ເອີ້ນໄດ້ວ່າຍັງຢູ່ກັນຕ່າງລະດັບ ສປ ຈີນ ແລະ ສປປ ລາວ, ຮ່ອງກົງ ແລະ ຟີລິບປິນ ໃນການແຂ່ງຂັນ ບານເຕະຍິງ ຊິງແຊ້ມເອເຊຍ ຮຸ່ນອາຍຸບໍ່ເກີນ 20 ປີ ຮອບຄັດເລືອກ ກຸ່ມ A ຫຼັງນັກເຕະຂອງຈີນ ຍິງປະຕູໄປເຖິງ 20 ປະຕູ ແລະ ບໍ່ເສຍແມ່ນແຕ່ປະຕູດຽວ ຈາກການລົງຫຼິ້ນ 3 ນັດ ເກັບ 9 ຄະແນນເຕັມ ຜ່ານເຂົ້າຮອບໄປໃນຖານະ ແຊ້ມຂອງກຸ່ມນີ້.
ຈົບລົງແລ້ວ ໃນການແຂ່ງຂັນ ບານເຕະຍິງ ຊິງແຊ້ມເອເຊຍ ຮຸ່ນອາຍຸບໍ່ເກີນ 20 ປີ ຮອບຄັດເລືອກ ທີ່ ສປປ ລາວ ເປັນເຈົ້າພາບ ໃນລະຫວ່າງວັນທີ 8 ຫາ 12 ມີນາ ທີ່ຜ່ານມານີ້ ໂດຍໃນກຸ່ມນີ້ມີທັງໝົດ 4 ທີມຊາດ ປະກອບມີ: ສປປ ລາວ, ຟິລິບປິນ, ຮ່ອງກົງ ແລະ ສປ ຈີນ. ເຊິ່ງການແຂ່ງຂັນທຸກຄູ່ ແມ່ນໄດ້ມີຂຶ້ນທີ່ສະໜາມກິລາແຫ່ງຊາດ ຫຼັກ 16 ປະເທດລາວ.
ໂດຍຜ່ານການແຂ່ງຂັນທັງໝົດ ເປັນຝ່າຍຂອງນັກເຕະຈາກ ສປ. ຈີນ ທີ່ເຮັດຜົນງານໄດ້ໂດດເດັ່ນກວ່າໝູ່ ຈາກການຊະນະທັງໝົດ 3 ນັດ ຍິງໄປຫຼາຍເຖິງ 20 ປະຕູ. ໂດຍເລີ່ມຕົ້ນຈາກການເອົາຊະນະ ຟິລິບປິນ 6-0; ເອົາຊະນະ ຮ່ອງກົງ 6-0 ແລະ ຕົບທ້າຍດ້ວຍການເອົາຊະນະ ສປປ ລາວ ໄປ 8 ປະຕູຕໍ່ 0.
![ບານເຕະຍິງ](https://laox.la/wp-content/uploads/2023/03/image-121.png)
ຈົບການແຂ່ງຂັນທັງໝົດ 6 ນັດ ຜົນປາກົດວ່າ ອັນດັບ 1 ໄດ້ແກ່ ສປ ຈີນ ມີທັງໝົດ 9 ຄະແນນ, ອັນດັບ 2 ຕົກເປັນຂອງ ຟິລິບປິນ ມີທັງໝົດ 4 ຄະແນນ, ອັນດັບ 3 ຮ່ອງກົງ 2 ຄະແນນ ແລະ ສປປ ລາວ ຕົກເປັນອັນດັບສຸດທ້າຍ ດ້ວຍຜົນງານລົງແຂ່ງ 3 ນັດ ສະເໝີ 1, ປະລາໄຊ 2. ເກັບໄດ້ 1 ຄະແນນ, ຍິງປະຕູໄປ 2 ປະຕູ ແລະ ເສຍປະຕູໄປເຖິງ 11 ປະຕູ.
![ບານເຕະຍິງ](https://laox.la/wp-content/uploads/2023/03/image-122.png)
ສຳລັບວົງການບານເຕະຍິງ ຂອງ ສປ ຈີນ ນັ້ນ ຖືໄດ້ວ່າແຕກຕ່າງຈາກ ບານເຕະຊາຍ ເນື່ອງຈາກວ່າ ບານເຕະຍິງຂອງ ສປ ຈີນ ແມ່ນມີອັນດັບ ໃນ FIFA RANKING ເຖິງ ອັນດັບທີ 14 ຂອງໂລກ ແຊງໜ້າຊາດຢູໂຣບຫຼາຍໆ ຊາດ ແລະ ໃນທະວີບເອເຊຍ ແມ່ນເປັນຮອງພຽງ ເກົາຫຼີເໜືອ ແລະ ຍີ່ປຸ່ນ ເທົ່ານັ້ນ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/