ການຄາດການຂອງນັກວິເຄາະ ແລະ ທາງການໄດ້ຊີ້ໃຫ້ເຫັນວ່າ ການເຕີບໂຕທາງເສດຖະກິດໃນອາຊີຕາເວັນອອກສຽງໃຕ້ມີທ່າອ່ຽງທີ່ຈະເພີ່ມຂຶ້ນໃນປີໜ້າ. ແຕ່ສະພາບເສດຖະກິດມະຫາພາກທີ່ຜັນຜວນ ອາດຈະເຮັດໃຫ້ຫຼາຍປະເທດປະເຊີນກັບພາວະເສດຖະກິດທີ່ມີການເຕີບໂຕແບບບໍ່ຕໍ່ເນື່ອງ.
ນັກວິເຄາະເສດຖະສາດອາຊີທ່ານໜຶ່ງກ່າວວ່າ “ກຸ່ມປະເທດທີ່ເສດຖະກິດທີ່ເພິ່ງພາກັບການສົ່ງອອກນັ້ນ ໂດຍສະເພາະແມ່ນແມ່ນສິງກະໂປ, ຫວຽດນາມ, ມາເລເຊຍ ແລະ ໄທ ແມ່ນຍັງບໍ່ທັນພົ້ນພາວະອັນຕະລາຍ. ພວກເຮົາຄາດຫວັງວ່າໃນປີຫນ້າ, ວົງຈອນການຄ້າທົ່ວໂລກຈະຄ່ອຍດີຂຶ້ນຢ່າງຊ້າໆ ແລະ ເມື່ອຮອດເວລານັ້ນ ຫຼັງຈາກທີ່ວົງຈອນການຄ້າຟື້ນຕົວ, ນີ້ຈຶ່ງຈະເຮັດໃຫ້ການຄ້າໃນອາຊຽນສາມາດຟື້ນຕົວຂຶ້ນໄດ້ພໍປະມານ”
ໃນວັນພຸດທີ່ຜ່ານມາ, ລັດຖະບານສິງກະໂປໄດ້ມີການເປີດເຜີຍວ່າ ໃນປີ 2024 ເສດຖະກິດສິງກະໂປຈະເຕີບໂຕ 1% – 3% ຕາມທີ່ຄາດກັນໄວ້, ເນື່ອງຈາກຄວາມຕ້ອງການດ້ານເອເລັກໂຕຣນິກທົ່ວໂລກຈະຟື້ນຕົວຂຶ້ນ. ໃນຂະນະທີ່ກອງທຶນການເງິນສາກົນ (IMF) ຄາດການໃນເດືອນຕຸລາວ່າ ເສດຖະກິດສິງກະໂປໃນປີໜ້າຈະເຕີບໂຕ 2,1%.
ການຄາດຄະເນຢ່າງເປັນທາງການສະແດງໃຫ້ເຫັນວ່າ ເສດຖະກິດຂອງສິງກະໂປໃນປີໜ້າຈະແຂງແຮງກວ່າການຄາດການຂອງປີນີ້, ເຊິ່ງຢູ່ທີ່ປະມານ 1%. ແຕ່ເຈົ້າໜ້າທີ່ສິງກະໂປຍັງຄົງມີຄວາມກັງວົນຕໍ່ປັດໄຈຕ່າງປະເທດ.
