ຜົນຈາກການສຶກສາຂອງກຸ່ມນັກຄົ້ນຄວ້າ World Inequality Lab ພົບວ່າ ຄວາມບໍ່ສະເໝີພາບຂອງອິນເດຍໄດ້ຂະຫຍາຍຕົວຢ່າງກວ້າງຂວາງພາຍໃຕ້ການປົກຄອງຂອງນາຍົກລັດຖະມົນຕີ Narendra Modi ທີ່ດຳລົງຕຳແໜ່ງມາເປັນເວລາເກືອບ 10 ປີ, ໂດຍໃນປີນີ້ມີມະຫາເສດຖີ 1% ຂອງປະເທດ ຫຼື ປະມານ 9.2% ລ້ານຄົນມີລາຍໄດ້ຄິດເປັນ 22.6% ຂອງລາຍໄດ້ທັງໝົດ ແລະ ຖືຄອງຄວາມຮັ່ງມີຫຼາຍກວ່າ 40% ຂອງອິນເດຍ.
ຄວາມບໍ່ສະເໝີພາບໃນປັດຈຸບັນແມ່ນມີຊ່ອງວ່າງໃຫຍ່ກວ່າເວລາທີ່ອິນເດຍເປັນອານານິຄົມຂອງອັງກິດ ແລະ ໄດ້ເຕືອນວ່າຄວາມບໍ່ສະເໝີພາບທີ່ເພີ່ມຂຶ້ນສາມາດເຮັດໃຫ້ເກີດຄວາມບໍ່ສະຫງົບທາງສັງຄົມໃນປະເທດອິນເດຍ. ໂດຍຄວາມບໍ່ສະເໝີພາບໄດ້ຂະຫຍາຍຕົວຂຶ້ນຫຼັງຈາກທີ່ເສດຖະກິດໄດ້ເປີດກວ້າງໃນຕົ້ນປີ 1990, ແຕ່ໃນລະຫວ່າງ 2014-15 ແລະ 2022-2023 ການຂະຫຍາຍຕົວຂອງຄວາມບໍ່ສະເໝີພາບໃນລະດັບສູງແມ່ນເຫັນໄດ້ຊັດເຈນກວ່າ ໂດຍສະເພາະໃນແງ່ຄວາມເຂັ້ມຂຸ້ນຂອງຄວາມຮັ່ງມີ.
World Inequality Lab ກ່າວວ່າປັດໄຈຕ່າງໆ ລວມທັງການຂາດການສຶກສາ ໄດ້ເຮັດໃຫ້ບາງຄົນຕິດຢູ່ໃນຕໍາແໜ່ງວຽກເຮັດງານທໍາທີ່ໄດ້ຮັບຄ່າຈ້າງຕ່ຳ ແລະ ຂັດຂວາງການເຕີບໂຕຂອງຄວາມຮັ່ງມີສໍາລັບຄົນສ່ວນໃຫຍ່.
ໂດຍໃນໄລຍະທີ່ເກີດຂຶ້ນ ແມ່ນກົງກັນກັບການຂຶ້ນຄອງຕໍາແໜ່ງຂອງນາຍົກລັດຖະມົນຕີ Narendra Modi ແລະ ການລຸກຮືຂຶ້ນຂອງກຸ່ມມະຫາເສດຖີຂອງອິນເດຍທີ່ນໍາໂດຍ Mukesh Ambani ແລະ Gautam Adani, ພັກຝ່າຍຄ້ານຂອງອິນເດຍໄດ້ກ່າວຫາ ລັດຖະບານຂອງທ່ານ Narendra Modi ມາເປັນເວລາດົນນານວ່າເປັນ “ລະບອບທຶນນິຍົມ” ແລະ ມີຜົນປະໂຫຍດທາງທຸລະກິດບາງຢ່າງທີ່ເຮັດສັນຍາຮ່ວມກັນກັບລັດຖະບານ.
ຍິ່ງໄປກວ່ານັ້ນ, ຕະຫຼອດໄລຍະດຳລົງຕຳແໜ່ງຂອງທ່ານ Narendra Modi ລາຍຮັບໂດຍລວມຍັງສືບຕໍ່ຊະລໍຕົວລົງ. ໂດຍອັດຕາເງິນຝາກປະຢັດ ແລະ ການລົງທຶນໄດ້ຫຼຸດລົງມາເປັນເວລາ 10 ກວ່າປີ ຈົນຮອດປີ 2017-2018 ແລະ ການສົ່ງອອກກໍຍັງຫຼຸດລົງເຊັ່ນກັນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
