຫຼ່ງທຶນພາຍໃນທີ່ຍືນຍົງສຳລັບວຽກງານປິ່ນປົວ ແລະ ປ້ອງກັນ.
ໂດຍກອງປະຊຸມດັງກ່າວຈັດຂຶ້ນໃນວັນທີ 27 ເມສາ 2026 ທີ່ສຳນັກງານນາຍົກລັດຖະມົນຕີ. ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປ ລາວ. ທີ່ປະຊຸມໄດ້ປຶກສາຫາລືການຮັບມືກັບສະພາບການພາກພື້ນ ແລະ ສາກົນທີ່ສືບຕໍ່ເຄັ່ງຮ້ອນ ໂດຍສະເພາະຂໍ້ຂັດແຍ່ງໃນເຂດຕາເວັນອອກກາງ. ບັນຫາດັ່ງກ່າວໄດ້ສົ່ງຜົນກະທົບໂດຍກົງຕໍ່ລາຄາສິນຄ້າ ແລະ ການຂົນສົ່ງໃນປະເທດ, ລັດຖະບານຈຶ່ງເລັ່ງຄົ້ນຄວ້າມາດຕະການແກ້ໄຂອັດຕາແລກປ່ຽນ ແລະ ຄວບຄຸມເງິນເຟີ້ ເພື່ອຫຼຸດຜ່ອນຜົນກະທົບຕໍ່ຊີວິດການເປັນຢູ່ຂອງປະຊາຊົນ.
ສຳລັບວຽກງານນິຕິກຳ ແລະ ສາທາລະນະສຸກ, ກອງປະຊຸມໄດ້ພິຈາລະນາຮ່າງດຳລັດວ່າດ້ວຍການຖອນສິດນຳໃຊ້ທີ່ດິນ ແລະ ຮ່າງດຳລັດວ່າດ້ວຍກອງທຶນກັນ ແລະ ຄວບຄຸມເຊື້ອ HIV . ການສ້າງຕັ້ງກອງທຶນນີ້ຈະເປັນຈຸດປ່ຽນສຳຄັນ ທີ່ຊ່ວຍຫຼຸດຜ່ອນການເພິ່ງພາທຶນຈາກຕ່າງປະເທດ.
ປັດຈຸບັນ, ການສະໜອງທຶນເຂົ້າໃນວຽກງານຕ້ານພະຍາດເອດໃນ ສປປ ລາວ ສ່ວນໃຫຍ່ຍັງອີງໃສ່ການຊ່ວຍເຫຼືອລ້າຈາກສາກົນ ເຊັ່ນ: ກອງທຶນໂລກ (Global Fund). ການມີກອງທຶນພາຍໃນປະເທດຈະຊ່ວຍໃຫ້ລາວສາມາດເພິ່ງພາຕົນເອງໄດ້ໃນໄລຍະຍາວ, ຮັບປະກັນວ່າຜູ້ຕິດເຊື້ອຈະໄດ້ຮັບຢາຕ້ານໄວຣັດ (ARV) ຢ່າງຕໍ່ເນື່ອງ ເຖິງແມ່ນວ່າການຊ່ວຍເຫຼືອຈາກອົງການຈັດຕັ້ງສາກົນຈະຫຼຸດລົງໃນອະນາຄົດກໍຕາມ.
ກອງທຶນດັ່ງກ່າວຈະສ້າງຜົນປະໂຫຍດມະຫາສານໃນການຫຼຸດຜ່ອນອັດຕາການຕິດເຊື້ອໃໝ່ ແລະ ການເສຍຊີວິດ. ມັນຈະຊ່ວຍເພີ່ມສະພາບຄ່ອງທາງການເງິນໃຫ້ແກ່ໂຮງໝໍໃນການຈັດຊື້ອຸປະກອນການແພດ, ຂະຫຍາຍການເຂົ້າເຖິງການກວດເລືອດໃນກຸ່ມສ່ຽງ ແລະ ສະໜັບສະໜູນການປິ່ນປົວຜູ້ຕິດເຊື້ອໂດຍບໍ່ໃຫ້ມີອຸປະສັກທາງດ້ານຄ່າໃຊ້ຈ່າຍ ເຊິ່ງເປັນການຍົກລະດັບຄຸນນະພາບຊີວິດຂອງປະຊາຊົນໂດຍກົງ.
ບົດຮຽນຈາກສາກົນຊີ້ໃຫ້ເຫັນວ່າ ການສ້າງກອງທຶນພາຍໃນປະເທດແມ່ນກົນໄກທີ່ມີປະສິດທິຜົນສູງສຸດ ໃນການຄວບຄຸມການແພ່ລະບາດ ເຊັ່ນ ກໍລະນີສຶກສາປະເທດຊິມບັບເວ (Zimbabwe): ລັດຖະບານໄດ້ປະກາດໃຊ້ “ພາສີເອດ” (AIDS Levy) ໂດຍເກັບ 3% ຈາກລາຍຮັບພາສີເງິນເດືອນຂອງບຸກຄົນ ແລະ ກຳໄລຂອງບໍລິສັດ. ນະໂຍບາຍນີ້ກາຍເປັນແຫຼ່ງທຶນພາຍໃນທີ່ເຂັ້ມແຂງ, ຊ່ວຍໃຫ້ປະເທດສາມາດຊື້ຢາຕ້ານໄວຣັດດ້ວຍຕົນເອງ ແລະ ຫຼຸດອັດຕາການຕິດເຊື້ອລົງຢ່າງໄວວາ ໂດຍບໍ່ຕ້ອງລໍຖ້າແຕ່ເງິນຊ່ວຍເຫຼືອ.
ໄທ ໄດ້ຫັນເອົາການປິ່ນປົວ HIV ເຂົ້າໃນລະບົບຫຼັກປະກັນສຸຂະພາບແຫ່ງຊາດ (UHC) ໂດຍນຳໃຊ້ງົບປະມານພາຍໃນປະເທດເກືອບ 100% ເພື່ອສະໜອງການປິ່ນປົວຟຣີ. ຜົນສຳເລັດນີ້ເຮັດໃຫ້ໄທກາຍເປັນປະເທດທຳອິດໃນອາຊີ ທີ່ສາມາດຢຸດຕິການສົ່ງຕໍ່ເຊື້ອ HIV ຈາກແມ່ສູ່ລູກໄດ້ສຳເລັດຕາມມາດຕະຖານຂອງອົງການອະນາໄມໂລກ (WHO).
ຂໍ້ມູນສະສົມແຕ່ປີ 1990-2024 ຈາກສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ກະຊວງສາທາລະນະສຸກ ພົບວ່າ ສປປ ລາວ ມີຜູ້ຕິດເຊື້ອ HIV ສະສົມ ຫຼາຍກວ່າ 21,563 ຄົນ.
#ສາທາລະນະສຸກ #ກອງທຶນຄວບຄຸມHIV #ເສດຖະກິດລາວ #ການແພດ #ນະໂຍບາຍລັດຖະບານ
