ໃນວັນທີ 12 ທັນວາທີ່ຜ່ານມາ, ສຳນັກຂ່າວຕ່າງປະເທດໄດ້ມີການລາຍງານວ່າ ຄະນະລັດຖະບານຈີນໄດ້ອອກຊຸດມາດຕະການເລັ່ງລັດໃນການພັດທະນາການຄ້າໂດຍລວມທັງພາຍໃນປະເທດ ແລະ ຕ່າງປະເທດ. ໂດຍມີເປົ້າໝາຍແມ່ນເພື່ອລົບລ້າງອຸປະສັກດ້ານກົດລະບຽບ ແລະ ອຸປະສັກອື່ນໆ ເພື່ອໃຫ້ບໍລິສັດຕ່າງໆ ສາມາດສໍາຫຼວດຕະຫຼາດທັງພາຍໃນ ແລະ ຕ່າງປະເທດໄດ້ຢ່າງງ່າຍດາຍ.
ໃນໄລຍະທີ່ຂະແໜງການສົ່ງອອກຂອງຈີນຕ້ອງປະເຊີນກັບສະພາບແວດລ້ອມພາຍນອກທີ່ຫຍຸ້ງຍາກ ແລະ ຊັບຊ້ອນ, ແລະບາງບໍລິສັດຕ້ອງປະເຊີນກັບຄວາມຕ້ອງການພາຍໃນທີ່ຫຼຸດລົງ. ການພັດທະນາການຄ້າພາຍໃນປະເທດ ແລະ ຕ່າງປະເທດຈະຊ່ວຍຊຸກຍູ້ການພັດທະນາເສດຖະກິດຂອງຈີນຢ່າງຫຼວງຫຼາຍ ແລະ ໃຫ້ການຊ່ວຍເຫຼືອທີ່ດີເລີດແກ່ທຸລະກິດຕ່າງ.
ເຊິ່ງໃນຊຸດມາດຕະການໃໝ່ນີ້ແມ່ນມີຄວາມຈໍາເປັນຕໍ່ການສ້າງຮູບແບບການພັດທະນາໃໝ່ ແລະ ສົ່ງເສີມການພັດທະນາທີ່ມີຄຸນະພາບສູງ. ລວມເຖິງບົດບາດສໍາຄັນໃນການຊຸກຍູ້ການພັດທະນາເສດຖະກິດ, ການຂະຫຍາຍຕົວຂອງຄວາມຕ້ອງການພາຍໃນປະເທດ ແລະ ຮັກສາສະຖຽນລະພາບຂອງລັດວິສາຫະກິດ.
ໂດຍມາດຕະການດັ່ງກ່າວຈະຍົກລະດັບການປັບປຸງກົດລະບຽບ ແລະ ລະບົບການຄ້າພາຍໃນ ແລະ ຕ່າງປະເທດ. ລວມທັງການຊີ້ນໍາ ການລວມກັນຂອງມາດຕະຖານ ແລະ ອຳນວຍຄວາມສະດວກໃຫ້ແກ່ການເຄື່ອນໄຫວຂອງແຫຼ່ງກຳລັງການຄ້າພາຍໃນ ແລະ ຕ່າງປະເທດ. ເຊິ່ງຈະກວມເອົາການຄຸ້ມຄອງໃນການກວດກາ, ການຄວບລວມມາດຕະຖານຕ່າງໆ ແລະ ອຳນວຍຄວາມສະດວກໃຫ້ແກ່ການເຄື່ອນໄຫວຂອງແຫຼ່ງຊັບພະຍາກອນການຄ້າພາຍໃນ ແລະ ຕ່າງປະເທດໃຫ້ເປັນໄປດ້ວຍດີ.
ນອກຈາກນີ້, ມາດຕະການດັ່ງກ່າວຈະສົ່ງເສີມການປະສານງານຂອງຊ່ອງທາງການຕະຫຼາດພາຍໃນປະເທດ ແລະ ຕ່າງປະເທດ. ປັບປຸງສະພາບແວດລ້ອມສຳລັບການພັດທະນາໂດຍລວມຂອງການຄ້າພາຍໃນປະເທດ ແລະ ຕ່າງປະເທດ. ແລະເລັ່ງລັດໃນການພັດທະນາແບບກວມລວມໃນຫຼາຍໆດ້ານທີ່ສຳຄັນ.
ທັງນີ້, ປະເທດຈີນຈະເສີມສ້າງການສະໜັບສະໜູນດ້ານການຄັງ ແລະ ການເງິນສໍາລັບການພັດທະນາໂດຍລວມຂອງການຄ້າທັງພາຍໃນປະເທດ ແລະ ຕ່າງປະເທດເພິ່ມເຕີມ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
