ເມື່ອບໍ່ດົນມານີ້, ປະເທດແອງໂກລາໄດ້ອອກກົດໝາຍຫ້າມໃຊ້ສະກຸນເງິນ crypto ແລະການຂຸດຄົ້ນສິນຊັບ virtual ອື່ນໆ, ເຊິ່ງມີຜົນບັງຄັບໃຊ້ໃນວັນທີ 10 ເມສາທີ່ຜ່ານມາ.
ກົດໝາຍດັ່ງກ່າວຂອງປະເທດແອງໂກລາໄດ້ກໍານົດວ່າ ຜູ້ໃດທີ່ຝ່າຝືນໃນຂຸດຄົ້ນ crypto ຈະຖືກລົງໂທດຈຳຄຸກ 1 ຫາ 12 ປີ. ໂດຍກົດໝາຍສະບັບນີ້ມີຈຸດປະສົງເພື່ອຫຼຸດຜ່ອນການໃຊ້ໄຟຟ້າສໍາລັບການຂຸດຄົ້ນ crypto, ເນື່ອງຈາກການຂຸດ crypto ຈະເຮັດໃຫ້ໄຟຟ້າພາຍໃນປະເທດບໍ່ພຽງພໍໃນການໃຊ້ງານສຳລັບຜູ້ຄົນໃນປະເທດໄດ້.
ບັນດາສະມາຊິກສະພານິຕິບັນຍັດຂອງແອງໂກລາໄດ້ອະນຸມັດຂໍ້ສະເໜີໃນການຫ້າມ ແລະ ເຮັດໃຫ້ການຂຸດຄົ້ນ crypto ນັ້ນຜິດກົດໝາຍໃນວັນທີ 28 ກຸມພາ. ໂດຍຮ່າງກົດໝາຍດັ່ງກ່າວໄດ້ແນໃສ່ຜູ້ທີ່ລັກຂຸດຄົ້ນ crypto ຢ່າງຜິດກົດໝາຍໂດຍໃຊ້ລະບົບຄອມພິວເຕີແລະ ອຸປະກອນທີ່ກ່ຽວຂ້ອງ. ເຊິ່ງນີ້ຈະມີການລົງໂທດຢ່າງຮຸນແຮງ, ລວມທັງການຈໍາຄຸກ.
ນອກຈາກນີ້, ກົດໝາຍສະບັບດັ່ງກ່າວຍັງໄດ້ເນັ້ນຍ້ຳເຖິງຄວາມກັງວົນກ່ຽວກັບພະລັງງານທີ່ບໍ່ພຽງພໍພາຍໃນປະເທດທີ່ເກີດຈາກການຂຸດ crypto. ໂດຍມີລາຍງານວ່າການຂຸດ crypto ໃຊ້ໄຟຟ້າປະມານ 9.6 ເມກາວັດຕໍ່ມື້ ທຽບເທົ່າກັບຄວາມຕ້ອງການໃນການໃຊ້ໄຟຟ້າຂອງ 3.000 ຄົວເຮືອນ, ເຊິ່ງສົ່ງຜົນສະທ້ອນເຖິງຄວາມໝັ້ນຄົງຂອງລະບົບໄຟຟ້າພາຍໃນ.
ເຖິງແມ່ນວ່າແອງໂກລາຈະມີກໍາລັງການຜະລິດໄຟຟ້າທີ່ມີການຕິດຕັ້ງ 6,200 ເມກາວັດຕໍ່ມື້. ແຕ່ການແຈກຢາຍພະລັງງານຢ່າງມີປະສິດທິພາບຍັງຄົງເປັນສິ່ງທ້າທາຍ. ໂດຍສະເພາະຢ່າງຍິ່ງ ເມື່ອພິຈາລະນາເຖິງຄວາມຕ້ອງການໃນປັດຈຸບັນແມ່ນສູງເຖິງ 5,500 ເມກາວັດຕໍ່ມື້.
ຄວາມສົນໃຈຂອງຈີນໃນການຫັນປ່ຽນດ້ານເສດຖະກິດຂອງແອງໂກລາແມ່ນມີຄວາມເຂັ້ມແຂງໃນທົດສະວັດທີ່ຜ່ານມາ. ໂດຍໃນເດືອນທັນວາ ຈີນ ແລະ ແອງໂກລາໄດ້ເຊັນສັນຍາຄຸ້ມຄອງໃນການລົງທຶນ. ເພື່ອອຳນວຍຄວາມສະດວກໃຫ້ແກ່ການເຂົ້າເຖິງຕະຫຼາດຜູ້ບໍລິໂພກຂອງຈີນໂດຍບໍ່ເສຍພາສີໃຫ້ແກ່ສິນຄ້າຫຼາຍໆປະເພດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
