Jeffrey Gundlach ມະຫາເສດຖີຊື່ດັງ ຫຼື ທີ່ຮູ້ຈັກກັນໃນນາມວ່າ “The Bond King” ຣາຊາແຫ່ງພັນທະບັດ ໄດ້ສະແດງຄວາມກັງວົນກ່ຽວກັບຄວາມສ່ຽງທີ່ອາດຈະເກີດຂຶ້ນຕໍ່ສະຖານະສະກຸນເງິນສຳຮອງຂອງສະຫະລັດ ເນື່ອງຈາກເພດານໜີ້ຂອງປະເທດໄດ້ມີການເພີ່ມຂຶ້ນ.
Jeffrey Gundlach ໄດ້ເຕືອນວ່າ “ອະນາຄົດຂອງເງິນໂດລາສະຫະລັດມີທ່າອ່ຽງທີ່ຈະເກີດພາວະອັດຕາເງິນເຟີ້ທີ່ບໍ່ສາມາດຄວບຄຸມໄດ້. ໂດຍທັງໝົດແມ່ນຂຶ້ນຢູ່ກັບການຄວບຄຸມງົບປະມານ ແລະ ການໃຊ້ຈ່າຍ”
Jeffrey Gundlach ແມ່ນ CEO ແລະ ຫົວໜ້າຝ່າຍການລົງທຶນຂອງບໍລິສັດ Doubleline ເຊິ່ງເປັນບໍລິສັດຄຸ້ມຄອງການລົງທຶນ. Jeffrey Gundlach ໄດ້ຮັບສາຍາ “The Bond King” ຣາຊາແຫ່ງພັນທະບັດ ຫຼັງຈາກທີ່ລາວໄດ້ປາກົດຕົວໃນໜ້າປົກຂອງ Barron’s ໃນຖານະເປັນ “The New Bond King” ຣາຊາແຫ່ງພັນທະບັດຄົນໃໝ່ໃນປີ 2011.
ໂດຍໃນປັດຈຸບັນ Jeffrey Gundlach ມີຊັບສິນໂດຍຄິດເປັນມູນຄ່າສຸດທິຢູ່ທີ່ 2.2 ຕື້ໂດລາ ແລະ ບໍລິສັດທີ່ລາວດູແລສິນຊັບພາຍໃຕ້ການຄຸ້ມຄອງ (AUM) ອີກ ຄິດເປັນມູນຄ່າປະມານ 150 ຕື້ໂດລາ, ອ້າງອີງຂໍ້ມູນຈາກ Forbes.
Jeffrey Gundlach ນັ້ນໄດ້ສະແດງຄວາມຄິດເຫັນວ່າ “ຖ້າຫາກທະນາຄານກາງສະຫະລັດຍັງຄົງຂຶ້ນອັດຕາດອກເບ້ຍ ຫຼື ໜີ້ຂອງສະຫະລັດຍັງຄົງເພີ່ມຂຶ້ນອີກຕໍ່ໄປເຊິ່ງແນ່ນອນວ່າຕ້ອງເພີ່ມຂຶ້ນ ຕໍ່ໄປບັນຫາຮ້າຍແຮງກໍຈະຕາມມາ”
ອັດຕາດອກເບ້ຍສະເລ່ຍຕໍ່ໜີ້ສິນພັນທະບັດລັດຖະບານສະຫະລັດແມ່ນ 2,92% ໃນເດືອນສິງຫາ, ເພີ່ມຂຶ້ນຈາກ 1,97% ໃນໄລຍະດຽວກັນຂອງປີກາຍ. ເຊິ່ງ Jeffrey Gundlach ໄດ້ລະບຸວ່າ ອັດຕາດອກເບ້ຍຂອງສະຫະລັດເພີ່ມຂຶ້ນເຖິງ 5.5% ຈາກລະດັບຄ່າໃຊ້ຈ່າຍໃນການກູ້ຢືມຂອງທະນາຄານກາງສະຫະລັດ. ໂດຍໄດ້ອະທິບາຍຕື່ມອີກວ່າໃນສະຖານະການນີ້ ບັນຊີລາຍຈ່າຍດອກເບ້ຍປະຈໍາປີຂອງປະເທດຈະສູງເກີນ 1.8 ພັນຕື້ໂດລາ ເຊິ່ງນີ້ແມ່ນຫຼາຍກວ່າສອງເທົ່າຂອງງົບປະມານຂອງກະຊວງປ້ອງກັນປະເທດທີ່ມີຢູ່ ແລະ ພາຍໃນເວລາພຽງສອງປີ ຄ່າໃຊ້ຈ່າຍດອກເບ້ຍຈະເພີ່ມຂຶ້ນຈາກ 500 ຕື້ໂດລາເປັນເກືອບ 900 ຕື້ໂດລາ ເຊິ່້ງນີ້ແມ່ນສູງກວ່າການໃຊ້ຈ່າຍດ້ານກະຊວງປ້ອງກັນປະເທດໄປແລ້ວ.
Jeffrey Gundlach ໄດ້ໃຫ້ຄໍາຄິດເຫັນວ່າ ການຂາດດຸນງົບປະມານອັນໃຫຍ່ຫຼວງ ແລະ ອັດຕາດອກເບ້ຍເພີ່ມຂຶ້ນສຳລັບໜີ້ຂອງປະເທດ ຈະເຮັດໃຫ້ພົນລະເມືອງອາເມຣິກາຕົກຢູ່ໃນຄວາມຢ້ານກົວ.
Jeffrey Gundlach ບໍ່ໄດ້ແມ່ນພຽງຜູ້ດຽວທີ່ໄດ້ອອກມາເຕືອນກ່ຽວກັບລະດັບໜີ້ສິນຂອງສະຫະລັດ ແລະ ເງິນໂດລາສະຫະລັດ, Jamie Dimon CEO ຂອງ JPMorgan ກໍໄດ້ອອກມາສະແດງຄວາມກັງວົນເຊັ່ນກັນວ່າ ງົບປະມານໃນຄັງຂອງລັດຖະບານສະຫະລັດນັ້ນມີການໃຊ້ຈ່າຍຈຳນວນຫຼາຍ ເຊິ່ງເປັນເງິນຈຳນວນຫຼາຍທີ່ໃຊ້ຈ່າຍໃນສະພາວະທີ່ປະເທດສະງົບສຸກ.
Jamie Dimon ຍັງໄດ້ສະແດງຄວາມເປັນຫ່ວງກ່ຽວກັບເສດຖະກິດທີ່ຖົດຖອຍ. ໃນຂະນະດຽວກັນ, Jim Rogers ນັກລົງທຶນທີ່ມີຊື່ສຽງອີກຄົນໜຶ່ງກໍໄດ້ອອກມາເຕືອນວ່າ ຍຸກຂອງເງິນໂດລາສະຫະລັດນັ້ນກຳລັງຈະສິ້ນສຸດລົງ. ໂດຍເງິນຢວນຈີນເປັນຄູ່ແຂ່ງດຽວທີ່ຈະທົດແທນເງິນໂດລາ.
ນອກຈາກນີ້, Jefferies ບໍລິສັດບໍລິການທາງດ້ານການເງິນລະດັບໂລກ ຍັງໄດ້ເຕືອນໃນຕົ້ນເດືອນທີ່ຜ່ານມາກ່ຽວກັບການລົ້ມລະລາຍຂອງເງິນໂດລາສະຫະລັດອີກດ້ວຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
