ໃນວັນທີ 19 ມັງກອນທີ່ຜ່ານມາ, ສຳນັກງານຕ່າງປະເທດໄດ້ມີການລາຍງານວ່າ ສະຫະພາບຢູໂຣບ (EU) ກໍາລັງວາງແຜນທີ່ຈະໃຊ້ມາດຕະການຈໍາກັດການຊໍາລະເງິນສົດບໍ່ໃຫ້ເກີນ 10,000 ຢູໂຣບຕໍ່ຄັ້ງ ແລະ ມາດຕະການອື່ນໆເພື່ອຕ້ານການຟອກເງິນ, ລວມທັງໃນຂະແໜງສະກຸນເງິນດິຈິຕອນນຳ.
ໂດຍຜູ້ຕາງໜ້າຂອງບັນດາປະເທດ EU ແລະ ລັດຖະສະພາຢູໂຣບໄດ້ເຮັດຂໍ້ຕົກລົງກ່ຽວກັບແຜນການຈັດວາງຂໍ້ກຳນົດທີ່ເຂັ້ມງວດເພື່ອແກ້ໄຂການຟອກເງິນ. ແຕ່ແຜນການດັ່ງກ່າວຈະຕ້ອງໄດ້ຮັບການອະນຸມັດຈາກທຸກໆປະເທດສະມາຊິກ EU, ຈຶ່ງຈະນໍາໄປສູ່ການສ້າງກົດໝາຍ ແລະ ການບັງຄັບໃຊ້.
Mairead McGuiness, ກໍາມະການດ້ານການບໍລິການທາງດ້ານການເງິນຂອງ EU ກ່າວຢູ່ໃນຖະແຫຼງການສະບັບໜຶ່ງ ຫຼັງຈາກໄດ້ບັນລຸຂໍ້ຕົກລົງທີ່ການເຈລະຈາທີ່ນະຄອນ Strasbourg ປະເທດຝຣັ່ງວ່າ “ຂໍ້ຕົກລົງໃນອາທິດນີ້ແມ່ນບາດກ້າວອັນສໍາຄັນຕໍ່ກັບການຕໍ່ສູ້ກັບການຟອກເງິນໃນ EU”
Vincent van Petegem ລັດຖະມົນຕີການເງິນຂອງເບວຢຽມ ເຊິ່ງເປັນຜູ້ດໍາລົງຕໍາແໜ່ງເປັນປະທານສະຫະພາບຢູໂຣບກ່າວວ່າ “ກົດລະບຽບດັ່ງກ່າວຈະຊ່ວຍໃຫ້ແນ່ໃຈວ່າການສໍ້ໂກງ, ອົງການອາຍາ ແລະ ພວກກໍ່ການຮ້າຍຈະບໍ່ມີພື້ນທີ່ເຫຼືອທີ່ກະທຳຜິດໃນລະບົບຂອງການເງິນ”
ເນື່ອງຈາກກົດລະບຽບດັ່ງກ່າວຈະຄອບຄຸມເຖິງການກວດສອບທຸລະກຳໃນການຊື້ຂາຍ crypto, ການໃຊ້ເງິນສົດໃນການຊຳລະສິນຄ້າທີ່ມີລາຄາແພງ ແລະ ການໃຊ້ເງິນໃນອຸດສາຫະກໍາບານເຕະ ເຊິ່ງການໃຊ້ຈ່າຍຂອງສະໂມສອນບານເຕະອາດຖືກໃຊ້ເປັນຊ່ອງທາງການຟອກເງິນ.
ນອກຈາກນັ້ນ, ຈະມີການຈຳກັດວົງເງິນສູງສຸດໃນທົ່ວ EU ທີ່ 10,000 ຢູໂຣສໍາລັບການຈ່າຍເງິນເປັນເງິນສົດ, ເຊິ່ງນີ້ຈະເຮັດໃຫ້ການຟອກເງິນຫຍຸ້ງຍາກເພີ່ມຂຶ້ນ.
ບໍລິສັດທີ່ຢູ່ໃນຂອບເຂດຂອງກົດລະບຽບໃໝ່ຈະຕ້ອງລະບຸ ແລະ ກວດສອບບຸກຄົນຜູ້ທີ່ເຮັດທຸລະກໍາເງິນສົດເປັນຄັ້ງຄາວ ນັບຕັ້ງແຕ່ການເຮັດທຸລະກຳຈຳນວນ 3,000 – 10,000 ຢູໂຣ. ໂດຍກົດລະບຽບໃໝ່ນີ້ຈໍາເປັນຕ້ອງໄດ້ຮັບການຍອມຮັບຢ່າງເປັນທາງການຈາກປະເທດໃນສະຫະພາບຢູໂຣບ ແລະ ສະພາແຫ່ງຊາດ EU ກ່ອນທີ່ຈະກາຍເປັນກົດໝາຍນຳໃຊ້ໄດ້.
ທັງນີ້, ສຳນັກງານຕຳຫຼວດສາກົນຂອງສະຫະພາບຢູໂຣບ (Europol) ໄດ້ມີການຄາດການວ່າປະມານ 1% ຂອງຍອດຜະລິດຕະພັນພາຍໃນ (GDP) ຂອງ EU ໄດ້ຖືກພົບເຫັນວ່າມີສ່ວນຮ່ວມໃນກິດຈະກໍາທາງດ້ານການເງິນທີ່ໜ້າສົງໄສ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
