ພຽງໄລຍະເວລາ 1 ເດືອນກວ່າໆ ກະຊວງປ້ອງກັນຄວາມສະຫງົບ ສາມາດບຸກທະລາຍແກ້ງຄໍເຊັນເຕີຂ້າມຊາດຢູ່ແຂວງບໍ່ແກ້ວ ແລະ ສະຫວັນນະເຂດ ໂດຍລວບຕົວຜູ້ກະທຳຜິດໄດ້ເຖິງ 1.347 ຄົນ. ຕາມການລາຍງານຂອງ ໜັງສືພີມຄວາມສະຫງົບ
ປະຕິບັດການຄັ້ງນີ້ແນໃສ່ດັບສູນເຄືອຂ່າຍອາຊະຍາກຳທາງໄຊເບີທີ່ເປັນໄພຄຸກຄາມລະດັບຊາດ, ຊ່ວຍສະກັດກັ້ນຄວາມເສຍຫາຍທາງເສດຖະກິດຢ່າງມະຫາສານ ແລະ ກູ້ໄພເຫຍື່ອຈາກການຖືກບັງຄັບໃຊ້ແຮງງານໄດ້ສຳເລັດ.
ໃນຍຸກດິຈິຕອນທີ່ອາຊະຍາກຳທາງເຕັກໂນໂລຊີຂະຫຍາຍຕົວຢ່າງວ່ອງໄວ, ລັດຖະບານ ສປປ ລາວ ໄດ້ຍົກລະດັບການປາບປາມແກ້ງສໍ້ໂກງຊັບທາງໂທລະຄົມຢ່າງຈິງຈັງ. ຜົນງານອັນພົ້ນເດັ່ນລ່າສຸດເກີດຂຶ້ນຈາກການປະຕິບັດການສອງໄລຍະ ໂດຍເລີ່ມຈາກເຂດເມືອງຕົ້ນເຜິ້ງ ແຂວງບໍ່ແກ້ວ ໃນຕົ້ນເດືອນເມສາ 2026 ແລະ ສືບຕໍ່ລົງພື້ນທີ່ແຂວງສະຫວັນນະເຂດ ໃນວັນທີ 6 ພຶດສະພາ 2026 ທີ່ຜ່ານມາ.
ກຳລັງເຈົ້າໜ້າທີ່ຕຳຫຼວດວິຊາສະເພາະໄດ້ສົມທົບກັບກຳລັງທ້ອງຖິ່ນ ບຸກເຂົ້າກວດກາຈຸດເປົ້າໝາຍສຳຄັນຕ່າງໆ ຈົນສາມາດກັກຕົວຜູ້ທີ່ມີພຶດຕິກຳສົງໄສຈາກ 10 ກວ່າສັນຊາດ ທີ່ລັກລອບເຂົ້າມາສ້າງບັນຊີສື່ສັງຄົມອອນລາຍປອມເພື່ອເຄື່ອນໄຫວຫຼອກລວງປະຊາຊົນຢ່າງເປັນຂະບວນການ.
ສິ່ງທີ່ໜ້າຕົກໃຈໃນການລົງກວດກາສະຖານທີ່ພັກເຊົາ ແລະ ໂຮງແຮມເປົ້າໝາຍນັ້ນ ເຈົ້າໜ້າທີ່ບໍ່ພຽງແຕ່ຢຶດຂອງກາງເປັນໂທລະສັບມືຖືເກືອບ 6.000 ໜ່ວຍ, ຄອມພິວເຕີ 367 ເຄື່ອງ ແລະ ລົດໃຫຍ່ອີກຈຳນວນໜຶ່ງເທົ່ານັ້ນ, ແຕ່ຍັງຄົ້ນພົບຫຼັກຖານການບັງຄັບໃຊ້ແຮງງານ ແລະ ອຸປະກອນທໍລະມານຮ່າງກາຍປິດບັງຢູ່ພາຍໃນ ເຊິ່ງສະທ້ອນໃຫ້ເຫັນເຖິງຄວາມໂຫດຮ້າຍຂອງກຸ່ມແກ້ງດັ່ງກ່າວ.
ຕໍ່ກັບບັນຫານີ້, ເຈົ້າໜ້າທີ່ໄດ້ດຳເນີນມາດຕະການເດັດຂາດທັງກັບກຸ່ມຜູ້ກະທຳຜິດ ລວມເຖິງການສຶກສາອົບຮົມ, ກ່າວເຕືອນ ແລະ ປັບໄໝເຈົ້າຂອງສະຖານທີ່ທີ່ປ່ອຍປະລະເລີຍໃຫ້ກຸ່ມຄົນເຫຼົ່ານີ້ລັກລອບເຂົ້າມາເຄື່ອນໄຫວຜິດກົດໝາຍ.
ປັດຈຸບັນ, ພາກສ່ວນທີ່ກ່ຽວຂ້ອງພວມປະສານງານຢ່າງໃກ້ຊິດກັບຕຳຫຼວດສາກົນ ເພື່ອກວດສອບປະຫວັດ ແລະ ກຽມສົ່ງຕົວຜູ້ກະທຳຜິດກັບຄືນປະເທດຕາມລະບຽບກົດໝາຍ. ລັດຖະບານ ສປປ ລາວ ຍັງຄົງຢືນຢັນເຈດຕະນາລົມອັນແນ່ວແນ່ໃນການສືບຕໍ່ຜັນຂະຫຍາຍມາດຕະການກວດກາໃຫ້ກວມເອົາທົ່ວປະເທດ ເພື່ອສະກັດກັ້ນບໍ່ໃຫ້ແຜ່ນດິນລາວກາຍເປັນບ່ອນບົ່ມຊ້ອນຂອງອາດຊະຍາກອນທາງໄຊເບີ ພ້ອມທັງຮຽກຮ້ອງໃຫ້ທຸກພາກສ່ວນໃນສັງຄົມຮ່ວມມືກັນເປັນຫູເປັນຕາ ເພື່ອແກ້ໄຂບັນຫາດັ່ງກ່າວໃຫ້ຫຼຸດນ້ອຍຖອຍລົງ ແລະ ໝົດໄປຈາກປະເທດຊາດຢ່າງຖາວອນ.
#LaoX #ຕຳຫຼວດລາວ #ປາບປາມແກ້ງຄໍເຊັນເຕີ #ອາຊະຍາກຳທາງໄຊເບີ #ຄວາມໝັ້ນຄົງແຫ່ງຊາດ #ຂ່າວລາວ #CallCenterScam
