ໂຄງການຜະລິດພະລັງງານທົດແທນໃນອາຊີຕາເວັນອອກສຽງໃຕ້ ລວມທັງ ສປປ ລາວ ຈະສ້າງລາຍຮັບໄດ້ເຖິງ 100 ຕື້ໂດລາ

30/08/2023

ການຜະລິດພະລັງງານທົດແທນໃນອາຊີຕາເວັນອອກສຽງໃຕ້ ລວມທັງປະເທດລາວ ຈະສາມາດສ້າງລາຍຮັບແບບຍືນຍົງໄດ້ປະມານ 90 ຫາ 100 ຕື້ໂດລາສະຫະລັດ ໃນປີ 2030.

ໂດຍອີງຕາມບົດລາຍງານສະບັບໃໝ່ຂອງ ທະນາຄານພັດທະນາອາຊີ (ADB) ໃນຫົວຂໍ້ການຜະລິດພະລັງງານທົດແທນ: ໂອກາດສໍາລັບອາຊີຕາເວັນອອກສຽງໃຕ້ ລະບຸວ່າ ການຂະຫຍາຍຕົວຂອງພະລັງງານໄຟຟ້າແສງຕາເວັນໃນພາກພື້ນອາຊີຕາເວັນອອກສຽງໃຕ້, ແບັດເຕີຣີ ແລະ ອຸດສາຫະກຳລົດໄຟຟ້າ ຈະເປັນໂອກາດສ້າງລາຍຮັບປະມານ 90 ຕື້ຫາ 100 ຕື້ໂດລາສະຫະລັດໃນປີ 2030 ໂດຍຈະສ້າງວຽກງານໃນອຸດສາຫະກຳພະລັງງານທົດແທນ 6 ລ້ານຄົນໃນປີ 2050.

ປະເທດລາວໃຫ້ຄຳໝັ້ນສັນຍາທີ່ຈະສົ່ງເສີມພະລັງງານທົດແທນ ແລະ ການລົງທຶນໃນຂະແໜງການ ຄາບອນຕໍ່າ ຕົວຢ່າງເຊັ່ນ: ໂຄງການພະລັງງານລົມ ທີ່ມີກຳລັງການຜະລິດ 600 ເມກາວັດ ທີ່ກຳລັງກໍ່ສ້າງຢູ່ແຂວງເຊກອງ ແລະ ອັດຕະປື ພາກໃຕ້ຂອງລາວ ເພື່ອສົ່ງອອກ ແລະ ຂາຍໄຟຟ້າໃຫ້ຫວຽດນາມ.

ໂດຍການຜະລິດສ່ວນໃຫຍ່ແມ່ນສຸມໃສ່ 4 ປະເທດຄື: ກຳປູເຈຍ, ລາວ, ໄທ, ແລະ ຫວຽດນາມ ເຊິ່ງຄວາມສາມາດໃນການຜະລິດສ່ວນໃຫຍ່ໃນພາກພື້ນໄດ້ຖືກສ້າງຕັ້ງຂຶ້ນ ແລະ ລົງທຶນໂດຍຜູ້ຜະລິດຈາກປະເທດຈີນ.

ບົດລາຍງານຍັງຊີ້ວ່າ, ການພົວພັນຄູ່ຮ່ວມມືລະຫວ່າງລັດຖະບານກັບລັດຖະບານສາມາດສ້າງຄວາມສະດວກໃຫ້ແກ່ການກໍ່ສ້າງທີ່ສູງຂຶ້ນຈາກຄວາມສາມາດຂອງແສງຕາເວັນ PV ໂດຍການເຊື່ອມຕໍ່ບັນດາປະເທດອາຊີຕາເວັນອອກສຽງໃຕ້ທີ່ມີທ່າແຮງໃນການຜະລິດພະລັງງານທົດແທນທີ່ຕ່ຳກວ່າ ກັບປະເທດທີ່ມີທ່າແຮງທີ່ເຂັ້ມແຂງໃນການສະໜອງ ພະລັງງານທົດແທນ.

