ເຄີຍບໍ່? ເວລາທີ່ເບິ່ງໜັງຮັກຂອງໄວໜຸ່ມ ແລ້ວຢາກມີໂມເມັ້ນຫວານໆ ຫຼື ຢາກຍ້ອນເວລາໄປຫາຕອນທີ່ຜູ້ບ່າວ ຜູ້ສາວ ກໍາລັງຈີບກັນໃໝ່ໆ. ກະບໍ່ໄດ້ອິດສາຫຍັງໃດ (ບໍ່ເລີຍຍຍຍຍຍ), ແຕ່ວ່າ ຖ້າທຸກຄົນໄດ້ເບິ່ງໜັງຮັກໄວໜຸ່ມຍີ່ປຸ່ນ 7 ເລື່ອງທີ່ເຮົາໄດ້ນໍາມາຝາກໄວ້ຕໍ່ໄປນີ້ ຮັບຮ້ອງວ່າຈະຕ້ອງມີຟິນ ຈິກໝອນກັບຄວາມຮັກແນວໄວໜຸ່ມ ໃສໆ ຖ້າແມ່ນສາວໆ ນິຕ້ອງມີອິດສານາງເອກໃນເລື່ອງແນ່ນອນ. ສໍາລັບໜັງ 7 ເລື່ອງທີ່ເຮົາຈະມາແນະນໍາໃນມື້ນີ້ ຈະມີເລື່ອງໃດຖືກໃຈແນ່ກໍຕ້ອງໄປຕິດຕາມນໍາກັນເລີຍ.
- L-DK
L-DK ເປັນເລື່ອງຂອງນາງເອກທີ່ມີຊື່ວ່າ “ອາໂອອິ” ເດັກນັກຮຽນ ມໍ.ປາຍ ທີ່ເຄີຍໃຊ້ຊີວິດແບບຢູ່ຄົນດຽວມາຕະຫຼອດ. ຈົນມາມື້ໜຶ່ງ, ຊີວິດນາງເອກກໍຕ້ອງປ່ຽນໄປເມື່ອເກີດມີເຫດການບາງຢ່າງ ອັນໄດ້ເຮັດໃຫ້ນາງເອກຂອງເຮົາຕ້ອງມາໃຊ້ຊີວິດຢູ່ບ້ານຫຼັງດຽວກັນກັບພະເອກກໍຄື “ຊູເຊ” ຜູ້ທີ່ເອີ້ນໄດ້ວ່າ ຮ໊ອດທີ່ສຸດໃນໂຮງຮຽນຈົນມີສາຍາວ່າ “ເຈົ້າຊາຍ” ປະຈໍາໂຮງຮຽນ. ເລື່ອງນີ້ກໍຈະຊວນໃຫ້ເຫັນມຸມມອງສາວເງິະງະແບບນາງເອກ ແລະ ເລື່ອງກໍບໍ່ໄດ້ຫວານຈ໊ຽບຈົນເກີນໄປ, ເບິ່ງໄດ້ສະບາຍ ມີສາກຟິນມາແນ່ເປັນໄລຍະ ເຊິ່ງເລື່ອງນີ້ແມ່ນທາງເຮົາໄດ້ເບິ່ງທີ່ Netflix ແລະ ເວີຊັ່ນທີ່ເຮົາເບິ່ງແມ່ນຂອງປີ 2014.
