ເສັ້ນທາງລົດໄຟ ລາວ-ຈີນ ສ້າງສະຖິຕິໃໝ່ ຂົນສົ່ງສິນຄ້າທະລຸ 10 ລ້ານໂຕນ ໃນເຄິ່ງປີທຳອິດຂອງປີ 2026 ຊີ້ໃຫ້ເຫັນເຖິງການເຕີບໂຕຂອງເຄືອຂ່າຍໂລຈິສຕິກໃນພາກພື້ນ ທີ່ຊຸກຍູ້ການຄ້າຂ້າມພົມແດນໃຫ້ຂະຫຍາຍຕົວຢ່າງກ້າວກະໂດດ.
ບໍລິສັດ ທາງລົດໄຟແຫ່ງປະເທດຈີນ ສາຂາຄຸນໝິງ ຈຳກັດ ໄດ້ລາຍງານເມື່ອວັນທີ 14 ມິຖຸນາ ຜ່ານມາວ່າ ປະລິມານການຂົນສົ່ງສິນຄ້າຜ່ານເສັ້ນທາງລົດໄຟ ລາວ-ຈີນ ນັບຕັ້ງແຕ່ຕົ້ນປີ 2026 ມາຮອດວັນທີ 13 ມິຖຸນາ ມີຕົວເລກສູງກວ່າ 10 ລ້ານໂຕນແລ້ວ ເຊິ່ງເປັນການຕອກຢ້ຳເຖິງຄວາມສຳເລັດຂອງການພັດທະນາລະບົບຂົນສົ່ງທາງຮາງໃນພູມມິພາກອາຊີຕາເວັນອອກສຽງໃຕ້.
ຄວາມສຳເລັດດັ່ງກ່າວເປັນຜົນມາຈາກການທີ່ທັງສອງປະເທດໄດ້ຮ່ວມກັນຍົກລະດັບປະສິດທິພາບ ແລະ ກຳລັງການຂົນສົ່ງຢ່າງຕໍ່ເນື່ອງ ນັບຕັ້ງແຕ່ເປີດນຳໃຊ້ຢ່າງເປັນທາງການໃນວັນທີ 3 ທັນວາ 2021 ເປັນຕົ້ນມາ ໂດຍຈຳນວນການເດີນລົດໄຟຂົນສົ່ງສິນຄ້າຂ້າມພົມແດນໄດ້ມີການປັບຕົວເພີ່ມຂຶ້ນຢ່າງມະຫາສານ ຈາກເດີມທີ່ມີພຽງ 2 ທ່ຽວຕໍ່ມື້ ກາຍເປັນຈຸດສູງສຸດເຖິງ 23 ທ່ຽວຕໍ່ມື້ໃນປັດຈຸບັນ.
ບັນຍາກາດການຂົນສົ່ງສິນຄ້າຜ່ານເສັ້ນທາງສາຍນີ້ຍັງຄົງຄຶກຄື້ນມາຕັ້ງແຕ່ຕົ້ນປີ 2026 ໂດຍສະເພາະຢ່າງຍິ່ງແມ່ນການຂົນສົ່ງໝາກໄມ້ຂ້າມພົມແດນທີ່ໄດ້ຮັບຄວາມນິຍົມສູງ ແລະ ມີປະລິມານເພີ່ມຂຶ້ນຢ່າງເຫັນໄດ້ແຈ້ງ ເຊິ່ງຂໍ້ໄດ້ປຽບທາງດ້ານເວລາໃນການຂົນສົ່ງຊ່ວຍຮັກສາຄວາມສົດໃໝ່ຂອງສິນຄ້າກະສິກຳໄດ້ເປັນຢ່າງດີ.
