ໃນວັນທີ 3 ເມສາ 2024, ເນື່ອງໃນໂອກາດກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ (ASEAN Finance Ministers’ and Central Bank Governors’ Meeting) ຄັ້ງທີ 11, ທະນາຄານແຫ່ງປະເທດໄທ (Bank of Thailand) ແລະ ທະນາຄານແຫ່ງ ສປປ ລາວ (Bank of the Lao PDR: BOL) ໄດ້ເຂົ້າຮ່ວມເປີດຕົວບໍລິການຊໍາລະເງິນຂ້າມແດນຜ່ານ QR ລະຫວ່າງໄທ ແລະ ສປປ ລາວ.
ຄວາມສໍາເລັດໃນການເຊື່ອມໂຍງລະບົບການຈ່າຍເງິນ
ການບໍລິການດັ່ງກ່າວຖືວ່າເປັນຜົນສໍາເລັດໃນການເຊື່ອມໂຍງການຊໍາລະເງິນລາຍຍ່ອຍແບບທັນທີລະຫວ່າງສອງປະເທດ. ສຸມໃສ່ສະການໜັບສະໜູນການນໍາໃຊ້ສະກຸນເງິນທ້ອງຖິ່ນ ຊຸກຍູ້ການຄ້າ, ການລົງທຶນ ແລະ ການທ່ອງທ່ຽວພາຍໃຕ້ແຜນການເຊື່ອມຕໍ່ການຊຳລະເງິນຂອງອາຊຽນ (ASEAN Payment Connectivity) ເພື່ອການເຕີບໂຕແບບຍືນຍົງ ແລະ ພັດທະນາເສດຖະກິດໃນພາກພື້ນ.
ສະໜັບສະໜູນການເຮັດທຸລະກໍາການເດີນທາງ
ການບໍລິການຊໍາລະ QR ຂ້າມຊາຍແດນມີຈຸດປະສົງເພື່ອສະໜັບສະໜູນການເຮັດທຸລະກໍາລະຫວ່າງປະເທດ ໂດຍສະເພາະແມ່ນທຸລະກຳທີ່ກ່ຽວຂ້ອງກັບຂະແໜງການທ່ອງທ່ຽວ, ເຊິ່ງໃນປີ 2023 ປະເທດໄທ ແລະ ລາວ ມີຈຳນວນນັກທ່ອງທ່ຽວລະຫວ່າງກັນສູງເຖິງ 2 ລ້ານຄົນ ແລະ ມີແນວໂນ້ມທີ່ຈະຂະຫຍາຍຕົວຢ່າງຕໍ່ເນື່ອງ.
- ໃນໄລຍະທຳອິດ: ຜູ້ໃຊ້ບໍລິການຈາກ ສປປ ລາວ ສາມາດໃຊ້ແອັບພລິເຄຊັນມືຖືຂອງທະນາຄານການຄ້າລາວທີ່ເຂົ້າຮ່ວມເພື່ອສະແກນ QR code ຂອງໄທ ເພື່ອຊໍາລະຄ່າສິນຄ້າ ແລະ ການບໍລິການຢູ່ຮ້ານຄ້າໃນປະເທດໄທທີ່ເຂົ້າຮ່ວມໂຄງການ. ເລີ່ມແຕ່ວັນທີ 3 ເມສາ 2024 ເປັນຕົ້ນໄປ.
- ໄລຍະທີສອງ: ຜູ້ໃຊ້ຈາກປະເທດໄທຈະສາມາດໃຊ້ແອັບພິເຄຊັນມືຖືຂອງທະນາຄານການຄ້າໄທທີ່ເຂົ້າຮ່ວມເພື່ອສະແກນ QR code LAO ເພື່ອຊໍາລະຄ່າສິນຄ້າ ແລະ ການບໍລິການຢູ່ຮ້ານຄ້າໃນ ສປປ ລາວ ທີ່ເຂົ້າຮ່ວມໂຄງການ. ການບໍລິການຈະເລີ່ມພາຍໃນເດືອນມິຖຸນາ 2024.
ທ່ານ ເສດທະພຸດ ສຸທິວາດທະນາລະພຸດ, ຜູ້ວ່າການ ທະນາຄານແຫ່ງປະເທດໄທ ກ່າວວ່າ “ທະນາຄານແຫ່ງປະເທດໄທ ໄດ້ໃຫ້ຄວາມສຳຄັນໃນການຍົກລະດັບການບໍລິການຊຳລະເງິນລະຫວ່າງປະເທດຢ່າງບໍ່ຢຸດຢັ້ງ, ສປປ ລາວ ແມ່ນປະເທດທີ 6 ໃນອາຊຽນທີ່ໄທເຊື່ອມໂຍງເຂົ້າກັບລະບົບຊຳລະສາກົນຢ່າງສຳເລັດຜົນ”
ການຮ່ວມມືເພື່ອການພັດທະນາເສດຖະກິດ
ທ່ານ ບຸນເຫຼືອ ສິນໄຊວໍລະວົງ ຜູ້ວ່າການທະນາຄານແຫ່ງ ສປປ ລາວ ກ່າວວ່າ “ການຮ່ວມມືດ້ານການບໍລິການທາງການເງິນລະຫວ່າງ ສປປ ລາວ ແລະ ໄທ ສະແດງໃຫ້ເຫັນວິໄສທັດຮ່ວມກັນເພື່ອຊຸກຍູ້ການເຊື່ອມໂຍງເສດຖະກິດໃນລະດັບສາກົນ”.
ໂຄງການນີ້ແມ່ນໄດ້ມາຈາກການຮ່ວມມືຂອງຫຼາຍຂະແໜງການ.
- ທະນາຄານແຫ່ງປະເທດໄທ ແລະ ທະນາຄານແຫ່ງ ສປປ ລາວ
- ບໍລິສັດ ໄອທີເອັມເອັສ ແຫ່ງຊາດ ຈຳກັດ ແລະ Lao National Payment Network (LAPNet)
- ທະນາຄານກະສິກອນ ແລະ ທະນາຄານການຄ້າຕ່າງປະເທດລາວ ມະຫາຊົນ (BCEL)
- ຜູ້ໃຫ້ບໍລິການໃນການຊຳລະເງິນອື່ນໆ
ລາຍຊື່ແອັບພລິເຄຊັນ ແລະ ຜູ້ໃຫ້ບໍລິການ QR ສໍາລັບຮ້ານຄ້າ
- ທະນາຄານການຄ້າໄທ 2 ແຫ່ງ
- ທະນາຄານການຄ້າຂອງ ສປປ ລາວ 6 ແຫ່ງ
- ຜູ້ໃຫ້ບໍລິການຊໍາລະເງິນອື່ນໆ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/