ຖ້າໃຜເຄີຍອ່ານຂ່າວ ກ່ຽວວິທະຍາສາດ ລາຍງານບົດຄົ້ນຄວ້າ ຫຼື ບົດວິໄຈຕ່າງໆກ່ຽວກັບມະນຸດ ກໍຄົງຈະມັກໄດ້ເຫັນວ່າມີສັດປະເພດໜຶ່ງ ທີ່ມັກຈະຖືກນຳມາເປັນໂຕທົດລອງເພື່ອອ້າງອີງແທນມະນຸດຢູ່ຕະຫຼອດເວລາ ແລະ ແນ່ນອນສັດທີ່ວ່ານັ້ນກໍຄື ໜູ ແຕ່ທຸກຄົນເຄີຍສົງໄສບໍ່ວ່າ ເປັນຫຍັງ ໜູ ຈຶ່ງເປັນສັດຍອດຮິດ ໃນການທົດສອບ ຫຼື ທົດລອງຢາໃຫ້ມະນຸດຢູ່ສະເໝີ.
ຖ້າເປັນໃນສະໄໝກ່ອນ ສາເຫດທີ່ໜູໄດ້ຮັບຄັດເລືອກກໍຄົງເປັນຍ້ອນຄວາມສະດວກ ລ້ຽງງ່າຍ ແລະ ທີ່ສຳຄັນຍັງເປັນສັດລ້ຽງລູກດ້ວຍນົມຄືກັບມະນຸດ ແຖມຍັງມີອາຍຸໄຂສັ້ນພຽງ 2-3 ປີ ເຊິ່ງເປັນຂໍ້ດີສຳລັບການສຶກສາໄລຍະຍາວເພາະໃຊ້ເວລາບໍ່ດົນກໍສາມາດຕິດຕາມຜົນກະທົບທີ່ສົ່ງຕໍ່ຈາກຮຸ່ນສູ່ຮຸ່ນໄດ້ແລ້ວ.
ຈົນປັດຈຸບັນທີ່ວິທະຍາສາດກ້າວໜ້າ ກໍຍັງພົບວ່າ ຈຳນວນຍີນ ຂອງໜູ ແລະ ມະນຸດນັ້ນໃກ້ຄຽງກັນຫຼາຍ ເຊິ່ງແປວ່າຜົນກະທົບທີ່ເກີດຈາກໜູ ກໍມີໂອກາດທີ່ຈະເກີດກັບຄົນໃນລັກສະນະດຽວກັນໄດ້ສູງ ເຮັດໃຫ້ເຫດຜົນເລື່ອງຍີນ ເປັນເຫດຜົນຫຼັກທີ່ນັກວິໄຈໃນປັດຈຸບັນ ຍັງໃຊ້ໜູເປັນຕົວແທນຂອງມະນຸດຢູ່.
ເພື່ອເຮັດໃຫ້ຜົນການທົດສອບອອກມາກົງກັນທີ່ສຸດ ສະຖາບັນ ຊີວະວິທະຍາ ການແພດຂອງສະຫະລັດອາເມຣິກາ ໄດ້ສ້າງມາດຕະຖານສຳລັບໜູທົດລອງຕັ້ງແຕ່ ປີ 1906 ໂດຍຄັດ ແລະ ປະສົມພັນໜູ ໃຫ້ເໝາະກັບການທົດສອບທາງການແພດຫຼາຍທີ່ສຸດ ໂດຍມີຊື່ວ່າ “Wistar rat” ເຊິ່ງໜູທົດລອງຫຼາຍກວ່າເຄິ່ງໜຶ່ງໃນຫ້ອງທົດລອງທົ່ວໂລກໃນປັດຈຸບັນ ກໍເປັນຜົນຜະລິດມາຈາກ Wistar Rat ທັງນັ້ນ.
ການໃຊ້ໜູເປັນໂຕທົດລອງ ເຊິ່ງຟັງເບິ່ງມັນຄືຈະໂຫດຮ້າຍ ແລະ ເປັນການທາລຸນສັດ ແຕ່ໃນຕົວຈິງມັນກໍບໍ່ໄດ້ໂຫດຮ້າຍແບບນັ້ນສະເໝີໄປ ເພາະກົດເຫຼັກສຳຄັນ ເຊິ່ງກຳນົດເປັນມາດຕະຖານ ແລະ ຈັນຍາບັນວິຊາຊີບ ໂດຍຄະນະກຳມະການນານາຊາດວ່າດ້ວຍວິທະຍາສາດສັດທົດລອງໄດ້ກຳນົດໄວ້ວ່າ:
“ໃຊ້ໜູຈຳນວນໜ້ອຍທີ່ສຸດ ແລະ ຕ້ອງແນ່ໃຈວ່າການກະທຳໃດໆກັບໜູຈະບໍ່ແມ່ນການທາລຸນນະກຳ ເພາະຊີວິດຂອງສັດທຸກໂຕມີຄ່າ ຖ້າຈະຕ້ອງເສຍສະຫຼະຊີວິດຂອງໜູແຕ່ລະໂຕຈະຕ້ອງມອບຄຸນປະໂຫຍດສູງສຸດຕໍ່ມະນຸດລວມເຖິງສັດໂຕອື່ນໆນຳ”
ອີງໃສ່ບັນທຶກວິທະຍາສາດທີ່ເກົ່າແກ່ທີ່ສຸດ. ມະນຸດໄດ້ເລີ່ມຕົ້ນການນໍາໃຊ້ໜູເປັນສັດໃນຫ້ອງທົດລອງໃນປີ 1621 ໂດຍນັກພືດສາດຊາວອິຕາລີ Theophilus Müller ແລະ ນັກພືດສາດຊາວເຢຍລະມັນ Giovanni Faber. ທັງສອງມີຄວາມສົນໃຈໃນ ສະລີລະສາດ ແລະ ຢາປົວພະຍາດ. ດັ່ງນັ້ນ, ພວກເຂົາເຈົ້າໄດ້ຮ່ວມກັນຜ່າຕັດໜູທີ່ຈັບໄດ້ເພື່ອສຶກສາອະໄວຍະວະພາຍໃນ.
ຕໍ່ມາໃນປີ 1678, ທ່ານ ວິນລຽມ ຮາວີ (William Harvey) ໝໍຊາວອັງກິດ ໄດ້ຜ່າຕັດໜູເພື່ອສຶກສາລະບົບການໄຫຼວຽນຂອງເລືອດ ແລະ ການຈະເລີນພັນ ພ້ອມກັບການສຶກສາຂອງມະນຸດ. ນີ້ເຮັດໃຫ້ລາວສະຫຼຸບການຄົ້ນພົບຂອງລາວເປັນທິດສະດີຂອງລະບົບການໄຫຼວຽນຂອງຮ່າງກາຍ. ເຊິ່ງລົບລ້າງຄວາມເຊື່ອແບບຜິດໆ ທີ່ແພດໝໍສະໄໝນັ້ນຮຽນແບບນຳກັນມາ.
ຂອບໃຈຂໍ້ມູນຈາກ: becommon, Jones Salad
ຕິດຕາມຂ່າວທັງໝົດຈາກ LaoX: https://laox.la/all-posts/