![](https://laox.la/wp-content/uploads/2020/09/L-dk.jpg)
2. Wolf Girl and Black Prince
ສໍາລັບໃຜທີ່ມັກໜັງແນວມາດພະເອກກວນໆ ບອກໄດ້ຄໍາດຽວວ່າເລື່ອງນີ້ແຫຼະທີ່ສາມາດມາດຕອບໂຈດເຈົ້າໄດ້ ເຊິ່ງຕອນທີ່ເບິ່ງໄປນໍາກະຈະຮູ້ສຶກອີຕົນນາງເອກແນ່ ເພາະວ່າຖືກພະເອກກວນຢູ່ຕະຫຼອດເວລາ (ແຕ່ມັນກະມາຈາກນາງເອກທີ່ຫາເລື່ອງໃສ່ໂຕນໍາສ່ວນໜຶ່ງ ຫະຫະ). ເລື່ອງລາວເລີ່ມຈາກ “ຊິໂນະຮາລະ ເອຮິກະ” ສາວນ້ອຍໄວ 16 ປີທີ່ບັງເອີນຢູ່ໃນແກ໊ງສາວງາມ ແລະ ໝູ່ນາງເອກກໍພັດວ່າມີແຟນກັນໝົດແລ້ວຍົກເວັ້ນນາງເອກ, ລະນາງເອກພັດໄປເຮັດນຽນໂດຍການໂມ້ວ່າມີແຟນແລ້ວ ທັງຍັງມັກເວົ້າເລື່ອງໂຣແມນຕິກໃຫ້ໝູ່ຟັງໂດຍທີ່ໂຕເອງຍັງບໍ່ມີແຟນ! ແລ້ວດ້ວຍຄວາມທີ່ຕົວນາງຢ້ານໂປ໊ະແຕກ ກະເລີຍໄປຖ່າຍຮູບຄົນຢູ່ສະຖານທີ່ສາທາລະນະ ມາໂມ້ໃຫ້ໝູ່ຟັງວ່າເປັນແຟນເພິ່ນ. ກະບໍ່ຮູ້ວ່າໂຊກຊະຕາກັ່ນແກ້ງ ຫຼື ຈັ່ງໃດ ເພາະຄົນທີ່ນາງເອກໄປຖ່າຍຮູບມານີ້ ດັນເປັນນັກຮຽນໂຮງຮຽນດຽວກັນ ແລະ ເປັນຊາຍໃນຝັນຂອງສາວໆທົ່ວໂຮງຮຽນອີກ (ບອກກ່ອນວ່ານາງເອກບໍ່ຮູ້ຈັກມາກ່ອນວ່າພະເອກຢູ່ໂຮງຮຽນດຽວກັນ). ເຊິ່ງກໍເອົາອີກລ້ວ! ນາງເອກເຮົາທີ່ໄດ້ມາຮູ້ຈັກພະເອກ ກໍໄດ້ຮູ້ວ່າ ແທ້ຈິງແລ້ວພະເອກມັນບໍ່ໄດ້ດີຄືທີ່ສາວໆຈິນຕະນາການໄວ້ ແຕ່ມັນຄືຊາຕານໃນຮ່າງເຈົ້າຊາຍຫັ້ນຕິ! ມາເອົາໃຈຊ່ວຍນາງເອກນໍາກັນເລີຍວ່າ ເລື່ອງນີ້ພະນາງເຮົາຈະລົງເອີຍກັນໄດ້ແນວໃດ (ກະຊິບວ່າມີຊຶມໆແນ່ໜ້ອຍໜຶ່ງລະ).
![](https://laox.la/wp-content/uploads/2020/09/Wolf-Girl-and-Black-Prince.jpg)
3. From Me To You ຫຼື Kimi Ni Totoke
ເລື່ອງນີ້ຖືວ່າເປັນໜັງຮັກໄວໜຸ່ມທີ່ດັງເອົາເລື່ອງຢູ່ໃດ໊ ທັງແບບເວີຊັ່ນກາຕູນອະນິເມ ແລະ ແບບຄົນສະແດງ. ເລື່ອງຫຍໍ້ແມ່ນເວົ້າເຖິງນາງເອກ “ຄຸໂລນຸມະ ຊາວາໂກະ” ສາວນ້ອຍມັດທະຍົມທີ່ຖືກໝູ່ຕັ້ງສາຍາວ່າ “ຊາດາໂກະ” ຈາກໝູ່ຮ່ວມຊັ້ນຮຽນ ເນື່ອງຈາກຮູບຮ່າງພາຍນອກຄ້າຍຄືຕົວລະຄອນຜີສາວຜົມຍາວຊຸດຂາວໃນເລື່ອງ “The Ring” ນາງເອກເລີຍບໍ່ມີໝູ່ ແລະ ໃຊ້ຊີວິດໃນໄວຮຽນແບບໂດດດ່ຽວ. ມື້ໜຶ່ງຊີວິດຂອງນາງເອກກໍປ່ຽນໄປ ເພາະໄດ້ມີໝູ່, ມີຄົນມາແອບຮັກ ເຮັດໃຫ້ຊີວິດນາງເອກມີສີສັນຂຶ້ນມາ ຈາກແຕ່ກ່ອນເຄີຍຢ້ານການລົມກັບຄົນອື່ນ, ຈາກຜູ້ຍິງທີ່ບໍ່ມີຄວາມໝັ້ນໃຈ ກໍກາຍເປັນຄົນໜ້າຮັກ ແລະ ສົດໃສຂຶ້ນມາ. ໜັງເລື່ອງນີ້ດັງແຮງ ບໍ່ວ່າຈະເຮັດເປັນເວີ່ຊັ່ນໃດກໍມ່ວນ ເພາະເຮົາບໍ່ໄດ້ເຫັນພຽງແຕ່ສາກກຸ໊ກກິ໊ກຂອງພະເອກນາງເອກ ແຕ່ຍັງໄດ້ເຫັນສາຍສໍາພັນ ແລະ ມິດຕະພາບຂອງຕົວລະຄອນນໍາອີກດ້ວຍ.
