ໃນວັນທີ 17 ພະຈິກທີ່ຜ່ານມາ, ສໍານັກງານຂ່າວຕ່າງປະເທດໄດ້ມີການລາຍງານວ່າ Meituan ບໍລິສັດເຕັກໂນໂລຊີຍັກໃຫຍ່ອັນດັບ 3 ແລະ ອັນດັບ 1 ດ້ານບໍລິການຈັດສົ່ງອາຫານຂອງຈີນ ກຳລັງເຂົ້າເຈລະຈາ, ພ້ອມກັບສຳຫຼວດສັກກະຍະພາບໃນການເຂົ້າຊື້ກິດຈະການຂອງ “Delivery Hero” ໃນອາຊີຕາເວັນອອກສຽງໃຕ້ ເຊິ່ງໃນນັ້ນລວມທັງໄທ, ສິງກະໂປ, ມາເລເຊຍ, ຟິລິບປິນ, ກຳປູເຈຍ, ມຽນມາ ແລະ ລາວ ທີ່ໄດ້ດຳເນີນທຸລະກິດພາຍໃຕ້ແບຣນ “foodpanda”. ເນື່ອງຈາກວ່າບໍລິສັດກໍາລັງຊອກຫາຊ່ອງທາງໃນການຂະຫຍາຍທຸລະກິດຂອງຕົນອອກໄປສູ່ຕະຫຼາດຕ່າງປະເທດ.
ຫຼັງຈາກທີ່ໄດ້ລາຍງານຂ່າວນີ້ອອກມາ ຮຸ້ນຂອງ Delivery Hero ກໍເພີ່ມຂຶ້ນທັນທີ 3%, ໃນຂະນະທີ່ຮຸ້ນ Meituan ໃນນິວຢອກຫຼຸດລົງ 5.2%, ໃນຂະນະທີ່ຮຸ້ນຮ່ອງກົງ ຫຼຸດລົງຫຼາຍເຖິງ 3% (Meituan ໄດ້ລົງທະບຽນໄວ້ໃນສອງຕະຫຼາດ)
ກ່ອນໜ້ານີ້ ໄດ້ມີການລາຍງານວ່າ Delivery Hero ນັ້ນຢູ່ໃນການເຈລະຈາເພື່ອຂາຍກິດຈະການສ່ວນໜຶ່ງຂອງຕົນຢູ່ໃນສິງກະໂປ, ມາເລເຊຍ, ຟີລິບປິນ, ໄທ, ກຳປູເຈຍ, ມຽນມາ ແລະ ລາວ ໃຫ້ກັບ Grab . ເນື່ອງຈາກການເຕີບໂຕທາງທຸລະກິດຂອງ Delivery Hero ແລະ Foodpanda ໄດ້ເລີ່ມຊົບເຊົານັບຕັ້ງແຕ່ການລະບາດຂອງ COVID-19. ລວມທັງມູນຄ່າລວມຂອງຜະລິດຕະພັນຂອງບໍລິສັດໃນອາຊີສໍາລັບໄຕມາດທີ 3 ປີ 2023 ຢູ່ທີ່ 6.39 ຕື້ຢູໂຣ ເຊິ່ງຫຼຸດລົງ 6.2% ເມື່ອທຽບກັບປີກາຍ.
ຢ່າງໃດກໍຕາມ, ການເຈລະຈາລະຫວ່າງ Meituan ແລະ Delivery Hero ນັ້ນຍັງບໍ່ມີຄວາມແນ່ນອນວ່າທີ່ຈະຊື້ຂາຍກິດຈະການຫຼືບໍ່, ອີກທັງ 2 ຝ່າຍກໍຍັງບໍ່ທັນໄດ້ໃຫ້ສະແດງຄວາມຄິດເຫັນ ຫຼື ຕອບໂຕ້ກ່ຽວກັບປະເດັນນີ້.
Meituan ຖືວ່າເປັນບໍລິການຈັດສົ່ງອາຫານທີ່ໃຫຍ່ທີ່ສຸດໃນປະເທດຈີນ. ໂດຍສ້າງຕັ້ງຂຶ້ນໃນປີ 2010, ໃນປັດຈຸບັນໄດ້ມີການບໍລິການສົ່ງອາຫານໃນ 2,800 ຕົວເມືອງໃນທົ່ວປະເທດຈີນ. ແລະໃນເດືອນພຶດສະພາ, ບໍລິສັດໄດ້ເປີດຕົວແອັບພິເຄຊັນໃໝ່ໃນການຈັດສົ່ງໃນຮ່ອງກົງທີ່ໂດຍໃສ່ຊື່ວ່າ KeeTa.
ບໍລິສັດ Meituan ມີລາຍຮັບໃນໄຕມາດທີ 2 ເພີ່ມຂຶ້ນ 33,4% ເມື່ອທຽບໃສ່ໄລຍະດຽວກັນຂອງປີກາຍເປັນ 67,9 ຕື້ຢວນ ຫຼັງຈາກການຟື້ນຕົວຈາກການລະບາດຂອງ COVID-19
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
