ນະຄອນຫຼວງວຽງຈັນອອກແຈ້ງການດ່ວນ ສັ່ງປິດຮ້ານບັນເທີງ-ຄາຣາໂອເກະ ແລະ ງົດຂາຍເຄື່ອງດື່ມທີ່ມີທາດເຫຼົ້າທຸກປະເພດ ຕັ້ງແຕ່ວັນທີ 08-12 ສິງຫາ 2026 ນີ້ ເພື່ອໄວ້ອາໄລແດ່ການຈາກໄປຂອງ ທ່ານ ປອ. ໄຊສົມພອນ ພົມວິຫານ. ມາດຕະການນີ້ຈະເຮັດໃຫ້ທຸລະກິດບໍລິການກາງຄືນຕ້ອງຢຸດຊະງັກຊົ່ວຄາວ ເພື່ອຮ່ວມສະແດງຄວາມເຄົາລົບຢ່າງສູງສຸດ.
ອີງຕາມເອກະສານແຈ້ງການ ເຊິ່ງອອກໂດຍພະ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໃນວັນທີ 09 ສິງຫາ 2026 ຜ່ານມານີ້, ທາງການໄດ້ຮຽກຮ້ອງໃຫ້ຜູ້ປະກອບການທຸກພາກສ່ວນຮ່ວມມືປະຕິບັດຕາມແຈ້ງການສະບັບເລກທີ 1084/ອຈທ.ນວ ຢ່າງເຂັ້ມງວດ. ເນື້ອໃນສຳຄັນແມ່ນການສັ່ງປິດກິດຈະການຮ້ານບັນເທີງ ແລະ ຄາຣາໂອເກະທັງໝົດໃນຂອບເຂດນະຄອນຫຼວງວຽງຈັນຢ່າງເດັດຂາດໃນໄລຍະເວລາດັ່ງກ່າວ.
ສຳລັບຮ້ານອາຫານທົ່ວໄປແມ່ນຍັງສາມາດເປີດໃຫ້ບໍລິການໄດ້ຕາມປົກກະຕິ ແຕ່ອະນຸຍາດໃຫ້ຂາຍສະເພາະອາຫານເທົ່ານັ້ນ ໂດຍຫ້າມບໍ່ໃຫ້ມີການເສີບເຄື່ອງດື່ມທີ່ມີທາດເຫຼົ້າ, ຫ້າມເປີດເພງສຽງດັງ ຫຼື ຈັດງານສັງສັນມ່ວນຊື່ນຕ່າງໆຢ່າງເດັດຂາດ.
ມາດຕະການດັ່ງກ່າວນີ້ຖືກວາງອອກເພື່ອສ້າງບັນຍາກາດແຫ່ງຄວາມສະຫງົບ ແລະ ໃຫ້ກຽດຢ່າງສູງສຸດແກ່ການສູນເສຍຄັ້ງຍິ່ງໃຫຍ່ຂອງປະເທດຊາດ. ທາງການຍັງໄດ້ເນັ້ນໜັກຕື່ມອີກວ່າ ຫາກພົບເຫັນຜູ້ປະກອບການ ຫຼື ບຸກຄົນໃດທີ່ຝ່າຝືນຂໍ້ຫ້າມ ຈະມີການປະສານງານຮ່ວມກັບເຈົ້າໜ້າທີ່ປ້ອງກັນຊາດ-ປ້ອງກັນຄວາມສະຫງົບ ເພື່ອລົງມາດຕະການຂັ້ນເດັດຂາດ ບໍ່ວ່າຈະເປັນການປັບໃໝ ຫຼື ໂຈະກິດຈະການຕາມລະບຽບກົດໝາຍທີ່ກຳນົດໄວ້.
ດັ່ງນັ້ນ, ປະຊາຊົນ ແລະ ນັກທ່ອງທ່ຽວທີ່ອາໄສຢູ່ໃນນະຄອນຫຼວງວຽງຈັນ ຄວນຮັບຊາບຂໍ້ມູນ ແລະ ວາງແຜນການໃຊ້ຊີວິດໃນຊ່ວງໄລຍະເວລານີ້ໃຫ້ເໝາະສົມ ເພື່ອຮ່ວມເປັນສ່ວນໜຶ່ງໃນການສະແດງຄວາມເຄົາລົບ ແລະ ໄວ້ອາໄລຮ່ວມກັນກັບປະຊາຊົນລາວທັງຊາດ.
ທ່ານ ໄຊສົມພອນ, ອະດີດກຳມະການກົມການເມືອງສູນກາງພັກປະຊາຊົນ ປະຕິວັດລາວ ແລະ ອະດີດປະທານສະພາແຫ່ງຊາດລາວ, ໄດ້ເຖິງແກ່ມໍລະນະກຳ ໃນຕອນເຊົ້າວັນເສົາ ລວມອາຍຸ 70 ປີ ຫຼັງຈາກປ່ວຍດ້ວຍພະຍາດຫຼອດເລືອດອັກເສບຮ້າຍແຮງ.
ລັດຖະບານລາວ ແລະ ສູນກາງແນວລາວສ້າງຊາດ ໄດ້ປະກາດໄວ້ອາໄລທົ່ວປະເທດເປັນເວລາ 4 ວັນ, ນັບແຕ່ວັນທີ 9 ຫາ 12 ສິງຫາ, ເຊິ່ງພິທີຈະຈັດຂຶ້ນທີ່ຫໍປະຊຸມແຫ່ງຊາດ ທີ່ນະຄອນຫຼວງວຽງຈັນ.
ສ່ວນພິທີຊາປະນະກິດສົບ ຈະຈັດຂຶ້ນທີ່ເດີ່ນພະທາດຫຼວງ ນະຄອນຫຼວງວຽງຈັນ ໃນວັນທີ 12 ສິງຫາ.
#LaoX #ນະຄອນຫຼວງວຽງຈັນ #ແຈ້ງການດ່ວນ #ຂ່າວລາວ #ໄວ້ອາໄລ #VientianeCapital
