ແຣສຟອສ Marcus Rashford ນັກກິລາທີມຊາດອັງກິດ ແລະ ນັກກິລາສະໂມສອນແມນເຊສເຕີ ຢູໄນເຕັດ, ເປັນນັກກິລາຄົນໜຶ່ງທີ່ມີຊື່ສຽງໂດ່ງດັງ ທີ່ບໍ່ລືມບ້ານເກີດເມືອງນອນ ແລະ ຊີວິດການເປັນຢູ່ຂອງຕົນທີ່ທຸກຍາກລຳບາກມາແຕ່ນ້ອຍ, ເມື່ອມາເປັນນັກກິລາທີ່ມີຊື່ສຽງຄ່າຕົວຫຼາຍເຫຼືອລົ້ນ, ແຕ່ກໍຍັງຄິດເຖິງບ້ານເກີດຂອງຕົນຢູ່ສະເໝີ ພ້ອມບໍລິຈາກເງິນເປັນຈຳນວນ 20 ລ້ານປອນ ເພື່ອຊ່ວຍເຫຼືອໃຫ້ເດັກນ້ອຍທຸກຍາກທີ່ອັງກິດ ເຊິ່ງບໍລິຈາກໃຫ້ຫຼາຍກວ່າຊັບສິນທີ່ມີ ແລະ ຊ່ວຍເຫຼືອເດັກນ້ອຍຫຼາຍກວ່າລ້ານຄົນ.
ຕັ້ງແຕ່ຍັງນ້ອຍ ແຣສຟອສ ເປັນເດັກທີ່ເກີດມາຈາກຄອບຄົວທີ່ທຸກຍາກລຳບາກທີ່ອັງກິດ ເມືອງແມນເຊສເຕີ ອາໄສຢູ່ກັບແມ່ລ້ຽງດ່ຽວ ທີ່ຄັ້ງໜຶ່ງເຄີຍປະກອບອາຊີບເຖິງ 3 ອາຊີບພ້ອມກັນ, ເພື່ອຫາເງິນມາລ້ຽງຄອບຄົວ.
ເຊິ່ງ ແຣສຟອສ ອາດຈະເຫັນເຖິງຄວາມທຸກຍາກລຳບາກທີ່ແມ່ລ້ຽງລູກ ພ້ອມກັບຄອບຄົວທີ່ບໍ່ມີຫຍັງມາແຕ່ຍັງນ້ອຍ, ຈຶ່ງກາຍເປັນບົດຮຽນອັນສຳຄັນສຳລັບ ແຣສຟອສ ໃຫ້ເຂົ້າໃຈເຖິງເດັກນ້ອຍທີ່ຕົກທຸກໄດ້ຍາກເປັນທີ່ສຸດ ເພາະຕົນເອງກໍເຄີຍມີປະສົບການແບບນັ້ນ.
ໃນລາຍການ BBC Breakfast ແຣສຟອສ ໃຫ້ສຳພາດວ່າ: ການເປັນນັກກິລາ ຄິດວ່າຕ້ອງມີບາງສິ່ງທີ່ຊຸກຍູ້ໃຫ້ເຮົາຈາກເບື້ອງຫຼັງ ແລະ ຖ້າເຮົາໃຫຍ່ຂຶ້ນມາດ້ວຍຄອບຄົວທີ່ທຸກຍາກ ເລື່ອງລາວເຫຼົ່ານັ້ນຈະເປັນພະລັງທີ່ກະຕຸ້ນໃຫ້ເຮົາໄປສູ່ທາງທີ່ດີ.
ໃນປີ 2019 ແຣສຟອສ ອາຍຸ 21 ປີ ໄດ້ເຊັນສັນຍາສະບັບໃໝ່ ເຊິ່ງເຮັດໃຫ້ເຂົາຮັບເງິນເປັນ 200,000 ປອນຕໍ່ອາທິດ. ກິນຢູ່ສະບາຍ ໄດ້ຢູ່ເຮືອນຫຼັງໃໝ່ ມີລົດລາຄາແພງໆໃຫ້ຂັບ, ເຊິ່ງບາງຄົນອາດຄິດວ່າເຂົາຈະລືມອະດີດທີ່ເຄີຍທຸກມາ ແຕ່ກົງກັນຂ້າມ ແຣສຟອສ ໄດ້ຊ່ວຍເຫຼືອບໍລິຈາກເງິນຈຳນວນ 20 ລ້ານປອນໃຫ້ແກ່ເດັກນ້ອຍຜູ້ຕົກທຸກໄດ້ຍາກ ໃຫ້ຫຼຸດພົ້ນຈາກຄວາມທຸກໄດ້ຢ່າງໜ້າຊົມເຊີຍ.
ໄລຍະໂຄວິດລະບາດກໍໄດ້ຊ່ວຍບໍລິຈາກອາຫານຫຼາຍກວ່າພັນກ່ອງ ໃຫ້ແກ່ເດັກນ້ອຍ ແລະ ໃນເທສະການຕ່າງໆ ບາງຄັ້ງກໍບໍລິຈາກເຊັ່ນດຽວກັນ. ທີ່ສຳຄັນໄດ້ຮ່ວມທຸ່ມເທໃສ່ກິດຈະກຳການກຸສົນກັບ FareShare ເຄືອຂ່າຍການກຸສົນລະດັບປະເທດ ທີ່ມີຄວາມສາມາດແຈກຈ່າຍອາຫານໃຫ້ແກ່ບ້ານຕ່າງໆ.
ຂອບໃຈຂໍ້ມູນຈາກ:
- https://bit.ly/2TMHvoc
- https://www.bbc.com/sport/football/48826737
- https://bit.ly/3wSHBJy
- https://ng.opera.news/ng/en/sports/26299b1efd2038c52412d68771a14325
- https://bit.ly/2SCDaUJ
ຕິດຕາມຂ່າວທັງໝົດຈາກ LaoX: https://laox.la/all-posts/
