ຂະແໜງກະສິກໍາ ແຂວງ ໄຊຍະບູລີ ໂດຍສະເພາະ ການຜະລິດພືດເພື່ອການຄ້າ ມີການຂະຫຍາຍຕົວຫຼາຍຂຶ້ນ ໂດຍການນຳໃຊ້ເສັ້ນທາງລົດໄຟ ລາວ-ຈີນ ເພື່ອຂົນສົ່ງສິນຄ້າໄປຕະຫຼາດຈີນ.
ທ່ານ ວັນເພັງ ຫົວໜ້າພະແນກອຸດສາຫະກຳ ແລະ ການຄ້າ ແຂວງ ໄຊຍະບູລີ ກ່າວຕໍ່ສື່ມວນຊົນເມື່ອບໍ່ດົນມານີ້ວ່າ: ໃນເມື່ອກ່ອນ, ບັນດາຜະລິດຕະພັນກະເສດຂອງແຂວງ ແລະ ຊາວກະສິກອນທ້ອງຖິ່ນລ້ວນແຕ່ເພິ່ງພາອາໄສຕະຫຼາດໄທເປັນສ່ວນໃຫຍ່ ແລະ ຖືກຈຳກັດການສົ່ງອອກໄປຫວຽດນາມ, ແຕ່ປັດຈຸບັນໄດ້ເປີດຕະຫຼາດໃໝ່ທີ່ໃຫຍ່ກວ່າເກົ່າ ກໍຄືຕະຫຼາດຈີນ.
ໂດຍທາງແຂວງໄດ້ຕັ້ງເປົ້າການສົ່ງອອກປີນີ້ໄວ້ປະມານ 95,3 ລ້ານໂດລາ ເຊິ່ງເພີ່ມຂຶ້ນຈາກປີ 2023 ໃນນີ້ 99% ຂອງການສົ່ງອອກແມ່ນເປັນຜະລິດຕະພັນທາງການກະເສດບໍ່ວ່າຈະເປັນ ມັນຕົ້ນ, ສາລີ, ໝາກກ້ວຍ, ໝາກໂມ ແລະ ຖົ່ວເຫຼືອງ.
ທ່ານ ວັນເພັງກ່າວອີກວ່າ: ທາງກົມກຳລັງສົມທົບກັບຂະແໜງການທີ່ກ່ຽວຂ້ອງພະຍາຍາມຈຳກັດປະລິມານຜະລິດຕະພັນກະເສດທີ່ນຳເຂົ້າ, ເພື່ອເປີດໂອກາດໃຫ້ຜູ້ຜະລິດທ້ອງຖິ່ນຫຼາຍກວ່າເກົ່າ.
ຍອດມູນຄ່າສິນຄ້າທີ່ແຂວງໄຊຍະບູລີສົ່ງອອກໃນປີກາຍມີ 89 ລ້ານໂດລາສະຫະລັດ ເທົ່າກັບ 73,59% ຂອງຕົວເລກຄາດໝາຍປີ 2023 ແລະ ຫຼຸດລົງປະມານ 21,26% ເມື່ອທຽບໃສ່ປີ 2022. ສ່ວນຍອດມູນຄ່າການນຳເຂົ້າປະມານ 53 ລ້ານໂດລາສະຫະລັດ ເທົ່າກັບ 44,58% ຂອງຕົວເລກຄາດໝາຍໃນປີ 2023 ແລະ ຫຼຸດລົງປະມານ 52,30% ເມື່ອທຽບໃສ່ປີ 2022. ໂດຍ ສິນຄ້ານຳເຂົ້າຕົ້ນຕໍແມ່ນເຄື່ອງດື່ມ, ເຄື່ອງກໍ່ສ້າງ ແລະ ເຄື່ອງໄຟຟ້າ, ເມັດພືດ, ພາຫະນະ ແລະ ອຸປະກອນກະສິກຳ.
https://www.facebook.com/photo/?fbid=862055322591369&set=a.501887858608119
ຕິດຕາມຂ່າວທັງໝົດຈາກ LaoX: https://laox.la/all-posts/
