ເມື່ອບໍ່ດົນມານີ້, ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ພົບປະສອງຝ່າຍກັບ ທ່ານ Uh Soo Bong ປະທານອົງການບໍລິການພັດທະນາຊັບພະຍາກອນມະນຸດເກົາຫລີໃຕ້ (HRD Korea) ເພື່ອເປັນການແລກປ່ຽນການຮ່ວມມື ໃນການຈັດສົ່ງແຮງງານລາວໄປເຮັດວຽກ ໃນລະບົບການຈ້າງງານ (EPS) ແລະ ວຽກງານການພັດທະນາສີມືແຮງງານ, ພ້ອມຂໍ້ສະດວກ, ຂໍ້ຫຍຸ້ງຍາກ ທີ່ສອງຝ່າຍຈະຕ້ອງໄດ້ພ້ອມກັນແກ້ໄຂ ແລະ ວາງແຜນການຮ່ວມກັນໃນຕໍ່ໜ້າ.
ທ່ານ ພົງໄຊສັກ ອິນຖາລາດ ໃຫ້ຮູ້ວ່າ: ການຈັດສົ່ງແຮງງານລະບົບ EPS ແມ່ນການຮ່ວມມືລະຫວ່າງກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ກະຊວງການຈ້າງງານ ແລະ ແຮງງານ ແຫ່ງ ສ ເກົາຫຼີ ໂດຍໄດ້ຮ່ວມກັນລົງນາມບົດບັນທຶກຄວາມເຂົ້າໃຈ ວ່າດ້ວຍການຈັດສົ່ງແຮງງານລາວໄປເຮັດວຽກຢູ່ ສ ເກົາຫຼີ ຕາມລະບົບ EPS ໃນເດືອນ ກັນຍາ 2016 ຜ່ານມາ. ການຈັດສົ່ງແຮງງານໄປເຮັດວຽກຜ່ານລະບົບນີ້ ແມ່ນປະຕິບັດຕາມລະບົບຂອງ ສ ເກົາຫຼີ ທີ່ເອີ້ນວ່າ Employment Permit System (EPS) ທຸກປະເທດທີ່ສົ່ງແຮງງານເຂົ້າໄປເຮັດວຽກຢູ່ປະເທດດັ່ງກ່າວ ຕ້ອງໄດ້ປະຕິບັດຕາມລະບົບການອະນຸຍາດຈ້າງງານຢ່າງເຄັ່ງຄັດ ແລະ ເປັນເອກະພາບກັນ ບໍ່ມີກໍລະນີຍົກເວັ້ນໃຫ້ປະເທດໃດປະເທດໜຶ່ງເປັນພິເສດ. ພ້ອມນີ້, ແຮງງານທຸກຄົນຕ້ອງໄດ້ຜ່ານການເສັງຄັດເລືອກດ້ານພື້ນຖານພາສາເກົາຫຼີ ແລະ ສອບສຳພາດຜ່ານທາງດ້ານທັກສະ ແລະ ນາຍຈ້າງເປັນຜູ້ຄັດເລືອກເອົາຜູ້ທີ່ໄດ້ຜ່ານການສອບເສັງ. ນອກຈາກນັ້ນ, ຜູ້ທີ່ເສັງຜ່ານຕ້ອງໄດ້ເຂົ້າຮຽນຫຼັກສູດວັດທະນະທຳ ແລະ ພາສາເກົາຫຼີ 45 ຊົ່ວໂມງ, ເຝິກອົບຮົມກ່ອນການເດີນທາງ ແລະ ກວດສຸຂະພາບ ກ່ອນເດີນທາງໄປເຮັດວຽກຢູ່ ສ ເກົາຫຼີ ພາຍໃຕ້ການອະນຸຍາດຂອງກະຊວງແຮງງານ ແລະ ສະຫວັດດີການສັງຄົມ. ພ້ອມນີ້ ຜູ້ທີ່ເສັງຜ່ານຕ້ອງມີສຸຂະພາບແຂງແຮງຕາມເງື່ອນໄຂ ທີ່ ສ ເກົາຫຼີ ກໍານົດ.
ການໄປເຮັດວຽກຕາມລະບົບການອະນຸຍາດຈ້າງງານ (EPS) ແມ່ນມີໄລຍະ 3 ປີ ແລະ ສາມາດຕໍ່ໄດ້ອີກ 1 ປີ 10 ເດືອນ ພາຍຫຼັງທີ່ຄົບສັນຍາ, ເດີນທາງກັບຄືນປະເທດ ແລະ ສາມາດສອບເສັງໄປໃໝ່ໄດ້. ສຳລັບສະຖິຕິການຈັດສົ່ງແຮງງານໄປເຮັດວຽກຢູ່ ສ ເກົາຫຼີ ນັບແຕ່ປີ 2018 ຫາ ປັດຈຸບັນ ແມ່ນສາມາດຈັດສົ່ງແຮງງານໄປເຮັດວຽກທີ່ ສ ເກົາຫຼີ ຕາມລະບົບການຈ້າງງານ ໄດ້ທັງໝົດຈໍານວນ 1.119 ຄົນ, ຍິງ 79 ຄົນ.
