ເຖິງແມ່ນວ່າເງິນເດືອນຈະເປັນສິ່ງສໍາຄັນກໍຕາມ, ແຕ່ໃນຄວາມເປັນຈິງແລ້ວ ເງິນພຽງຢ່າງດຽວກໍບໍ່ໄດ້ກາລັນຕີວ່າພວກເຂົາຈະຊື່ສັດ ແລະ ຈະເຮັດວຽກໃຫ້ບໍລິສັດຕໍ່ໄປ.
ໃນຍຸກປັດຈຸບັນ, ພະນັກງານໄດ້ມີການລາອອກຈາກວຽກຫຼາຍຂຶ້ນ ເຊິ່ງມັນໄດ້ສົ່ງຜົນກະທົບຕໍ່ອົງກອນບໍ່ຫຼາຍກໍໜ້ອຍ. ອີງຈາກການສໍາຫຼວດພົບວ່າມີພຽງແຕ່ 22% ຂອງພະນັກງານທີ່ເວົ້າວ່າພວກເຂົາອອກຈາກວຽກຍ້ອນເງິນເດືອນ ຫຼື ຜົນປະໂຫຍດອື່ນໆ. ນອກຈາກນີ້ຍັງມີປັດໄຈອື່ນໆທີ່ເຮັດໃຫ້ພະນັກງານພາກັນລາອອກໂດຍບໍ່ສົນເລື່ອງເງິນເດືອນຄື:
1. ໂອກາດຄວາມກ້າວໜ້າໃນອາຊີບ (32%).
ພະນັກງານຮຸ່ນໃໝ່ຕ້ອງການເຮັດວຽກທີ່ທ້າທາຍ, ມີໂອກາດທີ່ຈະຮຽນຮູ້, ພັດທະນາຕົນເອງ ແລະ ເຕີບໃຫຍ່ໃນສາຍອາຊີບຂອງເຂົາເຈົ້າ.
ອົງການຈັດຕັ້ງທີ່ບໍ່ມີລະບົບສະໜັບສະໜູນ ແລະ ສົ່ງເສີມພະນັກງານ ມີໂອກາດສູງທີ່ພະນັກງານຈະພາກັນລາອອກ.
2. ຄວາມບໍ່ເໝາະສົມຂອງວຽກງານ (20.2%)
ເກີດຈາກການທີ່ພະນັກງານບໍ່ເຮັດວຽກທີ່ກົງກັບສາຍວຽກທີ່ຮຽນມາ, ທັກສະຄວາມສາມາດ ຫຼື ຄວາມສົນໃຈຂອງເຂົາເຈົ້າ. ສົ່ງຜົນກະທົບຕໍ່ປະສິດທິພາບໃນການເຮັດວຽກ ເກີດຄວາມເບື່ອໜ່າຍ ແລະ ພະນັກງານມີໂອກາດຫຼາຍທີ່ຈະລາອອກ ເພື່ອຊອກຫາວຽກທີ່ເໝາະສົມກັບເຂົາເຈົ້າ.
3. ສະພາບແວດລ້ອມການເຮັດວຽກ ແລະ ການບໍລິຫານຈັດການໂດຍທົ່ວໄປ (17%)
ສະພາບແວດລ້ອມການເຮັດວຽກທີ່ບໍ່ດີ, ມີຫົວໜ້າທີ່ບໍ່ເຂົ້າໃຈ ແລະ ເພື່ອນຮ່ວມງານທີ່ມັກສ້າງບັນຫາ ຈະສົ່ງຜົນກະທົບຕໍ່ສຸຂະພາບຈິດ, ຄວາມກົດດັນ… ເຮັດໃຫ້ພະນັກງານມີໂອກາດທີ່ຈະລາອອກເພື່ອຊອກຫາວຽກເຮັດງານທໍາທີ່ມີສະພາບແວດລ້ອມທີ່ດີກວ່າ.
4. ຄວາມບໍ່ຍືດຫຍຸ່ນກ່ຽວກັບເວລາ ແລະ ການຈັດຕາຕະລາງການເຮັດວຽກ (8%)
ພະນັກງານຍຸກໃໝ່ຕ້ອງການຄວາມຍືດຫຍຸ່ນໃນການເຮັດວຽກ, ຢາກເຮັດວຽກຢູ່ເຮືອນ (Work from Home) ແລະ ຢາກມີເວລາສ່ວນຕົວ.
ອົງການຈັດຕັ້ງທີ່ບໍ່ສາມາດຕອບສະໜອງຄວາມຕ້ອງການເຫຼົ່ານີ້ໄດ້ ມີໂອກາດທີ່
ພະນັກງານຈະລາອອກເພື່ອຊອກຫາເຮັດວຽກທີ່ມີຄວາມຍືດຫຍຸ່ນກວ່າ.
