ທະນາຄານພັດທະນາອາຊີ (ADB) ໄດ້ອະນຸມັດເງິນກູ້ 35 ລ້ານໂດລາສະຫະລັດ ແລະ ເງິນຊ່ວຍເຫຼືອ 10 ລ້ານໂດລາສະຫະລັດໃຫ້ແກ່ໂຄງການລົງທຶນເພື່ອປັບປຸງສະພາບແວດລ້ອມໃນຕົວເມືອງ. ເພື່ອຊ່ວຍສະໜັບສະໜູນການພັດທະນາຕົວເມືອງແບບຍືນຍົງ, ຄອບຄຸມ ແລະ ຟື້ນຟູຕົວເມືອງໃນຫຼວງພະບາງ. ໂດຍໂຄງການນີ້ຄາດວ່າຈະເປັນປະໂຫຍດຕໍ່ຜູ້ທີ່ຢູ່ອາໄສ 104,500 ຄົນ ແລະ ຜູ້ຄົນທີ່ມາທ່ອງທ່ຽວ 1,3 ລ້ານຄົນຕໍ່ປີ ພາຍໃນປີ 2031.
ຫຼວງພະບາງເປັນສູນກາງການຄົມມະນາຄົມ ແລະ ສະຖານທີ່ທ່ອງທ່ຽວທີ່ສຳຄັນໃນພາກເໜືອຂອງ ສປປ ລາວ, ໂດຍມີສູນກາງເມືອງທີ່ເຕີບໃຫຍ່ທີ່ຂະຫຍາຍຕົວຢ່າງໄວວາ. ເຊິ່ງຕັ້ງຢູ່ຈຸດເຊື່ອມຕໍ່ລະຫວ່າງແມ່ນ້ຳຂອງ ແລະ ແມ່ນ້ຳຄານ. ນອກຈາກນີ້ ຍັງມີປູຊະນີຍະສະຖານປະຫວັດສາດຂະໜາດນ້ອຍ ແລະ ທິວທັດອ້ອມຂ້າງທີ່ໄດ້ຖືກບັນຈຸເຂົ້າໃນບັນຊີລາຍຊື່ມໍລະດົກໂລກຂອງອົງການການສຶກສາ, ວິທະຍາສາດ ແລະ ວັດທະນະທຳຂອງສະຫະປະຊາຊາດ (UNESCO) ໃນປີ 1995.
ນັບຕັ້ງແຕ່ນັ້ນເປັນຕົ້ນມາ, ການທ່ອງທ່ຽວ ແລະ ການເຕີບໂຕຂອງຈຳນວນປະຊາກອນໄດ້ກະຕຸ້ນໃຫ້ເກີດການຂະຫຍາຍຕົວຂອງຕົວເມືອງອອກໄປດ້ານນອກ ແລະ ເພີ່ມໂອກາດໃໝ່ທາງເສດຖະກິດ. ເຖິງຢ່າງໃດກໍຕາມ, ການເຕີບໂຕດັ່ງກ່າວຍັງໄດ້ນຳມາເຖິງຄວາມທ້າທາຍບາງຢ່າງເຊັ່ນ: ການຈະລາຈອນທີ່ແອອັດ, ຂີ້ເຫຍື້ອ ແລະ ສະຖານທີ່ທ່ອງທ່ຽວທີ່ແອອັດ.
ການພັດທະນາການຄຸ້ມຄອງສິ່ງເສດເຫຼືອ ແລະ ການບໍາບັດນໍ້າເສຍແມ່ນມີຄວາມຈຳເປັນຫຼາຍ. ເນື່ອງຈາກ ຖະໜົນຫົນທາງ, ທາງຍ່າງໃນເມືອງ ແລະ ພື້ນທີ່ສີຂຽວສາທາລະນະບໍ່ສາມາດກ້າວທັນຕາມຄວາມຕ້ອງການຂອງຜູ້ຄົນທີ່ເພີ່ມຂຶ້ນ. ນີ້ເຮັດໃຫ້ເກີດຄວາມເສຍຫາຍຕໍ່ສິ່ງແວດລ້ອມ ແລະ ເຮັດໃຫ້ຜູ້ຄົນທີ່ອາໄສຢູ່ຄ່ອຍໆຫຼຸດລົງ.
