ເອີ້ນໄດ້ວ່າເປັນອີກໜຶ່ງຂ່າວດີສຳລັບວົງການພໍ່ຄ້າ ແມ່ຄ້າຊາວຂາຍ ຫຼື ບັນດາທຸລະກິດທີ່ໃຊ້ບໍລິການ Google Ads ໃນການລົງໂຄສະນາຂອງຕົນເອງ ໃນແພລັດຟອມ Google ເພາະຫຼ້າສຸດ Google ໄດ້ເປີດຕົວເຄື່ອງມື AI ຕົວໃໝ່ໃນ Google Ads ເຊິ່ງມີຄວາມສາມາດໃນການຊ່ວຍຄິດແຄັບຊັນໂຄສະນາ ແຖມອອກແບບຮູບພາບໃຫ້ອີກນຳ.
ໂດຍເຄື່ອງມື AI ໃນ Google Ads ຕົວໃໝ່ນີ້ມີຄວາມສາມາດໃນການແນະນໍາການລົງໂຄສະນາໃນແພລັດຟອມ Google ແບບອັດຕະໂນມັດ ບໍ່ວ່າຈະເປັນການຄິດການພາດຫົວຂໍ້ໂຄສະນາ ຄຳອະທິບາຍ ແລະ ລວມຮູບພາບ ໂດຍອາໄສຂໍ້ມູນຈາກຈາກເວັບໄຊ Landing Page ເຊິ່ງມີຂໍ້ມູນຂອງສິ່ງທີ່ຄົນເຮັດທຸລະກິດຕ້ອງລົງໂຄສະນາ.
ລວມໄປຮອດໃຫ້ ເທັກໂນໂລຢີ ປັນຍາປະດິດ ນີ້ຊ່ວຍຄິດໄອເດຍຂອງໂຄສະນາ ຈາກຂໍ້ມູນທີ່ລະບຸໄວ້ໄດ້ເຊັ່ນດຽວກັນ ເຊິ່ງ Google ລະບຸວ່າ AI ຈະຊ່ວຍຄິດໄອເດຍໄດ້ຄືກັບການປຶກສາເພື່ອນຮ່ວມງານຄົນໜຶ່ງ ລວມເຖິງຖ້າບໍ່ພໍໃຈກັບສິ່ງທີ່ AI ຄິດຂຶ້ນມາ ກໍສາມາດແກ້ໄຂໄດ້ ກ່ອນທີ່ຈະເຮັດໂຄສະນາຂຶ້ນໄປສະແດງແທ້ຢູ່ເທິງລະບົບຂອງ Google.
ນອກຈາກນີ້ Google ຍັງໄດ້ເພີ່ມຄວາມສາມາດທາງດ້ານ Generative AI ໃຫ້ກັບ Performance Max ເຊິ່ງເປັນຮູບແບບການລົງໂຄສະນາໃນແພລັດຟອມທີ່ຫຼາກຫຼາຍຂອງ Google ໂດຍ Performance Max ຮຸ່ນໃໝ່ນີ້ຈະສາມາດຄິດພາດຫົວຄໍາໂຄສະນາ ຄໍາອະທິບາຍຕ່າງໆ ໄດ້ຈາກຂໍ້ມູນຈາກ ເວັບໄຊ Landing Page ທີ່ລະບຸໄວ້ຄືກັບເຄື່ອງມື AI ທີ່ແນະນຳການລົງໂຄສະນາແບບອັດຕະໂນມັດ.
ໂດຍ Google ບອກວ່າ ເຄື່ອງມືເຫຼົ່ານີ້ ຈະຊ່ວຍໃຫ້ຄົນທີ່ເຮັດທຸລະກິດ ປະຢັດງົບປະມານທາງການຕະຫຼາດ ທີ່ຈະຕ້ອງນຳໃຊ້ສຳລັບການເຮັດຮູບພາບໃໝ່ຂຶ້ນມາໂດຍສະເພາະ. Google ຍັງບອກອີກວ່າ ການໃຊ້ Generative AI ເຂົ້າມາຊ່ວຍໃນການລົງໂຄສະນາ ຈະຊ່ວຍໃຫ້ໂຄສະນາຕ່າງໆ ມີຄວາມໂດດເດັ່ນຫຼາຍຍິ່ງຂຶ້ນ ໃນມຸມຂອງລູກຄ້າ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