ຢ່າງໃດກໍຕາມ, ເມື່ອຮູ້ເຖິງສາເຫດຫຼັກໆແລ້ວ ອົງກອນກໍຄວນທີ່ຈະປັບປຸງ ແລະ ສາມາດປະຕິບັດຕາມຄຳແນະນຳລຸ່ມນີ້ໄດ້:
1. ສ້າງໂອກາດໃຫ້ພະນັກງານໄດ້ເຕີບໃຫຍ່:
- ສະໜັບສະໜູນພະນັກງານທີ່ຈະຮຽນຮູ້ທັກສະໃໝ່
- ການເຝິກອົບຮົມການພັດທະນາສັກກະຍາພາບ
- ມອບໝາຍວຽກງານທີ່ທ້າທາຍ
- ໃຫ້ໂອກາດພະນັກງານໄດ້ຮັບການເລື່ອນຕໍາແໜ່ງ.
- ເປີດໂຄງການທີ່ປຶກສາ
2. ສ້າງສະພາບແວດລ້ອມໃນການເຮັດວຽກທີ່ດີ:
- ສ້າງບັນຍາກາດທີ່ປອດໄພ ແລະ ເປັນມິດ
- ຫົວໜ້າຄວນເຂົ້າໃຈລູກນ້ອງ ແລະ ເບິ່ງແຍງເຂົາເຈົ້າຫຼາຍຂຶ້ນ.
- ສົ່ງເສີມການເຮັດວຽກເປັນທີມ
- ໃຫ້ໂອກາດແກ່ພະນັກງານໃນການສະແດງຄວາມຄິດເຫັນຂອງເຂົາເຈົ້າ.
- ຮັບຟັງບັນຫາ ແລະ ໃຫ້ຄໍາແນະນໍາ
- ຈັດຕັ້ງກິດຈະກໍາໃນທີມເພື່ອສ້າງຄວາມຜ່ອນຄາຍ
3. ສະເໜີໃຫ້ເງິນເດືອນ ແລະ ສະຫວັດດີການທີ່ແຂ່ງຂັນກັນໄດ້:
- ສຶກສາຂໍ້ມູນເງິນເດືອນ ແລະ ສະຫວັດດີການໃນຕະຫຼາດ.
- ສະເໜີໃຫ້ເງິນເດືອນເໝາະສົມກັບທັກສະ ແລະ ປະສົບການ.
- ໃຫ້ສະຫວັດດີການທີ່ຄອບຄຸມເຊັ່ນ: ການປະກັນໄພສຸຂະພາບ, ການປະກັນໄພຊີວິດ ແລະ ລານພັກຜ່ອນໄດ້
- ມີລະບົບ Reward & Recognition.
4. ສ້າງຄວາມໝັ້ນຄົງໃຫ້ແກ່ພະນັກງານ:
- ສ້າງວິໄສທັດ ແລະ ເປົ້າໝາຍທີ່ຊັດເຈນ.
- ສື່ສານແຜນການຍຸດທະສາດຂອງອົງການໃຫ້ກັບພະນັກງານ.
- ເບິ່ງແຍງພະນັກງານໃນຍາມວິກິດ
- ສ້າງສາຍພົວພັນທີ່ດີກັບພະນັກງານ
- ສື່ສານຢ່າງໂປ່ງໃສ
5. ເພີ່ມຄວາມຍືດຫຍຸ່ນໃນການເຮັດວຽກ:
- ໃຫ້ພະນັກງານເຮັດວຽກຢູ່ເຮືອນ (Work from Home)
- ປັບປ່ຽນຊົ່ວໂມງການເຮັດວຽກ
- ອະນຸຍາດໃຫ້ພະນັກງານລາພັກຮ້ອນໄດ້ຕາມຄວາມຕ້ອງການ.
- ສະໜັບສະໜູນ Work-Life Balance
ຈາກຂໍ້ມູນຂ້າງເທິງ ສະແດງໃຫ້ເຫັນວ່າ ເງິນເດືອນບໍ່ແມ່ນປັດໄຈດຽວທີ່ດຶງດູດພະນັກງານເຂົ້າມາເຮັດວຽກໃຫ້ອົງກອນ. ແຕ່ສິ່ງທີ່ສໍາຄັນແມ່ນ ອົງກອນຕ້ອງສ້າງສະພາບແວດລ້ອມໃນການເຮັດວຽກທີ່ດີ, ສະໜັບສະໜູນພະນັກງານໃຫ້ເຕີບໃຫຍ່, ສະເໜີເງິນເດືອນ ແລະ ສະຫວັດດີການທີ່ແຂ່ງຂັນ ແລະ ສ້າງຄວາມໝັ້ນຄົງໃຫ້ແກ່ພະນັກງານ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