![](https://laox.la/wp-content/uploads/2020/09/From-me-to-you.jpg)
4. Closest love to Heaven
ໜັງເລື່ອງນີ້ ເປັນໜັງທີ່ເຮັດໃຫ້ຄົນຕ້ອງມາຕັ້ງຄໍາຖາມນໍາກັບພໍ່ແມ່ຂອງນາງເອກວ່າ “ຄວນປ່ອຍໃຫ້ລູກສາວຂອງຕົວເອງຄົບກັບຄົນບໍ່ມີອະນາຄົດໄດ້ ຫຼື ບໍ່”. ໜັງເວົ້າເຖິງນາງເອກ “ນິໂນະ” ສາວຜົມຍາວປົກໜ້າປົກຕາ ເຮັດໃຫ້ຖືກໝູ່ໃນຫ້ອງກັ່ນແກ້ງຢູ່ຕະຫຼອດ, ແຕ່ກໍມີພະເອກ “ຄິລະ” ທີ່ມາປະກົດໂຕຊ່ວຍນາງເອກຕະຫຼອດ. ພະເອກກໍປ່ວຍໜັກ ແລະ ມີຊີວິດຢູ່ໄດ້ພຽງແຕ່ 365 ວັນເທົ່ານັ້ນ ເຊິ່ງມັນເຮັດໃຫ້ນາງເອກເລືອກທີ່ຈະສາລະພາບຮັກກັບພະເອກ ພ້ອມທັງສັນຍາວ່າຈະຢູ່ຄຽງຂ້າງໄປຕະຫຼອດ 365 ວັນນໍາ. ໜັງເລື່ອງນີ້ບໍ່ໄດ້ດຣາມ່ານໍ້າຕານອງດັ່ງທີ່ຄິດ ແຖມຍັງໄດ້ຂໍ້ຄິດອີກຫຼາຍ, ເອົາເປັນວ່າບໍ່ສະປອຍຊະ ຖ້າໃຜຢາກເບິ່ງກໍຮີບໄປຫາມາເບິ່ງຊະ!
![](https://laox.la/wp-content/uploads/2020/09/closest-love-to-heaven.jpg)
5. Kyou Koi Wo Hajimemasu
ໜັງຮັກໄວໜຸ່ມໃສໆ ທີ່ເວົ້າເຖິງ “ຮິບິໂນະ ຊຶບາກິ” ສາວນ້ອຍທີ່ມີພອນສະຫວັນໃນການເຮັດຜົມໃຫ້ຄົນອື່ນ ແຕ່ຕົວເອງດັນຂາດຄວາມໝັ້ນໃຈ, ເປັນສາວລ້າສະໄໝທີ່ບໍ່ມີເປົ້າໝາຍຫຍັງໃນຊີວິດເລີຍ. ຈົນໄດ້ທາງພະເອກ “ຊຶບາກິ ຄຽວຕະ” ທີ່ຢາກທົດສອບສະເໜ່ຄວາມຮ໊ອດຂອງຕົວເອງ ເລີຍເຂົ້າໄປຈີບນາງເອກເທື່ອລະເລັກລະໜ້ອຍ ຈົນການຫວ່ານສະເໜ່ຫຼິ້ນໆກາຍເປັນແອບມັກຂຶ້ນມາແທ້ ວ່າຊັ້ນ! ມາລຸ້ນນໍາກັນເອົາວ່າ ຄວາມຮັກເທື່ອນີ້ຈະລົງເອີຍແນວໃດ ແລະ ນາງເອກຂອງເຮົາຈະສາມາດປ່ຽນແປງໄປຫຼາຍສໍ່າໃດ ກໍຕ້ອງໄປເບິ່ງເລີຍ.
