ໄຊຢາໄນ (Cyanide) ສານພິດອັນຕະລາຍທີ່ຄວນລະວັງ

06/05/2023

ໄຊຢາໄນ (Cyanide) ແມ່ນສານອັນຕະລາຍທີ່ສາມາດອອກລິດໄດ້ຢ່າງໄວວາ ເມື່ອເຂົ້າສູ່ຮ່າງກາຍບໍ່ວ່າຈະເປັນການສູດດົມ, ສຳຜັດ ຫຼື ຮັບປະທານເຂົ້າໄປ ຈະເຮັດໃຫ້ເຊລບໍ່ສາມາດໃຊ້ອັອກຊີເຈນໄດ້ (ຢຸດການຫາຍໃຈຂອງເຊລ) ຈົນອາດຈະເປັນອັນຕະລາຍເຖິງເເກ່ຊີວິດໄດ້

ໄຊຢາໄນ ເເມ່ນກຸ່ມຂອງສານເຄທີ່ມີຄວາມເປັນພິດສູງເຊິ່ງມີ cyanide ion (CN-) ເປັນອົງປະກອບ. ໄຊຢາໄນແມ່ນສານເຄມີທີ່ນິຍົມນໍາໃຊ້ໃນອຸດສາຫະກໍາການຜະລິດເຈ້ຍ, ແຜ່ນແພ ແລະ ພລາສຕິກ, ຄໍາ, ເຄື່ອງປະດັບ, ຂວັ້ນໂລຫະ ເເລະ ຍັງສາມາດປົນເປື້ອນທາງອາກາດ, ດິນ, ນໍ້າ ແລະ ອາຫານ.

ໄຊຢາໄນ ສາມາດເກີດຂຶ້ນເອງໂດຍທຳມະຊາດ ໂດຍຈະພົບເຫັນໃນພືດບາງຊະນິດເຊັ່ນ: ໜໍ່ໄມ້, ມັນຕົ້ນ, ໝາກສາລີ, ຕົ້ນໄຜ່, ຝ້າຍ, ເມັດ almonds ເເລະ ອື່ນໆ. ນອກຈາກນັ້ນ, ຂະບວນການເຜົາຜານໃນຮ່າງກາຍຂອງມະນຸດສາມາດກໍ່ໃຫ້ເກີດສານໄຊຍາໄນໄດ້ເຊັ່ນດຽວກັນ.

ຢ່າງໃດກໍຕາມ, ໄຊຢາໄນປະລິມານພຽງເລັກໜ້ອຍທີ່ພົບເຫັນຢູ່ໃນພືດ ແລະ ຂະບວນການເຜົາຜານນັ້ນບໍ່ເປັນອັນຕະລາຍຕໍ່ສິ່ງມີຊີວິດ.

ອາການຂອງຄົນທີ່ໄດ້ຮັບສານພິດໄຊຢາໄນເຂົ້າໄປ

ຜູ້ປ່ວຍມັກຈະເລີ່ມມີອາການຫຼັງຈາກໄດ້ຮັບສານພິດດັ່ງກ່າວເຂົ້າໄປໃນເວລາບໍ່ດົນ ໂດຍຈະມີອາການປວດຫົວ, ໃຈສັ່ນ, ໜ້າເເດງ, ໝົດສະຕິ, ມີອາການຊັກ ເເລະ ອາດຈະເສຍຊີວິດໃນເວລາພາຍໃນ 10 ນາທີ. ສຳລັບຄົນທີ່ມີອາການຮຸນເເຮງໜ້ອຍກວ່າ ມັນຈະກົດການເຮັດວຽກຂອງລະບົບປະສາດ ເເລະ ລະບົບການຫາຍໃຈ.

ວິທີການຮັບມືເມື່ອເຮົາສຳຜັດກັບສານໄຊຢາໄນໂດຍບໍ່ຕັ້ງໃຈ

ຫາກສູດດົມອາກາດທີ່ມີສານໄຊຢາໄນປົນເປື້ອນເຂົ້າໄປ ຄວນຈະຮີບອອກຈາກບໍລິເວນນັ້ນ ຫາກບໍ່ສາມາດອອກຈາກສະຖານທີ່ນັ້ນໄດ້ຄວນກົ້ມຕົວລົງພື້ນ. ໃນກໍລະນີຜູ້ປ່ວຍຫາຍໃຈລຳບາກ ຫຼື ຢຸດຫາຍໃຈ ໃຫ້ເຮັດ CPR ເພື່ອເປັນການປະຖົມພະຍາບານເບື້ອງຕົ້ນ ເເລະ ຮີບນຳຕົວໄປໂຮງໝໍ. ຫ້າມໃຊ້ປາກເປົ່າ ຫຼື ຜາຍປອດ ເພື່ອຫຼີກເວັ້ນການໄດ້ຮັບສານພິດເພີ່ມ.
ຫາກຮ່າງກາຍສຳຜັດກັບໄຊຢາໄນ ໃຫ້ຖອດເສື້ອຜ້າທີ່ປົນເປື້ອນອອກໂດຍການໃຊ້ມີດຕັດ ຕັດອອກເປັນຕ່ອນໆ ເເລະ ຄ່ອຍໆຖອດອອກຈາກຮ່າງກາຍ. ວິທີນີ້ຈະຊ່ວຍໃຫ້ໄຊຢາໄນບໍ່ຕ້ອງໄປສຳພັດກັບຜິວໜັງສ່ວນອື່ນ ຫຼັງຈາກນັ້ນຈຶ່ງທຳຄວາມສະອາດຮ່າງກາຍດ້ວຍນ້ຳ ເເລະ ສະບູເພື່ອລົດຜ່ອນປະລິມານສານພິດໃຫ້ຫຼາຍທີ່ສຸດ ເເລ້ວຮີບນຳຕົວໄປໂຮງໝໍທັນທີ.
ການສຳຜັດທາງດວງຕາ ຄວນຖອດເເວ່ນຕາ ຫຼື ຄອນແທັກເລນອອກ ຈາກນັ້ນໃຊ້ນ້ຳສະອາດລ້າງຕາຢ່າງຕໍ່ເນື່ອງຢ່າງໜ້ອຍເປັນເວລາ 10 ນາທີ ເເລະ ຮີບຟ້າວໄປໂຮງໝໍເພື່ອຮັບການປິ່ນປົວ.