ຂໍ້ມູນນັບຮອດວັນທີ 11 ມິຖຸນາ ລະບຸວ່າ ການຂົນສົ່ງໝາກໄມ້ມີປະລິມານສູງກວ່າ 185,000 ໂຕນ ເຊິ່ງຄິດເປັນອັດຕາການເຕີບໂຕທີ່ເພີ່ມຂຶ້ນເຖິງ 73.1% ເມື່ອທຽບໃສ່ຊ່ວງເວລາທີ່ຄືກັນຂອງປີກາຍ ສະທ້ອນໃຫ້ເຫັນເຖິງຄວາມຕ້ອງການຂອງຕະຫຼາດພາກພື້ນທີ່ຂະຫຍາຍຕົວຂຶ້ນຢ່າງໄວວາ.
ມາຮອດປັດຈຸບັນ ເຄືອຂ່າຍການຂົນສົ່ງສິນຄ້າເທິງເສັ້ນທາງລົດໄຟ ລາວ-ຈີນ ໄດ້ຂະຫຍາຍກວມເອົາ 19 ປະເທດ ແລະ ພາກພື້ນຕ່າງໆທົ່ວໂລກ ແຖມຍັງມີປະເພດສິນຄ້າທີ່ຂົນສົ່ງຂ້າມພົມແດນເພີ່ມຂຶ້ນຈາກເດີມທີ່ມີພຽງ 10 ກວ່າລາຍການ ກາຍມາເປັນຫຼາຍກວ່າ 3,800 ລາຍການແລ້ວໃນປັດຈຸບັນ ເຊິ່ງກວມເອົາຕັ້ງແຕ່ສິນຄ້າກະສິກຳ, ແຮ່ທາດ, ສິນຄ້າອຸປະໂພກບໍລິໂພກ ໄປຈົນເຖິງອຸປະກອນອິເລັກໂທຣນິກ ແລະ ເຕັກໂນໂລຊີອື່ນໆ ທີ່ຊຸກຍູ້ໃຫ້ເສັ້ນທາງນີ້ກາຍເປັນເສັ້ນທາງສາຍໄໝຍຸກໃໝ່ທີ່ສຳຄັນໃນການເຊື່ອມໂຍງເສດຖະກິດໂລກ ແລະ ຍົກລະດັບຊີວິດການເປັນຢູ່ຂອງປະຊາຊົນຕາມລຽບແຄມທາງ.
ເຖິງວ່າຕົວເລກການຂົນສົ່ງສິນຄ້າທີ່ທະລຸ 10 ລ້ານໂຕນໃນເຄິ່ງປີທຳອິດຂອງປີ 2026 ຈະເປັນການຢືນຢັນເຖິງຄວາມສຳເລັດອັນຍິ່ງໃຫຍ່ໃນການຫັນປ່ຽນ ສປປ ລາວ ຈາກປະເທດທີ່ບໍ່ມີທາງອອກສູ່ທະເລ (Land-locked) ມາເປັນປະເທດເຊື່ອມໂຍງ-ເຊື່ອມຈອດ (Land-linked) ຢ່າງສົມບູນແບບ, ແຕ່ໃນຄວາມເປັນຈິງແລ້ວ ສິ່ງທ້າທາຍສຳຄັນຂອງ ລາວ ໃນປັດຈຸບັນ ຄືການຫັນປ່ຽນຕົນເອງຈາກການເປັນພຽງ “ທາງຜ່ານ” (Transit country) ໃຫ້ກາຍເປັນ “ຜູ້ຜະລິດ ແລະ ຜູ້ສົ່ງອອກ” ທີ່ມີສັກກະຍາພາບສູງ ເພື່ອດຶງເມັດເງິນຕາຕ່າງປະເທດເຂົ້າສູ່ລະບົບເສດຖະກິດໃຫ້ໄດ້ຫຼາຍທີ່ສຸດ.
#LaoXperts #ລົດໄຟລາວຈີນ #ເສດຖະກິດລາວ #ການຄ້າຂ້າມພົມແດນ #ໂລຈິສຕິກ #LaosChinaRailway
