ເມື່ອເຮົາເຕີບໃຫ່ຍຂຶ້ນ ແລະ ຜ່ານປະສົບການມີການຄວາມຮັກມາແລ້ວ, ແນ່ນອນວ່າເຮົາຈະເຫັນໄດ້ຢ່າງຊັດເຈນວ່າ ຄວາມຮັກໃນຕອນໄວຮຽນ ແລະ ໄວເຮັດວຽກ ມັນມີຄວາມແຕກຕ່າງກັນຫຼາຍ. ເຮົາມາເບິ່ງນຳກັນວ່າລັກສະນະຄວາມຮັກແບບຜູ້ໃຫ່ຍນັ້ນເປັນແນວໃດ?
1.ຜິດກັນໃນເລື່ອງທີ່ເປັນບັນຫາແທ້ໆ
ເຊື່ອວ່າໃນທຸກຄວາມສຳພັນຍ່ອມມີບັນຫາ, ອຸປະສັກ ແລະ ຄວາມບໍ່ເຂົ້າໃຈກັນ ເນື່ອງຈາກຄົນສອງຄົນມີຄວາມຄິດ ແລະ ຈິດໃຈທີ່ແຕກຕ່າງກັນ. ຄວາມຮັກຂອງຜູ້ໃຫຍ່ນັ້ນ ຍາມເມື່ອມີບັນຫາພວກເຂົາຈະໂອ້ລົມ ເພື່ອປຶກສາຫາລືກັນວ່າ ບັນຫາແມ່ນຫຍັງ ແລະ ຈະປັບປຸງແກ້ໄຂແນວໃດ?
2. ຄິດເຖິງຄຳວ່າ “ພວກເຮົາ” ແທນທີ່ “ຂ້ອຍ ຫຼື ເຈົ້າ”
ຄວາມຮັກແບບຜູ້ໃຫ່ຍຈະໃຊ້ຄຳວ່າ “ພວກເຮົາ” ຫຼາຍກວ່າຄຳວ່າ “ຂ້ອຍ ຫຼື ເຈົ້າ” ເຊັ່ນ: ຊື້ອາຫານທີ່ພວກເຮົາທັງສອງມັກກິນ ຫຼື ຈອງການເດີນທາງໄປສະຖານທີ່ທີ່ພວກເຮົາທັງສອງຢາກໄປ ແລະ ອື່ນໆ. ທັງສອງປຶກສາເຊິ່ງກັນ ແລະ ກັນສະເໝີ ກ່ອນຈະຕັດສິນໃຈເຮັດຫຍັງ. ເນື່ອງຈາກທັງສອງໄດ້ໃຫ້ຄຸນຄ່າ ແລະ ໃສ່ໃຈຄວາມຮູ້ສຶກຂອງກັນ ແລະ ກັນ.
3. ແບ່ງປັນຄວາມຮັບຜິດຊອບເທົ່າທຽມກັນ
ຄວາມຮັກແບບຜູ້ໃຫຍ່ ພວກເຂົາຈະແບ່ງຄວາມຮັບຜິດຊອບໃຫ້ເທົ່າທຽມກັນ ຫຼື ຊ່ວຍເຫຼືອກັນ ບໍ່ວ່າຈະເປັນວຽກເຮືອນ ຫຼື ເຮັດວຽກອື່ນໆ ເພາະເມື່ອໃຊ້ຊີວິດຢູ່ຮ່ວມກັນ ຄວາມຮັບຜິດຊອບວຽກງານຕ່າງໆລ້ວນແຕ່ຕ້ອງມີຮ່ວມກັນ.
4. ເວົ້າເລື່ອງອະນາຄົດຮ່ວມກັນ
ທັງສອງຝ່າຍບໍ່ຮູ້ສຶກຢ້ານທີ່ຈະລົມກັນ ຫຼື ປຶກສາຫາລືກັນກ່ຽວກັບອະນາຄົດ ເຊັ່ນ: ການແຕ່ງງານ, ການສ້າງສາ, ການຫາເງິນ ແລະ ອື່ນໆ ເພາະວ່າທັງສອງຄົນມີຄວາມຈິງຈັງໃນຄວາມສໍາພັນຄັ້ງນີ້ ແລະ ຈະຊ່ວຍກັນທຳມາຫາກິນ ເພື່ອເຮັດໃຫ້ເປົ້າໝາຍທີ່ເຂົາເຈົ້າຕັ້ງໄວ້ໃຫ້ເປັນຈິງ.
5. ມີເວລາ ແລະ ພື້ນທີ່ສ່ວນຕົວໃຫ້ກັນ
ເຖິງແມ່ນວ່າເຮົາຈະເປັນຄົນຮັກກັນ ແຕ່ມັນບໍ່ໄດ້ຫມາຍຄວາມວ່າເຈົ້າ ແລະ ຄົນຮັກຈະຕ້ອງຕິດຕໍ່ກັນ 24 ຊົ່ວໂມງ ເຊັ່ນ: ຖ້າອີກຝ່າຍບໍ່ວ່າງ ແລະ ຕອບຊ້າ ຫຼື ໂທແລ້ວບໍ່ຮັບ ກໍບໍ່ໄດ້ສະແດງອາລົມໃຈຮ້າຍໃສ່ອີກຝ່າຍ ເພາະທັງສອງຝ່າຍຈະໃຫ້ອິດສະຫຼະໃນການໃຊ້ເວລາຢູ່ກັບຕົນເອງ, ໃນການເຮັດໜ້າທີ່ຂອງຕົນເອງ. ຄວາມສໍາພັນແບບນີ້ຈະຊ່ວຍໃຫ້ເຈົ້າ ແລະ ຄູ່ຂອງເຈົ້າບໍ່ຮູ້ສຶກອຶດອັດ ແລະ ເຂົ້າໃຈກັນ.
6. ຈະບໍ່ມີຄວາມຮູ້ສຶກຢາກປ່ຽນຄົນຮັກ ຫຼື ຕົວທ່ານເອງ
ທຸກຄັ້ງທີ່ເຮົາພົບກັບຄົນທີ່ຮັກເຮົາ. ເຮົາຈະຮັບໄດ້ໃນຕົວຕົນທີ່ເຂົາເປັນຢ່າງແທ້ຈິງ ເຖິງບໍ່ແມ່ນຊາຍຫນຸ່ມທີ່ສົມບູນແບບທີ່ເຄີຍຝັນ. ຄວາມຮັກແບບຜູ້ໃຫ່ຍ ແມ່ນຄວາມສໍາພັນທີ່ທັງສອງຝ່າຍຮັກ ແລະ ຈິງໃຈຕໍ່ກັນ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