ທ່ານ Sonomi Tanaka, ຜູ້ອໍານວຍການ ADB ປະຈໍາລາວ ກ່າວວ່າ:
“ມໍລະດົກອັນລ້ຳຄ່າ ແລະ ຊີວິດການເປັນຢູ່ຂອງເມືອງຫຼວງພະບາງຖືກຄຸກຄາມຈາກການພັດທະນາຕົວເມືອງທີ່ບໍ່ໄດ້ມີການວາງແຜນໄວ້. ການປ່ຽນແປງຂອງສະພາບດິນຟ້າອາກາດ ແລະ ໄພພິບັດທີ່ສົ່ງຜົນກະທົບຕໍ່ແມ່ຍິງ ແລະ ກຸ່ມຄົນອື່ນໆທີ່ມີຄວາມສ່ຽງ”
“ເພື່ອທີ່ຈະໃຫ້ໂຄງສ້າງຕົວເມືອງດີຂຶ້ນ. ການຄຸ້ມຄອງສິ່ງແວດລ້ອມ ແລະ ການບໍລິການດ້ານການທ່ອງທ່ຽວ ພ້ອມກັບການວາງແຜນຜັງຕົວເມືອງແບບປະສົມປະສານ ແລະ ການຄຸ້ມຄອງການຕອບສະໜອງທາງເພດ. ຈໍາເປັນຈະຕ້ອງໄດ້ຍົກລະດັບຊີວິດການເປັນຢູ່ຂອງແຂວງຫຼວງພະບາງ ແລະ ເຮັດໃຫ້ມີຄວາມຍືດຍຸ່ນຕໍ່ແຮງກະທົບຫຼາຍຂຶ້ນ”
ອີງຕາມຂໍ້ມູນຂອງ ADB, ອົງປະກອບຂອງໂຄງການທີ່ເປັນນະວັດຕະກຳປະກອບມີໂຄງການທົດລອງສໍາລັບການດູແລເດັກໃນບ້ານ, ຊຸມຊົນ ແລະ ສະຖານທີ່ເຝິກອົບຮົມສໍາລັບຜູ້ໄດ້ຮັບທຶນການສຶກສາຊັ້ນສູງ ແລະ ການເຝິກອົບຮົມວິຊາຊີບ ທີ່ຈະສະເໜີໃຫ້ພະນັກງານຍິງທີ່ເຮັດວຽກໃນຂະແໜງນ້ຳ, ສຸຂາພິບານ, ໂຍທາທິການ ແລະ ການທ່ອງທ່ຽວ.
“ໂຄງການນີ້ຈະສ້າງເຄືອຂ່າຍການພັດທະນາທຸລະກິດອຸດສາຫະກຳທີ່ມີຄວາມສ້າງສັນທີ່ນຳພາໂດຍແມ່ຍິງ. ພ້ອມທັງກະກຽມການວາງແຜນ ແລະ ແຜນປະຕິບັດງານເມືອງສ້າງສັນແຫ່ງທຳອິດຂອງລາວ, ແມ່ຍິງຍັງຈະໄດ້ຮັບການເຝິກອົບຮົມເພື່ອຈັດການແກ້ໄຂໂຄງສ້າງພື້ນຖານແບບອັດສະລິຍະຕາມຍຸດທະສາດຂອງເມືອງອັດສະລິຍະ ແລະ ບູລະນາການຫຼວງພະບາງ. ເຊິ່ງຈະຈັດຂຶ້ນພາຍໃຕ້ກອງທຶນ Asean-Australia Smart Cities Trust Fund ທີ່ບໍລິຫານໂດຍ ADB.
ການພັດທະນາດ້ານຄວາມອາດສາມາດດັ່ງກ່າວ ເພື່ອສະໜັບສະໜູນການປະຕິຮູບດ້ານພາສີ, ເສີມສ້າງການຄຸ້ມຄອງທາງດ້ານການເງິນ, ອຳນວຍຄວາມສະດວກໃຫ້ແກ່ການລົງທຶນໃນພາກເອກະຊົນ, ປັບປຸງການກຽມພ້ອມໃນການຮັບມືກັບໄພພິບັດ ແລະ ຊ່ວຍເສີມສ້າງໃນການລົງທຶນໂຄງສ້າງພື້ນຖານຂອງໂຄງການ
ໂຄງການນີ້ຈະຊ່ວຍໃຫ້ໜ່ວຍງານທີ່ປົກຄອງເມືອງ ສາມາດດຳເນີນການພັດທະນາຕົວເມືອງແບບຍືນຍົງ, ໂດຍສາມາດປົກປ້ອງມໍລະດົກວັດທະນະທໍາທີ່ມີມາຕັ້ງແຕ່ດົນນານ, ທໍາມະຊາດ, ປະເພນີ ແລະ ສ້າງເມືອງທີ່ໜ້າຢູ່ໃຫ້ສຳລັບທຸກຄົນ.
ຫຼວງພະບາງແມ່ນເຕັມໄປດ້ວຍວັດທະນະທໍາ ແລະ ປະເພນີພຸດທະສາສະໜາທ້ອງຖິ່ນ.ເມືອງມໍລະໂດກໂລກແຫ່ງນີ້ໄດ້ມີການປະສົມປະສານລະຫວ່າງ ພຸດທະສາສະໜາທີ່ແຕກຕ່າງກັນ ແລະ ສະຖາປັດຕະຍະກຳອານານິຄົມຝຣັ່ງທີ່ໂດດເດັ່ນ ເຊິ່ງຕັ້ງຢູ່ໃນພູມສັນຖານແມ່ນ້ຳເຂດຮ້ອນ, ອ້ອມຮອບດ້ວຍເນີນພູທີ່ຫ່າງໄກ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
