ບໍລິສັດຈໍາປາຫອມການຄ້າຂາເຂົ້າ-ຂາອອກຈຳກັດຜູ້ດຽວ, ບໍລິສັດຜູ້ສົ່ງອອກເຂົ້າລາວ ເປີດເຜີຍວ່າ ຍັງຕ້ອງການເງິນທຶນເພື່ອຊື້ເຂົ້າ ແລະ ອຸປະກອນກະສິກຳເພື່ອຜະລິດເຂົ້າສົ່ງອອກໃຫ້ຫຼາຍຂຶ້ນ.
ທ່ານ ນາງ ບຸນຮຽງ ພົມມີໄຊ ຜູ້ອໍານວຍການບໍລິສັດ ກ່າວຕໍ່ວ່າ: ບໍລິສັດຫວັງວ່າຈະສົ່ງອອກເຂົ້າ ປະເພດ A ຈໍານວນ 1,000 ໂຕນ ອອກໄປປະເທດ ຝຣັ່ງ ແຕ່ຜ່ານການປະຕິບັດຕົວຈິງສາມາດ ສະໜອງໄດ້ພຽງ 50 ໂຕນ. ບໍລິສັດຍັງໄດ້ຂາຍເຂົ້າປະມານ 300 ໂຕນໃຫ້ແກ່ປະເທດເບວຢຽມ.
ທ່ານ ນາງ ບຸນຮຽງ ກ່າວຕື່ມວ່າ: ປັດຈຸບັນ ບໍລິສັດຮັບຊື້ເຂົ້າຈາກຊາວກະສິກອນຢູ່ເມືອງໄຊທານີ ແລະ ເມືອງປາກງື່ມ ນະຄອນຫຼວງວຽງຈັນ ເຊິ່ງເຮັດການປູກເຂົ້າໃນເນື້ອທີ່ປະມານ 600 ເຮັກຕາ ໃນອະນາຄົດເປົ້າໝາຍຂອງບໍລິສັດແມ່ນຈະຂະຫຍາຍເນື້ອທີ່ປູກເຂົ້າໃຫ້ໄດ້ປະມານ 7,400 ເຮັກຕາ ແລະ ຊື້ອຸປະກອນເປັນມູນຄ່າ 192 ຕື້ກີບ. ທາງບໍລິສັດຫວັງຈະຊື້ ແລະ ສົ່ງອອກເຂົ້າທີ່ປູກຢູ່ໃນ ນະຄອນຫຼວງວຽງຈັນ ແລະ ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ.
ປັດຈຸບັນທາງບໍລິສັດ ຈຳປາຫອມ ມີເຄື່ອງກ່ຽວເຂົ້າຢູ່ປະມານ 2 ເຄື່ອງ ມີໂຮງສີເຂົ້າທີ່ສາມາດແປຮູບເຂົ້າເປືອກໄດ້ 1,5 ໂຕນຕໍ່ຊົ່ວໂມງ ແລະ ເຄື່ອງອົບເຂົ້າເປືອກທີ່ສາມາດອົບແຫ້ງໄດ້ຄັ້ງລະ 48 ໂຕນ.
ທ່ານ ນາງ ບຸນຮຽງ ກ່າວວ່າ “ແນວໃດກໍດີ, ພວກເຮົາຕ້ອງການເຄື່ອງເກັບກ່ຽວເຂົ້າອີກ 3 ເຄື່ອງ, ແລະ ເຄື່ອງອົບເຂົ້າແຫ້ງ 2 ເຄື່ອງ ທີ່ສາມາດຮັບນ້ຳໜັກ 30 ໂຕນຕໍ່ຄັ້ງ. ພວກເຮົາຍັງຕ້ອງການຮ້ານປູກເຂົ້າ ແລະ ຂັດເຂົ້າ, ບ່ອນອົບເຂົ້າແຫ້ງ ແລະ ອຸປະກອນອື່ນໆ ພ້ອມທັງທຶນຮອນເພື່ອເກັບຊື້ເຂົ້າຈາກຊາວກະສິກອນ,”
ບໍລິສັດໄດ້ຮັບທຶນຊ່ວຍເຫຼືອລ້າ 125.000 ໂດລາສະຫະລັດ ຈາກໂຄງການກະສິກຳການຄ້າ ແລະ ເງິນກູ້ອີກ 4 ຕື້ກວ່າກີບ ທີ່ລັດຖະບານຈັດສັນມາມອບໃຫ້ສະເພາະ SMEs ພາຍໃນປະເທດ.
ຢ່າງໃດກໍຕາມ ເງິນທອນດັ່ງກ່າວ ກໍເບິ່ງຄືວ່າຈະຍັງບໍ່ພຽງພໍ ໃນສະພາບການປັດຈຸບັນ ໂດຍທ່ານ ນາງ ບຸນຮຽງ ກ່າວວ່າ: “ຍ້ອນຕົ້ນທຶນການຜະລິດທີ່ສູງຂຶ້ນ ແລະ ຄວາມປາຖະໜາຂອງບໍລິສັດທີ່ຈະຜະລິດເຂົ້າຫຼາຍຂື້ນເພື່ອສະໜອງພາຍໃນ ແລະ ສົ່ງອອກ, ຈຶ່ງຍັງຕ້ອງການເງິນທຶນຫຼາຍຂຶ້ນ”
ການເພີ່ມຂຶ້ນຂອງລາຄາປຸ໋ຍ, ຢາປາບສັດຕູພືດ, ຢາຂ້າເຊື້ອລາ ແລະ ຢາຂ້າຫຍ້າ ແມ່ນສາເຫດຫຼັກທີ່ເຮັດໃຫ້ລາຄາເຂົ້າທີ່ວາງຂາຍໃນຕະຫຼາດເພີ່ມຂຶ້ນ, ໃນຂະນະທີ່ເກືອບທຸກສິ່ງທີ່ຕ້ອງການໃນຂະບວນການຜະລິດແມ່ນຍັງຕ້ອງນໍາເຂົ້າ.
ລາຄາເຂົ້າໃນຕະຫຼາດໄດ້ເພີ່ມຂຶ້ນຈາກ 7,000-8,000 ກີບຕໍ່ກິໂລໃນປີ 2021 ມາເປັນເກືອບ 17,000-18,000 ກີບໃນປັດຈຸບັນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
