ດຸນການຊຳລະກັບຕ່າງປະເທດໄຕມາດທີ 1 ຂອງປີ 2026 ເກີນດຸນກວ່າ 659 ລ້ານໂດລາ, ຍູ້ຄັງສຳຮອງເງິນຕາແຫ່ງຊາດເພີ່ມຂຶ້ນ. ເປົ້າໝາຍເພື່ອສ້າງຄວາມເຂັ້ມແຂງໃຫ້ເສດຖະກິດ, ຊ່ວຍເພີ່ມຄວາມໝັ້ນໃຈໃຫ້ນັກລົງທຶນ ແລະ ຮອງຮັບການນຳເຂົ້າສິນຄ້າທີ່ຈຳເປັນໄດ້ຍາວນານຂຶ້ນ.

ທ່າມກາງສະພາບເສດຖະກິດໂລກທີ່ຍັງມີຄວາມບໍ່ແນ່ນອນ, ສປປ ລາວ ສາມາດສ້າງຜົນງານທີ່ໂດດເດັ່ນໃນດ້ານການຊຳລະເງິນລະຫວ່າງປະເທດ. ອີງຕາມຂໍ້ມູນຈາກ ບົດລາຍງານສະຖິຕິເງິນຕາ ໄຕມາດທີ 1 ປີ 2026 ຂອງ ທະນາຄານແຫ່ງ ສປປ ລາວ ທີ່ປ່ອຍອອກມາເມື່ອບໍ່ດົນມານີ້, ດຸນການຊຳລະກັບຕ່າງປະເທດ ປະຈຳໄຕມາດ 1 ປີ 2026 ສາມາດບັນລຸຕົວເລກເກີນດຸນເຖິງ 659.97 ລ້ານໂດລາສະຫະລັດ. 

ການເກີນດຸນຢ່າງຕໍ່ເນື່ອງນີ້ ໄດ້ສົ່ງຜົນດີໂດຍກົງເຮັດໃຫ້ຍອດເຫຼືອຄັງສຳຮອງເງິນຕາຕ່າງປະເທດ ບັນລຸ 4,204.94 ລ້ານໂດລາສະຫະລັດ, ເຊິ່ງສາມາດກຸ້ມການນໍາເຂົ້າສິນຄ້າໄດ້ເຖິງ 5.34 ເດືອນ.

ຜົນງານອັນດີເດັ່ນນີ້ ເກີດມາຈາກຫຼາຍປັດໄຈທີ່ໜ້າຊື່ນຊົມ, ໂດຍສະເພາະແມ່ນການທີ່ປະເທດເຮົາສາມາດຂາຍສິນຄ້າ ແລະ ໃຫ້ບໍລິການຕ່າງໆໄດ້ດີຂຶ້ນຫຼາຍ. ພາກການທ່ອງທ່ຽວ ແລະ ການຂົນສົ່ງໄດ້ກາຍເປັນ “ເຄື່ອງຈັກ” ສຳຄັນທີ່ດຶງເງິນຕາເຂົ້າມາສູ່ປະເທດຢ່າງຕໍ່ເນື່ອງ. ພ້ອມດຽວກັນນັ້ນ, ພີ່ນ້ອງແຮງງານລາວທີ່ໄປເຮັດວຽກຢູ່ຕ່າງແດນ ກໍຍັງເປັນອີກໜຶ່ງແຮງຂັບເຄື່ອນທີ່ສຳຄັນ ໂດຍການສົ່ງເງິນກັບຄືນມາຈຸນເຈືອຄອບຄົວ ເຊິ່ງເປັນສາຍເລືອດຫຼໍ່ລ້ຽງເສດຖະກິດພາຍໃນປະເທດໄດ້ເປັນຢ່າງດີ.

ຕາມບົດລາຍງານ, ປັດໄຈຫຼັກທີ່ຊຸກຍູ້ໃຫ້ດຸນການຊຳລະລວມມີການຂະຫຍາຍຕົວໃນທິດທາງບວກ ແມ່ນມາຈາກອົງປະກອບສຳຄັນເຊັ່ນ:

ດຸນບັນຊີຊຳລະປົກກະຕິ, ມີການເກີນດຸນສູງເຖິງ 651.07 ລ້ານໂດລາສະຫະລັດ, ເຊິ່ງເພີ່ມຂຶ້ນສູງເຖິງ 110.97% ເມື່ອທຽບໃສ່ໄຕມາດຜ່ານມາ. ສິ່ງທີ່ໜ້າສົນໃຈຄື ດຸນການຄ້າດ້ານສິນຄ້າເກີນດຸນເພີ່ມຂຶ້ນ 65.03%, ແລະ ດຸນການຄ້າດ້ານບໍລິການເກີນດຸນເພີ່ມຂຶ້ນເຖິງ 377.97%. ການຂະຫຍາຍຕົວຂອງຂະແໜງບໍລິການແມ່ນໄດ້ຮັບອານິສົງໂດຍກົງຈາກການເພີ່ມຂຶ້ນຂອງລາຍຮັບຈາກພາກການທ່ອງທ່ຽວ ແລະ ການບໍລິການຂົນສົ່ງ.  

ດຸນລາຍຮັບຂັ້ນສອງ ຍັງສືບຕໍ່ເກີນດຸນ 178.44 ລ້ານໂດລາສະຫະລັດ, ເພີ່ມຂຶ້ນ 11.9% ເມື່ອທຽບໃສ່ໄຕມາດຜ່ານມາ. ການເກີນດຸນນີ້ສະທ້ອນໃຫ້ເຫັນເຖິງກະແສເງິນໂອນກັບຄືນປະເທດ ຂອງແຮງງານລາວທີ່ໄປເຮັດວຽກຢູ່ຕ່າງປະເທດ ທີ່ສົ່ງເງິນກັບມາຈຸນເຈືອຄອບຄົວຢູ່ພາຍໃນປະເທດ.  

ດຸນບັນຊີການເງິນ ມີກະແສເງິນໄຫຼເຂົ້າສຸດທີ 229.45 ລ້ານໂດລາສະຫະລັດ. 

ເຖິງຢ່າງໃດກໍຕາມ, ຍັງມີຈຸດທີ່ຕ້ອງເຝົ້າລະວັງ ຄື ດຸນລາຍຮັບຂັ້ນໜຶ່ງ ທີ່ຂາດດຸນ 333.76 ລ້ານໂດລາສະຫະລັດ, ໂດຍຂາດດຸນເພີ່ມຂຶ້ນ 41.41% ເມື່ອທຽບໃສ່ໄຕມາດຜ່ານມາ ຍ້ອນພັນທະໃນການຊຳລະດອກເບ້ຍເງິນກູ້ຢືມຈາກຕ່າງປະເທດພາກລັດຖະບານເພີ່ມຂຶ້ນ.  

#LaoXperts #ດຸນການຊຳລະ #ເສດຖະກິດລາວ #ຄັງສຳຮອງເງິນຕາ #ການນຳເຂົ້າສົ່ງອອກ #ລົດໄຟລາວຈີນ