ສປປ.ລາວ ມີແຫຼ່ງຜະລິດໄຟຟ້າທັງໝົດ 97 ແຫ່ງ ລວມກຳລັງຕິດຕັ້ງ 11.677 ເມກາວັດ, ຄວາມສາມາດຜະລິດພະລັງງານໄຟຟ້າ ທັງໝົດ 58.824 ກິກກາວັດໂມງຕໍ່ປີ. ຄົ້ນພົບຈຸດປາກົດແຮ່ທາດຫຼາຍກວ່າ 772 ຈຸດໃນຂອບເຂດທົ່ວປະເທດ.
ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງ, ຫົວໜ້າໂຄສົກປະຈຳກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ມາຮອດທ້າຍປີ 2023 ນີ້ ສປປ.ລາວ ມີແຫຼ່ງຜະລິດພະລັງງານໄຟຟ້າ ທີ່ມີກຳລັງຕິດຕັ້ງຕັ້ງແຕ່ 1 ເມກາວັດຂຶ້ນໄປ ທັງໝົດ 97 ແຫ່ງ. ໃນນີ້ ເປັນພະລັງງານນ້ຳ 80 ແຫ່ງ, ແສງຕາເວັນ 12 ແຫ່ງ, ຊີວະມວນ 4 ແຫ່ງ ແລະ ຄວາມຮ້ອນຖ່ານຫີນ 1ແຫ່ງ. ລວມກຳລັງຕິດຕັ້ງ 11.677,14 ເມກາວັດ,ຄວາມອາດສາມາດຜະລິດພະລັງງານໄຟຟ້າ ທັງໝົດ 58.824,27 ກິກກາວັດໂມງຕໍ່ປີ.
ທົ່ວປະເທດ ມີລະບົບສາຍສົ່ງແຮງສູງ ແຮງກາງ ແລະ ແຮງຕ່ຳ ຍາວ 67.643 ກວ່າກິໂລແມັດ,ມີສະຖານີຈ່າຍໄຟຟ້າ 81 ແຫ່ງ, ບັນດາແຂວງ ແລະ ເມືອງ ໃນຂອບເຂດທົ່ວປະເທດ ໄດ້ຊົມໃຊ້ໄຟຟ້າແບບຖາວອນ 100% ບ້ານ ກວມເອົາ 90% ແລະ 95% ຂອງຄົວເຮືອນທັງໝົດ.
ນອກຈາກນີ້ ການພັດທະນາໄຟຟ້າທົດແທນ ເປັນຕົ້ນການພັດທະນາໄຟຟ້າຈາກແສງຕາເວັນ ພະລັງງານຊີວະມວນ ພະລັງງານລົມ ແລະ ອື່ນໆ. ກໍໄດ້ຮັບຄວາມເອົາໃຈໃສ່ຢ່າງຕັ້ງໜ້າ. ພ້ອມດຽວກັນນີ້ ກໍໄດ້ຊຸກຍູ້ສົ່ງເສີມການຫັນເປັນພະລັງງານສະອາດ ໂດຍສະເພາະສົ່ງເສີມການນຳໃຊ້ພະລັງງານເຂົ້າໃນຂະແໜງຄົມມະນາຄົມຂົນສົ່ງ ແລະ ການສ້າງສະຖານີສາກລົດໄຟຟ້າ. ມາຮອດທ້າຍປີ 2023 ນີ້ ມີລົດໄຟຟ້າທັງໝົດປະມານ 4.631 ຄັນ, ໃນນີ້ ປະກອບມີລົດໃຫຍ່ ຈຳນວນ 2.592 ຄັນ, ລົດຈັກໄຟຟ້າ 2.039 ຄັນ.
ຂໍ້ມູນຈາກ: ເສດຖະກິດການຄ້າ
ຕິດຕາມຂ່າວທັງໝົດຈາກ LaoX: https://laox.la/all-posts/