![](https://laox.la/wp-content/uploads/2020/09/Kyou-Koi-Wo-Hajimemasu.jpg)
6. Sukitte Ii Na Yo
ໜັງທີ່ດີຕໍ່ໃຈສໍາລັບໃຜທີ່ມັກພະເອກສາຍກວນໆ ແລະ ນາງເອກແນວນິ້ງໆ ງຽບໆ, ເລື່ອງເລີ່ມຕົ້ນຈາກ “ທາຈະບານະ ເມ” ທີ່ໃຊ້ຊີວິດຄົນດຽວມາຕະຫຼອດ ໂດຍທີ່ບໍ່ມີໝູ່ ຫຼື ແຟນເລີຍຈັກຄົນຕະຫຼອດ 16 ປີຂອງຊີວິດ. ແລະແລ້ວຊີວິດທີ່ແສນໜ້າເບື່ອຂອງນາງເອກກໍຕ້ອງປ່ຽນ ເມື່ອໄປເຮັດໃຫ້ໜຸ່ມຮ໊ອດອັນດັບ 1 ຂອງໂຮງຮຽນໄດ້ຮັບບາດເຈັບຍ້ອນຄວາມເຂົ້າໃຈຜິດບາງຢ່າງ ຈຶ່ງເຮັດໃຫ້ເກີດເລື່ອງວຸ່ນໆຕາມມານໍາຫຼັງອີກຫຼາຍຢ່າງ. ເອົາເປັນວ່າບໍ່ເວົ້າຍາວເພາະໜັງເລື່ອງນີ້ມັນລະມຸນອີ່ຫຼີ ຕ້ອງໄປຫາມາເບິ່ງເດີ້.
![](https://laox.la/wp-content/uploads/2020/09/Say-I-love-You-1-727x1024.jpg)
7. Paradise Kiss
ໜັງແນວເສັ້ນທາງນັກອອກແບບ ທີ່ເລື່ອງຫຍໍ້ເວົ້າເຖິງນັກຮຽນທໍາມະດາຄົນໜຶ່ງ ທີ່ສາມາດເຮັດໃຫ້ຕົວເອງໄດ້ກາຍມາເປັນນາງແບບໄດ້. “ຢູຄາລິ ຮາຢາຊາກະ” ນັກຮຽນມັດທະຍົມມໍປາຍປີສຸດທ້າຍທີ່ອິດເມື່ອຍກັບການໃຊ້ຊີວິດໄປວັນໆ ຈົນໄດ້ພົບກັບ “ຈອສ” ໜຶ່ງໃນສະມາຊິກ “Paradise Kiss” ເຊິ່ງເຮັດໃຫ້ນາງເອກກ້າວສູ່ວົງການນາງແບບ ເພາະໄດ້ໃຫ້ນາງເອກມາເປັນໃນງານອອກແບບເສື້ອຜ້າຂອງລາວ ແລະ ໝູ່. ເຊິ່ງປະສົບການແປກໃຫມ່ນີ້ເອງ ເຮັດໃຫ້ນາງເອກໄດ້ຄົ້ນພົບມຸມມອງໃໝ່ຂອງຊີວິດ; ໜັງບໍ່ໄດ້ເວົ້າເຖິງແຕ່ຄວາມຮັກໜຸ່ມສາວ ເພາະມັນມີທັງເລື່ອງມິດຕະພາບ, ຄວາມຝັນ, ຂໍ້ຄິດຊີວິດ ແລະ ອື່ນໆທີ່ຢາກໃຫ້ທຸກຄົນລອງໄປເບິ່ງນໍາກັນ.
![](https://laox.la/wp-content/uploads/2020/09/Paradise-Kiss.jpg)
ໃຜທີ່ຍັງບໍ່ທັນເຂົ້າຮຽນ ຫຼື ວ່າມີເວລາວ່າງໆກໍສາມາດເບິ່ງໜັງຮັກໄວໜຸ່ມຍີ່ປຸ່ນແບບມາລາທອນໄດ້ເລີຍ. ແຕ່ລະເລື່ອງແມ່ນມ່ວນໆທັງນັ້ນທີ່ຄັດມາ, ບາງເລື່ອງກໍສະທ້ອນມຸມມອງມິດຕະພາບດີໆ, ບາງເລື່ອງກໍໃຫ້ຂໍ້ຄິດກ່ຽວກັບຊີວິດ; ເອົາເປັນວ່າບໍ່ເວົ້າຍາວ ຂໍຕົວໄປເບິ່ງໜັງອີກຮອບກ່ອນເດີ້!
ທີ່ມາ: https://today.line.me/th/v2/article/DZDnrW
ຮວບຮວມໂດຍ: Duck_Jipjip