Gabriel Lim ລັດຖະມົນຕີປະຈຳກະຊວງການຄ້າ ແລະ ອຸດສາຫະກຳ ສິງກະໂປ ກ່າວວ່າ
“ເມື່ອພິຈາລະນາເຖິງທ່າອ່ຽງໃນປີຫນ້າ, ການເຕີບໂຕຂອງ GDP ໃນປະເທດເສດຖະກິດຂະໜາດໃຫຍ່ເຊັ່ນ: ສະຫະລັດ ແລະ ຢູໂຣໂຊນ (Eurozone) ມີທ່າອ່ຽງທີ່ຈະຊ້າລົງຕື່ມອີກໃນເຄິ່ງທໍາອິດຂອງປີ 2024, ຄວາມກົດດັນຈາກເງື່ອນໄຂທາງດ້ານການເງິນທີ່ເຄັ່ງຄັດຢ່າງຕໍ່ເນື່ອງ. ການເຕີບໂຕທາງເສດຖະກິດຂອງຈີນມີທ່າອ່ຽງຈະຊ້າລົງໃນປີ 2024, ເມື່ອພິຈາລະນາເຖິງການຄົງຕົວຂອງຂະແໜງອະສັງຫາລິມະຊັບ ແລະ ການບໍລິໂພກພາຍໃນປະເທດ”
ໃນປີນີ້, ເສດຖະກິດຈະຊະລໍຕົວລົງຍ້ອນການເຂັ້ມງວດທາງດ້ານການເງິນຂອງ Fed ແລະ ການຟື້ນຟູທີ່ຫຼ້າຊ້າຂອງຈີນຈາກວິກິດການ Covid-19 ໄດ້ສົ່ງຜົນກະທົບອັນໃຫຍ່ຫຼວງຕໍ່ເສດຖະກິດຂອງອາຊີຕາເວັນອອກສຽງໃຕ້ ໂດຍສະເພາະແມ່ນການຄ້າ
ຕົວເລກ GDP ຂອງສິງກະໂປໃນໄຕມາດເດືອນກໍລະກົດຫາເດືອນກັນຍາ ທີ່ໄດ້ມີການເຜີຍແຜ່ໃນວັນພຸດວານນີ້ ສະແດງໃຫ້ເຫັນວ່າ, ການສົ່ງອອກບໍ່ນ້ຳມັນພາຍໃນປະເທດຫຼຸດລົງ 18,8% ເມື່ອທຽບໃສ່ປີກາຍ. ເຖິງແມ່ນວ່າການຂະຫຍາຍຕົວຂອງ GDP ໂດຍທົ່ວໄປຈະຟື້ນຕົວເຖິງ 1.1% ຈາກ 0.5% ໃນໄຕມາດທີສອງ.
ສຳລັບເສດຖະກິດໃນປະເທດໄທ ແລະ ອິນໂດເນເຊຍ ໄດ້ມີການເຕີບໂຕຊ້າລົງໃນໄຕມາດທີ 3 ຂອງປີ 2023 (ກໍລະກົດຫາເດືອນກັນຍາ) ໃນລະດັບ 1.5% ແລະ 4.9% ຕາມລຳດັບ, ເຊິ່ງໄດ້ຮັບແຮງກົດດັນຈາກຄວາມຕ້ອງການຕ່າງປະເທດທີ່ອ່ອນລົງ ເຮັດໃຫ້ຕົວເລກທັງສອງແມ່ນຕໍ່າກວ່າຄວາມຄາດຫວັງຂອງຕະຫຼາດ.
ກຸ່ມນັກວິເຄາະ BMI ກ່າວວ່າ “ພວກເຮົາໄດ້ປະເມີນເສດຖະກິດໄທສູງເກີນໄປໃນປີນີ້ ແລະ ພວກເຮົາໄດ້ຫຼຸດການຄາດການຂອງເສດຖະກິດໄທໃນປີ 2023 ຈາກການເຕີບໂຕ 2,8% ເປັນ 2,5%. ໂດຍເສດຖະກິດຂອງໄທຈະເຕີບໂຕ 3,8% ໃນປີ 2024. ການເຕີບໂຕຊ້າຂອງເສດຖະກິດໄທນັ້ນໝາຍຄວາມວ່າມີໂອກາດທີ່ຈະເຕີບໂຕຫຼາຍຢ່າງ”
ໃນບົດລາຍງານຂອງ HSBC ໃນເດືອນນີ້ ໄດ້ມີການຄາດການວ່າ GDP ຂອງກຸ່ມເສດຖະກິດຂະໜາດໃຫຍ່ 6 ປະເທດໃນອາຊຽນໄດ້ແກ່: ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ, ໄທ ແລະ ຫວຽດນາມ ຈະມີການເຕີບໂຕຢູ່ທີ່ 4,6% ໃນປີ 2024, ເພີ່ມຂຶ້ນຈາກ 4% ໃນປີນີ້ ແລະ ມີທ່າອ່ຽງທີ່ແຕກຕ່າງກັນໄປໃນແຕ່ລະປະເທດ. ສຳລັບສິງກະໂປແມ່ນຢູ່ທີ່ 2,4% ແລະ 6,3% ແມ່ນຂອງຫວຽດນາມ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