ຕົວຢ່າງ: ສິງກະໂປ ໄດ້ລົງນາມໃນຂໍ້ຕົກລົງກັບ 4 ປະເທດເພື່ອນບ້ານ (ກໍາປູເຈຍ, ອິນໂດເນເຊຍ, ລາວ, ແລະ ມາເລເຊຍ) ເພື່ອສະໜັບສະໜູນເປົ້າໝາຍການນໍາເຂົ້າໄຟຟ້າທີ່ມີຄາບອນຕໍ່າເຖິງ 4 GW ຈາກພາກພື້ນໃນປີ 2035.

ທ່ານນາງ Antha Williams, ຫົວໜ້າໂຄງການດ້ານສິ່ງແວດລ້ອມຂອງ Bloomberg ກ່າວວ່າ “ອາຊີຕາເວັນອອກສຽງໃຕ້ມີທ່າແຮງທີ່ຈະກາຍເປັນຜູ້ນໍາໃນການຜະລິດພະລັງງານທົດແທນເພື່ອປະກອບສ່ວນເຂົ້າໃນການນຳໃຊ້ພະລັງງານທົດແທນທົ່ວໂລກ, ພ້ອມກັນນັ້ນກໍບັນລຸການເຕີບໂຕທາງດ້ານເສດຖະກິດ ແລະ ຫຼຸດຜ່ອນຜົນກະທົບຈາກການປ່ຽນແປງຂອງດິນຟ້າອາກາດ”.

Antha Williams ກ່າວຕື່ມວ່າ: “ບົດລາຍງານສະບັບນີ້ໄດ້ພິສູດໃຫ້ເຫັນວ່າການເພີ່ມທະວີການລົງທຶນຂອງພາກເອກະຊົນເຂົ້າໃນຂະແໜງການຜະລິດພະລັງງານທົດແທນພາຍໃນປະເທດ, ການເພີ່ມທະວີການຮ່ວມມືໃນພາກພື້ນ, ການຮ່ວມມືໃນພາກພື້ນຈະສ້າງວຽກເຮັດງານທຳ, ເພີ່ມ GDP, ແລະ ຊ່ວຍປະເທດອາຊີຕາເວັນອອກສຽງໃຕ້ບັນລຸເປົ້າໝາຍດິນຟ້າອາກາດ”.

ບົດລາຍງານດັ່ງກ່າວ ຍັງເຜີຍວ່າ ອາຊີຕາເວັນອອກສຽງໃຕ້ອາດຈະສູນເສຍເຖິງ 30% ຂອງລວມຍອດຜະລິດຕະພັນພາຍໃນປະເທດໃນປີ 2050 ຍ້ອນອຸນຫະພູມໂລກເພີ່ມຂຶ້ນ ແລະ ເຫດການດິນຟ້າອາກາດທີ່ຮ້າຍແຮງ, ແຕ່ການຊຸກຍູ້ກຳລັງການຜະລິດພະລັງງານທົດແທນຂອງພາກພື້ນຈະເຮັດໃຫ້ບັນດາປະເທດໃນພາກພື້ນສ້າງວຽກເຮັດງານທຳໃໝ່. ຕອບສະໜອງຄວາມຕ້ອງການພະລັງງານທີ່ເພີ່ມຂຶ້ນໃນຂະນະທີ່ຫຼຸດຜ່ອນການປ່ອຍອາຍພິດຢ່າງຫຼວງຫຼາຍ.

ທີ່ມາ:

https://vientianetimes.la/freeContent/FreeConten_Renewable168_y23.php?fbclid=IwAR1EqDplIxkrVRx23fYchzNgK0MlK6hlGzWM_WKER7wpKQRoElIkYWkp0Cs

https://www.adb.org/sites/default/files/publication/901536/renewable-energy-manufacturing-opportunities-southeast-asia.pdf

ຕິດຕາມຂ່າວທັງໝົດຈາກ LaoX: https://laox.la/all-posts/