ອັດຕາແລກປ່ຽນສະກຸນເງິນຢວນ ອ່ອນຄ່າຕ່ຳສຸດ ໃນຮອບ 16 ປີ ເມືອທຽບໃສ່ ໂດລາສະຫະລັດ ທ່າມກາງຂໍ້ມູນທາງເສດຖະກິດທີ່ສ້າງຄວາມກັງວົນ ແລະ ຄວາມກົດດັນໃຫ້ກັບການຂະຫຍາຍຕົວຂອງເສດຖະກິດຈີນ.
ໂດຍການຊື້-ຂາຍ ໄລຍະໜຶ່ງຂອງຕະຫຼາດ ໃນວັນທີ 7 ກັນຍາທີ່ຜ່ານມານີ້ ຢູ່ປະມານ 7,32 ຢວນ ຕໍ່ໂດລາສະຫະລັດ ເຊິ່ງເປັນສະຖິຕິອ່ອນຄ່າຕໍ່າສຸດ ໃນຮອບ 16 ປີ ນັບຕັ້ງແຕ່ປີ 2007 ໂດຍຫຼຸດລົງ 0,13%. ສ່ວນເງິນຢວນ ໃນຕະຫຼາດ ແລກປ່ຽນ ຕ່າງປະເທດ ປະມານ 7,33 ຕໍ່ໂດລາສະຫະລັດ ຫຼຸດລົງ 0,19%.
ໂດຍຕົວເລກດັ່ງກ່າວເກີດຂຶ້ນ ຫຼັງຈາກສະຖິຕິການສົ່ງອອກ ເດືອນສິງຫາ ຫຼຸດລົງ 8,8% ເມື່ອທຽບໃສ່ ປີກາຍ. ສ່ວນການນຳເຂົ້າ ຫຼຸດລົງ 7,3% ໃນໄລຍະເວລາ ດຽວກັນ.
ປັດຈຸບັນ ປະຕິເສດບໍ່ໄດ້ວ່າ ຈີນພວມປະເຊີນໜ້າກັບຄວາມຫຍຸ້ງຍາກດ້ານເສດຖະກິດບໍ່ໜ້ອຍເລີຍໃນເວລານີ້ ເຊິ່ງລວມທັງຂະແໜງການຜະລິດທີ່ຕົກຕໍ່າ, ການວ່າງງານຂອງໄວໜຸ່ມ ແລະ ຂະແໜງອະສັງຫາ ທີ່ຊົບເຊົາ.
ຢ່າງໃດກໍຕາມ ໃນອາທິດທີ່ຜ່ານມາ ກ່ຽວກັບການແກ້ໄຂບັນຫາເງິນຕານີ້ ທາງທະນາຄານກາງຂອງປະເທດຈີນ ໄດ້ປະກາດວ່າ ວັນທີ 15 ກັນຍາທີ່ຈະມາຮອດນີ້ ຈະຫຼຸດຈຳນວນເງິນຝາກທີ່ເປັນເງິນຕາຕ່າງປະເທດຂອງສະຖາບັນການເງິນຕ່າງໆ ຈາກ 6% ລົງມາໃຫ້ເຫຼືອ 4% ເພື່ອຫຼຸດການສະໜອງເງິນຕາຕ່າງປະເທດໃນທ້ອງຖິ່ນ ແລະ ໃຫ້ເງິນຢວນເປັນຕົວດຶງດູດການລົງທຶນແທນ.
ຕິດຕາມຂ່າວທັງໝົດຈາກ LaoX: https://laox.la/all-posts/