ລັດຖະບານກຳລັງພິຈາລະນາຂໍ້ສະເໜີເພີ່ມເງິນສະໜັບສະໜູນໃຫ້ພະນັກງານວິສາຫະກິດ ເພື່ອຊ່ວຍແກ້ໄຂຄ່າຄອງຊີບທີ່ເພີ່ມຂຶ້ນ.
ຂໍ້ສະເໜີດັ່ງກ່າວແມ່ນໄດ້ຖືກຈັດຂຶ້ນຢູ່ກອງປະຊຸມປະຈຳເດືອນ ສິງຫາ ຂອງ ລັດຖະບານ ທີ່ຂຶ້ນເມື່ອວັນຈັນທີ່ຜ່ານມາ.
ຄົນງານໃນລາວ ທີ່ຍັງໄດ້ຄ່າແຮງຕໍ່າ ຍັງຕ້ອງປະສົບກັບບັນຫາຄ່າຄອງຊີບທີ່ເພີ່ມຂຶ້ນ ສືບເນື່ອງຈາກ ໄພເງິນເຟີ້ສູງ ແລະ ການອ່ອນຄ່າຂອງເງິນກີບ.
ອັດຕາເງິນເຟີ້ ເດືອນກໍລະກົດ 2024 ຍັງສືບຕໍ່ເໜັງຕີງເພີ່ມຂຶ້ນຈາກເດືອນຜ່ານມາ ຢູ່ໃນລະດັບ 26,1% (ເດືອນມິຖຸນາ 2024 ຢູ່ໃນລະດັບ 26,2%). ທ່າມກາງ ການອ່ອນຄ່າຂອງເງິນກີບ ແລະ ລາຄານໍ້າມັນເຊື້ອໄຟທີ່ເພີ່ມຂຶ້ນໃນທົ່ວໂລກ.
ອີງຕາມທະນາຄານແຫ່ງ ສປປ ລາວ, ອັດຕາເງິນເຟີ້ໃນລາວ ໄດ້ບັນລຸເຖິງ 2 ຕົວເລກ ນັບຕັ້ງແຕ່ເດືອນພຶດສະພາ 2022 ແລະ ສູງສຸດ 41.26 ເປີເຊັນ ໃນເດືອນກຸມພາ 2023. ເຊິ່ງລັດຖະບານລາວ ວາງເປົ້າໝາຍ ທີ່ຈະດຶງອັດຕາເງິນເຟີ້ລົງມາເປັນຕົວເລກດຽວ ພາຍໃນທ້າຍປີນີ້. ເຖິງຢ່າງໃດກໍຕາມ, ເມື່ອບໍ່ດົນມານີ້, ຄະນະລັດຖະບານໄດ້ກ່າວຕໍ່ສະພາແຫ່ງຊາດວ່າບໍ່ມີທ່ອ່ຽງທີ່ຈະສາມາດ ບັນລຸຕາດເປົ້າໝາຍດັ່ງກ່າວໄດ້.
ໃນກອງປະຊຸມຂອງລັດຖະບານ ທ່ານນາຍົກລັດຖະມົນຕີ ສອນໄຊ ສີພັນດອນ ໄດ້ຍົກໃຫ້ເຫັນບັນດາຫົວຂໍ້ຮ້ອນທີ່ຕ້ອງສຸມໃສ່ແກ້ໄຂຢ່າງຮີບດ່ວນ, ໃນນັ້ນມີການທ້າທາຍດ້ານເສດຖະກິດ, ການເງິນ, ການສຶກສາ, ການອອກແຮງງານ, ຜົນກະທົບຈາກໄພທຳມະຊາດ ແລະ ບັນຫາສັງຄົມອື່ນໆ.
ອີງຕາມການລາຍງານຂອງ ໜັງສືີພີມ ວຽງຈັນທາມ, ບົດລາຍງານທີ່ນຳສະເໜີໃນກອງປະຊຸມສະໄໝສາມັນຂອງສະພາແຫ່ງຊາດເມື່ອບໍ່ດົນມານີ້ສະແດງໃຫ້ເຫັນວ່າ, ຄວາມຫຍຸ້ງຍາກດ້ານເສດຖະກິດໄດ້ກະທົບເຖິງການສຶກສາ. ອັດຕາການອອກໂຮງຮຽນໄດ້ບັນລຸລະດັບທີ່ໜ້າຕົກໃຈ, ເຮັດໃຫ້ເກີດຄວາມເປັນຫ່ວງຕໍ່ຊັບພະຍາກອນມະນຸດໃນອະນາຄົດ.
ຂະນະດຽວກັນ, ອັດຕາເງິນເຟີ້ສູງ ແລະ ການອ່ອນຄ່າຂອງເງິນກີບ ໝາຍຄວາມວ່າ ຄົນງານໄດ້ຮັບຄ່າຈ້າງໜ້ອຍລົງ, ເຮັດໃຫ້ຄວາມສາມາດໃນການໃຊ້ຈ່າຍຫຼຸດລົງ ອັນນຳມາສູ່ແຮງກົດດັນເຮັດໃຫ້ຫຼາຍຄົນໄປຊອກວຽກເຮັດງານທຳຢູ່ຕ່າງປະເທດ, ເຮັດໃຫ້ເກີດການຂາດແຄນແຮງງານພາຍໃນ.
ທີ່ມາ: Vientiane Times
https://www.vientianetimes.org.la/freefreenews/freecontent_165_Govt_mulls_y24.php
