Elon Musk ກາຍເປັນມະຫາເສດຖີລະດັບ “ພັນລ້ານລ້ານໂດລາ” (Trillionaire) ຄົນທຳອິດຂອງໂລກ ຫຼັງຈາກຮຸ້ນຂອງບໍລິສັດ SpaceX ພຸ່ງທະຍານຂຶ້ນຢ່າງຮຸນແຮງໃນການເປີດຕົວເຂົ້າສູ່ຕະຫຼາດຮຸ້ນ Nasdaq ຢ່າງຍິ່ງໃຫຍ່ ໂດຍມີເປົ້າໝາຍລະດົມທຶນເພື່ອຂັບເຄື່ອນເຕັກໂນໂລຊີອາວະກາດ ແລະ ປັນຍາປະດິດ.
ການນຳເອົາບໍລິສັດ SpaceX ເຂົ້າຈົດທະບຽນໃນຕະຫຼາດຮຸ້ນ Nasdaq ດ້ວຍມູນຄ່າສູງເຖິງ 2.2 ພັນລ້ານລ້ານໂດລາ ໄດ້ກາຍເປັນການເປີດຕົວທີ່ຍິ່ງໃຫຍ່ທີ່ສຸດໃນປະຫວັດສາດ ໂດຍລາຄາຮຸ້ນເລີ່ມຕົ້ນທີ່ສະເໜີຂາຍແມ່ນ 135 ໂດລາຕໍ່ຮຸ້ນ ແຕ່ເມື່ອເປີດຕະຫຼາດຕົວຈິງກໍພຸ່ງຂຶ້ນໄປເຖິງ 150 ໂດລາ ແລະ ແຕະລະດັບສູງສຸດທີ່ 176.50 ໂດລາ ກ່ອນຈະປິດໃນວັນສຸກທີ່ລາຄາປະມານ 161 ໂດລາ ເຊິ່ງການເປີດຂາຍຮຸ້ນ IPO ຄັ້ງນີ້ສາມາດລະດົມທຶນຈາກນັກລົງທຶນໄດ້ມະຫາສານເຖິງ 75 ພັນລ້ານໂດລາ.
ຄວາມສຳເລັດດັ່ງກ່າວໄດ້ສົ່ງຜົນໃຫ້ຊັບສິນລວມຂອງ Elon ພຸ່ງຂຶ້ນໄປຢູ່ທີ່ 1.11 ພັນລ້ານລ້ານໂດລາ ຕາມການຈັດອັນດັບຂອງ Bloomberg ໂດຍເພີ່ມຂຶ້ນຈາກມູນຄ່າຮຸ້ນທີ່ເຂົາຖືຄອງໃນ SpaceX 42% ບວກກັບຮຸ້ນ ແລະ ອັອບຊັນໃນບໍລິສັດ Tesla ຢ່າງໃດກໍຕາມ ຄວາມມັ່ງຄັ່ງນີ້ຍັງເປັນພຽງຕົວເລກໃນເຈ້ຍ ເນື່ອງຈາກເຂົາຖືກຫ້າມຂາຍຮຸ້ນ SpaceX ເປັນເວລາຢ່າງໜ້ອຍໜຶ່ງປີ ແຕ່ການເຕີບໂຕນີ້ກໍໄດ້ສ້າງຜົນປະໂຫຍດໃຫ້ແກ່ພະນັກງານທັງອະດີດ ແລະ ປັດຈຸບັນຂອງບໍລິສັດກວ່າ 4,400 ຄົນໃຫ້ກາຍເປັນມະຫາເສດຖີເງິນລ້ານໄປພ້ອມກັນ.
ໃນແງ່ຂອງຜົນປະກອບການ ຕົວເລກທາງການເງິນສະແດງໃຫ້ເຫັນວ່າ SpaceX ຍັງບໍ່ທັນມີກຳໄລ ແລະ ໄດ້ສູນເສຍເງິນໄປຫຼາຍກວ່າ 9 ພັນລ້ານໂດລາໃນໄລຍະປີ 2025 ເຖິງ 2026 ຍ້ອນການທຸ້ມທຶນມະຫາສານໄປກັບລະບົບໂຄງສ້າງພື້ນຖານ ແລະ ເຕັກໂນໂລຊີ AI ຜ່ານການຄວບລວມກິດຈະການກັບ xAI ເຊິ່ງນັກລົງທຶນບາງສ່ວນໄດ້ສະແດງຄວາມກັງວົນວ່າທຸລະກິດ AI ຂອງເຂົາອາດເປັນພຽງ “ເຕົາເຜົາເງິນ”.
ເຖິງຢ່າງໃດກໍຕາມ ນັກລົງທຶນໄລຍະຍາວຍັງຄົງເຊື່ອໝັ້ນໃນສັກກາຍະພາບ 3-10 ປີຂ້າງໜ້າ ແລະ ຄາດວ່ານ່າຈະມີການຄວບລວມກິດຈະການລະຫວ່າງ SpaceX ແລະ Tesla ໃນອະນາຄົດ.
ແຕ່ສິ່ງທີ່ໜ້າຈັບຕາທີ່ສຸດຄືວິໄສທັດທີ່ລະບຸໄວ້ໃນໜັງສືຊີ້ຊວນການລົງທຶນ (IPO) ທີ່ວ່າ ເປົ້າໝາຍສູງສຸດຂອງ SpaceX ບໍ່ແມ່ນພຽງແຕ່ການປ່ອຍດາວທຽມ Starlink ຫຼື ຈະຫຼວດທີ່ນຳກັບມາໃຊ້ໃໝ່ໄດ້ ແຕ່ແມ່ນການສ້າງ “ເສດຖະກິດດວງຈັນ” (Lunar Economy) ແລະ ການເຮັດໃຫ້ມະນຸດສາມາດອາໄສຢູ່ໄດ້ໃນຫຼາຍດວງດາວ ເຊິ່ງເຖິງແມ່ນວ່າທາງບໍລິສັດຈະຍອມຮັບເອງວ່າມີຄວາມສ່ຽງສູງ ແລະ ເຕັກໂນໂລຊີບາງຢ່າງຍັງບໍ່ມີຢູ່ຈິງໃນປັດຈຸບັນ ແຕ່ຄວາມບໍ່ແນ່ນອນເຫຼົ່ານີ້ກໍບໍ່ສາມາດຢຸດຢັ້ງຄວາມເຊື່ອໝັ້ນ ແລະ ຄວາມກະຕືລືລົ້ນຂອງນັກລົງທຶນໃນຕະຫຼາດໄດ້ເລີຍ.
#LaoXperts #ElonMusk #SpaceX #Trillionaire #Nasdaq #SpaceEconomy #Starlink #Tesla #AI #ມະຫາເສດຖີຄົນທຳອິດຂອງໂລກ
