S&P Global Ratings ລາຍງານວ່າ ບໍລິສັດຜະລິດ semiconductor ຈາກໄຕ້ຫວັນ Taiwan Semiconductor Manufacturing Company (TSMC) ກໍາລັງປະເຊີນກັບການຂາດແຄນນໍ້າທ່າມກາງເຕັກໂນໂລຊີໃນການຜະລິດທີ່ມີຄວາມກ້າວໜ້າຂຶ້ນ.
TSMC ເປັນຜູ້ຜະລິດຊິບທີ່ໃຫຍ່ທີ່ສຸດທຽບເທົ່າກັບ Nvidia ແລະ Apple ຊິບ ຫຼື semiconductors ທີ່ຖືກນໍາໃຊ້ໃນທຸກສິ່ງທຸກຢ່າງນັບຕັ້ງເເຕ່ໂທລະສັບໄປຈົນເຖິງໂທລະພາບ. ເຊິ່ງໃນຂັ້ນຕອນການຜະລິດຊິບຈະໃຊ້ນ້ຳໃນປະລິມານມະຫາສານ ເພື່ອເຮັດໃຫ້ເຄື່ອງຈັກເຢັນ ແລະ ລ້າງເເຜງຊິບໃຫ້ສະອາດ. ໂດຍຊິບ ແລະ ນໍ້າເເມ່ນຂອງຄູ່ກັນ, ເນື່ອງຈາກນ້ຳຈະຕ້ອງເປັນນ້ຳບໍລິສຸດທີ່ໄດ້ຜ່ານຂະບວນການກັ່ນຕອງຈົນມີຄ່າຄວາມບໍລິສຸດສູງເປັນພິເສດ (ultrapure water) ເພື່ອໃຊ້ໃນການລ້າງແຜງຊິບ, ຖ້າຫາກເປັນຊິບທີ່ລ້ຳສະໄໝ ກໍຕ້ອງມີຂັ້ນຕອນໃນການຜະລິດຫຼາຍຂຶ້ນ ນັ້ນໝາຍຄວາມວ່າເຮົາຈະຕ້ອງໃຊ້ນ້ຳໃນປະລິມານຫຼາຍຂຶ້ນນັ້ນເອງ.
ອີງຈາກຂໍ້ມູນຂອງ S&P ໄດ້ເປີດເຜີຍວ່າ ການໃຊ້ນ້ຳເຂົ້າໃນການຜະລິດຊິບຂອງ TSMC ໄດ້ເພີ່ມຂຶ້ນເຖິງ 35% ໃນປີ 2015, ຫຼັງຈາກທີ່ບໍລິສັດໄດ້ຫັນມາໃຊ້ເຕັກໂນໂລຊີໃນການຜະລິດຊິບແບບ node ຂະໜາດ 16 nm.
ການໃຊ້ນ້ຳໃນທົ່ວໂລກສຳລັບການຜະລິດຊິບແມ່ນທຽບເທົ່າກັບການບໍລິໂພກນ້ຳທັງໝົດໃນປະເທດຮ່ອງກົງ. ທັງນີ້, TSMC ທີ່ເປັນຜູ້ຜະລິດຊິບລາຍໃຫຍ່ ຖ້າຫາກຂາດແຄນຊັບພະຍາກອນນໍ້າ ທົ່ວໂລກຈະຕ້ອງປະເຊີນກັບການຂາດແຄນຊິບ. ເນື່ອງຈາກວ່າ TSMC ໄດ້ມີການຜະລິດຊິບເພື່ອເເຈກຈ່າຍໃຫ້ໃຊ້ທົ່ວໂລກໃນດ້ານ AI ເເລະ ຄອມພິວເຕີ quantum ກວມເອົາ 90% ຈາກທັງໝົດ.
ນອກຈາກນີ້, S&P ຈຶ່ງໄດ້ແນະນໍາໃຫ້ບໍລິສັດ TSMC ສຸມໃສ່ການຜະລິດຊິບທີ່ມີປະສິດທິພາບຫຼາຍຂຶ້ນແທນທີ່ຈະເປັນຊິບເເບບເກົ່າ, ໃນໄລຍະເວລາທີ່ຊັບພະຍາກອນນໍ້າມີຈໍາກັດເພື່ອຊ່ວຍໃຫ້ສາມາດສ້າງລາຍໄດ້ຫຼາຍຂຶ້ນ.
“ຄວາມໝັ້ນຄົງທາງນ້ຳຈະເປັນປັດໄຈທີ່ສໍາຄັນຫຼາຍຂຶ້ນໃນຮູບແບບສິນເຊື່ອຂອງບໍລິສັດ semiconductor. ການຄຸ້ມຄອງຊັບພະຍາກອນນໍ້າທີ່ບໍ່ຖືກຕ້ອງສາມາດຂັດຂວາງການດໍາເນີນງານຂອງບໍລິສັດ ເຊິ່ງຈະສົ່ງຜົນກະທົບທາງລົບຕໍ່ການດຳເນີນງານທາງດ້ານການເງິນ ແລະ ອາດຈະສົ່ງຜົນກະທົບຕໍ່ຄວາມສຳພັນກັບລູກຄ້າ.”
ທັງນີ້, ການປ່ຽນແປງຂອງດິນຟ້າອາກາດທີ່ເພີ່ມຂຶ້ນໃນລະດັບທີ່ຮ້າຍແຮງ, ຄວາມຖີ່ຂອງໄພແຫ້ງແລ້ງ ແລະ ການຜັນຜວນຂອງປະລິມານນ້ຳຝົນ ເຮັດໃຫ້ເກີດຂໍ້ຈຳກັດສຳລັບການຜະລິດຊິບ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
