NielsenIQ, ບໍລິສັດວິເຄາະຂໍ້ມູນຊັ້ນນໍາ ໄດ້ເປີດເຜີຍຜົນການສຳຫຼວດພຶດຕິກຳຂອງຜູ້ບໍລິໂພກຊາວຫວຽດນາມພົບວ່າ ການຊື້ເຄື່ອງຂອງທາງອອນລາຍໄດ້ກາຍເປັນວິຖີຊີວິດໃໝ່. ໂດຍຜູ້ບໍລິໂພກຫວຽດນາມຊື້ເຄື່ອງອອນລາຍໂດຍສະເລ່ຍ 4 ຄັ້ງຕໍ່ເດືອນ, ເຊິ່ງນີ້ແມ່ນເພີ່ມຂຶ້ນເປັນສອງເທົ່າຈາກປີ 2023 ແລະ ຫຼາຍກວ່າສອງເທົ່າຂອງຈໍານວນຄັ້ງທີ່ຄົນໄປຊຸບເປີມາເກັດ.
ຈາກຜົນການສຳຫຼວດພົບວ່າຜູ້ຊົມໃຊ້ຊາວຫວຽດນາມ ໃຊ້ແພລັດຟອມອອນລາຍສະເລ່ຍ 3.2 ແພລັດຟອມສໍາລັບການສັ່ງຊື້ເຄື່ອງ. ໂດຍລາຄາສິນຄ້າທີ່ຖືກນັ້ນບໍ່ແມ່ນປັດໄຈຫຼັກທີ່ດຶງດູດຜູ້ບໍລິໂພກ, ແຕ່ມາຈາກການຊື້ສິນຄ້າເພື່ອສໍາຮອງໄວ້ໃຊ້ໃນຄອບຄົວ (25%) ແລະ ຕ້ອງການສິນຄ້າທີ່ຮີບດ່ວນ (21%).
ພຶດຕິກໍາການຊື້ນີ້ໄດ້ມີການປ່ຽນແປງໄປຈາກອະດີດ ເມື່ອຜູ້ບໍລິໂພກຊາວຫວຽດນາມໃຊ້ຊ່ອງທາງອອນລາຍເພື່ອຊື້ສິນຄ້າທີ່ບໍ່ຈຳເປັນເຊັ່ນ: ສິນຄ້າເອເລັກໂຕຣນິກ, ແຟຊັນ ຫຼື ເຄື່ອງໃຊ້ໃນເຮືອນ. ໃນປັດຈຸບັນ, ຜູ້ບໍລິໂພກຫັນມາຊື້ສິນຄ້າທີ່ຈຳເປັນຕ້ອງໃຊ້ໃນຊີວິດປະຈໍາວັນຫຼາຍຂຶ້ນ, ໂດຍສະເລ່ຍແມ່ນຊື້ສິນຄ້າປະມານ 6.5 ປະເພດ.
3 ກຸ່ມຜະລິດຕະພັນທີ່ມີການຊື້ສູງສຸດແມ່ນອາຫານ, ເຄື່ອງດື່ມ ແລະ ເຄື່ອງສໍາອາງ. ຮອງລົງມາແມ່ນຜະລິດຕະພັນແຟຊັນ, ຜະລິດຕະພັນກິລາ, ຜະລິດຕະພັນທີ່ໃຊ້ໃນຄົວເຮືອນ ແລະ ເຕັກໂນໂລຊີ.
ສຳລັບ 5 ແພລັດຟອມອີຄອມເມີດທີ່ໄດ້ຮັບຄວາມນິຍົມທີ່ສຸດແມ່ນ Shopee, Lazada, Tiki, Sendo ແລະ TikTok Shop. ໂດຍມູນຄ່າຂາຍຍ່ອຍໃນແພລັດຟອມອີຄອມເມີດຫວຽດນາມບັນລຸ 2,790 ລ້ານໂດລາ, ເຊິ່ງເພີ່ມຂຶ້ນ 78.7% ເມື່ອທຽບໃສ່ໄລຍະດຽວກັນຂອງປີ 2023.
ອີງຈາກຂໍ້ມູນຈາກສຳນັກງານສະຖິຕິຫວຽດນາມສະແດງໃຫ້ເຫັນວ່າ ອີຄອມເມີດຂອງຫວຽດນາມຍັງຄົງສືບຕໍ່ຂະຫຍາຍຕົວໄວກວ່າຕະຫຼາດຂາຍຍ່ອຍທົ່ວໄປ. ໂດຍຍອດຂາຍຍ່ອຍລວມທັງສິນຄ້າບໍລິໂພກ ແລະ ການບໍລິການໃນເຄິ່ງທໍາອິດຂອງປີ 2024 ເພີ່ມຂຶ້ນ 5.7% ຫຼັງຈາກຫັກປັດໄຈຂອງການເພີ່ມຂຶ້ນຂອງລາຄາຜະລິດຕະພັນ, ເຊິ່ງຕ່ຳກວ່າການເຕີບໂຕ 8.8% ໃນໄລຍະດຽວກັນຂອງປີກາຍ.
ຈາກຜົນຂອງການສໍາຫຼວດນີ້ສະແດງໃຫ້ເຫັນວ່າອີຄອມເມີດໄດ້ກາຍເປັນພາກສ່ວນໜຶ່ງທີ່ສຳຄັນໃນຊີວິດຂອງຜູ້ບໍລິໂພກຫວຽດນາມ, ບັນດາວິສາຫະກິດຕ້ອງປັບປ່ຽນກົນລະຍຸດເພື່ອຮອງຮັບການປ່ຽນແປງນີ້. ໂດຍການສຸມໃສ່ໄປທີ່ການນໍາສະເໜີຜະລິດຕະພັນທີ່ຫຼາກຫຼາຍ ຕອບສະໜອງຄວາມຕ້ອງການຂອງຜູ້ບໍລິໂພກ ແລະ ພັດທະນາລະບົບການຈັດສົ່ງທີ່ມີປະສິດທິພາບ.
ທັງນີ້, ຜູ້ບໍລິໂພກຫວຽດນາມຍັງໃຫ້ຄວາມສຳຄັນກັບລາຄາສິນຄ້າ, ຄວາມສະດວກ, ຄວາມໄວໃນການສົ່ງສິນຄ້າ. ສຳລັບທຸລະກິດທີ່ສາມາດຕອບສະໜອງຕໍ່ຄວາມຕ້ອງການທີ່ກ່າວມານີ້ໄດ້ ກໍຈະປະສົບຜົນສຳເລັດໃນຕະຫຼາດອີຄອມເມີດຫວຽດນາມ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