ສປປ ລາວ ຍັງມີຂໍ້ຫຍຸ້ງຍາກ ຫຼາຍດ້ານໃນການຈັດສົ່ງແຮງງານໄປເຮັດວຽກຕາມລະບົບການອະນຸຍາດຈ້າງງານ ເປັນຕົ້ນແມ່ນ ແຮງງານຕ້ອງໄດ້ຜ່ານການສອບເສັງພາສາ ແລະ ທັກສະທີ່ຈໍາເປັນ, ເຊິ່ງເຫັນວ່າແຮງງານທີ່ອາໄສຢູ່ຕ່າງແຂວງ ສ່ວນຫຼາຍແມ່ນຜູ້ທຸກຍາກ ແລະ ເຂດຫ່າງໄກສອກຫຼີກ ພົບຄວາມຫຍຸ້ງຍາກໃນການເຂົ້າເຖິງ ສະຖານທີ່ຮຽນພາສາເກົາຫຼີ ເພື່ອເຂົ້າສອບເສັງ; ການຄຸ້ມຄອງແຮງງານຍັງມີຄວາມຫຍຸ້ງຍາກ ໂດຍສະເພາະການເກັບກໍາຂໍ້ມູນແຮງງານທີ່ສິ້ນສຸດສັນຍາ, ຕໍ່ສັນຍາ ຫລື ຍົກເລີກສັນຍາກັບຄືນປະເທດ; ແຮງງານລາວ ໂດຍສະເພາະເພດຍິງຜູ້ທີ່ສອບເສັງຜ່ານ ແມ່ນຍັງລໍຖ້າການຖືກຄັດເລືອກຈາກນາຍຈ້າງ ເປັນຈໍານວນຫຼາຍ ຖ້າທຽບກັບ ອັດຕາສ່ວນແຮງງານເພດຊາຍ ທີ່ຖືກຄັດເລືອກ; ອີງໃສ່ສະພາບປັດຈຸບັນເຫັນວ່າການຈອງຖ້ຽວບິນເດີນທາງແມ່ນບໍ່ສາມາດໄດ້ຕາມຈຳນວນທີ່ຝ່າຍເກົາຫຼີກຳນົດ ເພາະເປັນລະດູການທ່ອງທ່ຽວ ເຮັດໃຫ້ນັກທ່ອງທ່ຽວເກົາຫລີ ເຂົ້າມາ ສປປ ລາວ ຈຳນວນຫຼາຍ ເຮັດໃຫ້ທີ່ນັ່ງໃນແຕ່ລະມື້ເຫຼືອຈຳນວນໜ້ອຍ.
ຕໍ່ກັບຂໍ້ຫຍຸ້ງຍາກດັ່ງກ່າວ, ທ່ານຮອງລັດຖະມົນຕີ ກະຊວງ ຮສສ ໄດ້ສະເໜີໃຫ້ອົງການບໍລິການພັດທະນາຊັບພະຍາກອນມະນຸດ ສ ເກົາຫຼີ ເພີ່ມທະວີການຮ່ວມມືດ້ານການແລກປ່ຽນຂໍ້ມູນຂ່າວສານ ເປັນຕົ້ນ ຂໍ້ມູນຂອງແຮງງານທີ່ສິ້ນສຸດສັນຍາ, ຕໍ່ສັນຍາ ຫຼື ຍົກເລີກສັນຍາກັບຄືນປະເທດ ແລະ ອື່ນໆ; ພິຈາລະນາໃຫ້ການຊ່ວຍເຫຼືອ ແລະ ອໍານວຍຄວາມສະດວກ ເພີ່ມຕື່ມໃນການຊ່ວຍເຫຼືອແຮງງານລາວ ໃນໄລຍະເຮັດວຽກທີ່ ສ ເກົາຫຼີ ເປັນຕົ້ນ ການໃຫ້ການຊ່ວຍເຫຼືອແກ່ແຮງງານ ໃນກໍລະນີມີຂໍ້ຂັດແຍ້ງກັບນາຍຈ້າງ, ຕ້ອງການປ່ຽນໜ້າວຽກ; ຊຸກຍູ້ນາຍຈ້າງ ໃນການນໍາໃຊ້ແຮງງານເພດຍິງຫຼາຍຂຶ້ນຕື່ມ ແລະ ຂໍເພີ່ມການຈັດສົ່ງແຮງງານລາວໄປເຮັດວຽກຢູ່ ສ ເກົາຫຼີ ຕາມລະບົບ EPS ຈາກ 500 ຄົນ/ປີ ເພີ່ມເປັນ 2.000 ຄົນ/ປີ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
