ໃນ ປີ 2023 ທີ່ຜ່ານມາ ສສ. ຫວຽດນາມ ປະເທດໃກ້ບ້ານເຮົາ ຖືເປັນອີກໜຶ່ງປະເທດໃນອາຊຽນ ທີ່ເນື້ອຫອມ ອີກປະເທດໜຶ່ງ ທີ່ໄດ້ຮັບຄວາມສົນໃຈຈາກນັກລົງທຶນຕ່າງຊາດ, ໂດຍໃນປີ ທີ່ຜ່ານມາ ຫວຽດນາມ ສາມາດດຶງດູດການລົງທຶນ FDI ໄດ້ເຖິງ 36,6 ຕື້ໂດລາ ເພີ່ມຂຶ້ນ 32,1% ຈາກປີ 2022 ຖືເປັນການເພີ່ມຂຶ້ນສູງສຸດໃນຮອບ 5 ປີ.
ໂດຍສາເຫດຫຼັກທີ່ເຮັດໃຫ້ ຫວຽດນາມ ກາຍເປັນແຫຼ່ງລົງທຶນ ກໍຈະແມ່ນມີຫຼາຍປັດໄຈ ທັງໃນເລື່ອງຂອງ ນະໂຍບາຍການລົງທຶນ ຈາກລັດຖະບານ, ຄວາມໄດ້ປຽບທາງດ້ານພູມສັນຖານ, ຂະໜາດເສດຖະກິດ ທີ່ມີການເຕີບໂຕຂຶ້ນເລື້ອຍໆ ແລະ ອື່ນໆອີກຫຼາຍຢ່າງ. ໂດຍມື້ນີ້ ຈະພາມາເບິ່ງ ເຫດຜົນ ແລະ 5 ແຂວງຂອງຫວຽດນາມທີ່ສາມາດດຶງດູດການລົງທຶນໄດ້ຫຼາຍທີ່ສຸດ.
ອັນດັບທີ 1 ໂຮ່ຈີມິນ ເພາະເປັນເມືອງໃຫຍ່ທີ່ສຸດຂອງຫວຽດນາມ ຄອງສັດສ່ວນ FDI ສູງສຸດໃນປີ 2023 ດ້ວຍທຶນຈົດທະບຽນໃໝ່ຈຳນວນ 5.850 ລ້ານໂດລາ. ໂດຍໂຮ່ຈີມິນ ຖືເປັນເມືອງສູນກາງທາງການເງິນຂອງຫວຽດນາມ ແລະ ເປັນສູນກາງທາງເສດຖະກິດຂອງປະເທດ ກາຍເປັນແມ່ແຮງດຶງດູດການລົງທຶນ ດ້ວຍປັດໄຈສະໜັບສະໜູນຫຼາຍດ້ານ ທັງການທີ່ມີທ່າເຮືອໃຫຍ່ທີ່ສຸດໃນປະເທດ ມີສະໜາມບິນທີ່ມີການສັນຈອນຈຳນວນຫຼາຍ ຕັ້ງຢູ່ໃຈກາງພາກພື້ນ ອາຊີຕາເວັນອອກສຽງໃຕ້ ປະຊາກອນ 9 ລ້ານຄົນ ຫຼາຍກວ່າ 60% ເປັນໄວແຮງງານ ພ້ອມມີມະຫາໄລຊັ້ນນຳ ແລະ ສູນເຝິກອົບຮົມຫຼາຍແຫ່ງ ເອີ້ນໄດ້ວ່າເປັນແຫຼ່ງທີ່ມີແຮງງານຄຸນະພາບລວມຕົວກັນຢູ່ເປັນຈຳນວນຫຼາຍ.
ອັນດັບທີ 2 ໄຮຟອງ ທີ່ເປັນແຂວງ ທ່າເຮືອທີ່ຈະຮັບການລົງທຶນໂດຍກົງຈາກຕ່າງປະເທດ, ໃນປີທີ່ຜ່ານມາ ມີຍອດ FDI ສູງເຖິງ 3.260 ລ້ານໂດລາ. ນະຄອນໄຮຟອງແມ່ນຢູ່ເຂດຊາຍຝັ່ງຕາເວັນອອກສຽງເໜືອຂອງປະເທດ. ຫ່າງຈາກນະຄອນຫຼວງຮ່າໂນ້ຍໄປທາງທິດຕາເວັນອອກປະມານ 120 ກິໂລແມັດ, ເປັນເມືອງແຄມທະເລໃຫຍ່ທີ່ສຸດຂອງພາກເໜືອຂອງຫວຽດນາມ, ມາຮອດປີ 2021, ມັນມີປະຊາກອນຫຼາຍທີ່ສຸດເປັນອັນດັບທີ 7 ຂອງປະເທດ. ເມືອງດັ່ງກ່າວໄດ້ກາຍເປັນນະຄອນອຸດສາຫະກໍາທີ່ສໍາຄັນໃນອາຊີຕາເວັນອອກສຽງໃຕ້. ທ່າເຮືອ ແມ່ນ້ຳ Cam ຂອງນະຄອນແມ່ນໜຶ່ງໃນບັນດາທ່າເຮືອໃຫຍ່ທີ່ສຸດຂອງຫວຽດນາມ. ແລະ ມີຄວາມສາມາດຮອງຮັບ ການຂົນສົ່ງສິນຄ້າອອກສູ່ທະເລເປັນຈຳນວນຫຼວງຫຼາຍ ນີ້ເຮັດໃຫ້ແຂວງດັ່ງກ່າວເປັນໜຶ່ງໃນບັນດາແຂວງທີ່ດຶງດູດບັນດາບໍລິສັດຕ່າງປະເທດຫຼາຍກວ່າໝູ່.
ອັນດັບ 3 ກວາງນິນ ເມືອງໜຶ່ງຢູ່ແຄມຝັ່ງທະເລຕາເວັນອອກສຽງເໜືອຂອງປະເທດ. ໃນຊຸມປີມໍ່ໆມານີ້. ກວາງນິງ ໄດ້ດຶງດູດການລົງທຶນເປັນຈຳນວນຫຼວງຫຼາຍ. ຍ້ອນຕັ້ງຖິ່ນຖານຢູ່ໃກ້ກັບໄຮຟອງ, ທ່າເຮືອທີ່ສຳຄັນຂອງປະເທດ, ປີ 2023 ຈະມີການລົງທຶນໃໝ່ຢູ່ກວາງນິນ ດ້ວຍມູນຄ່າ 3.110 ລ້ານໂດລາ. ດ້ວຍແຮງສະໜັບສະໜູນຈາກ ທີ່ຕັ້ງພູມສາດ ທາງຫຼວງ ແລະ ທາງເຂົ້າທ່າເຮືອ ທີ່ຢູ່ໃກ້ກັບປະເທດຈີນ ແລະ ການຊຸກຍູ້ຈາກລັດຖະບານ ໃນການດຶງດູດ FDI ຂອງແຂວງ ກວາງນິນ ເຮັດໃຫ້ໄດ້ເຮັດໃຫ້ແຂວງ ກວາງນິນ ໄດ້ຮັບການຍົກລະດັບບັນດາຕົວເມືອງທີ່ດຶງດູດ FDI ຢ່າງວ່ອງໄວ.
ອັນດັບ 4 ບັກຊາງ ເມືອງທີ່ຕິດກັບເມືອງຫຼວງຮາໂນຍ ເປັນອັນດັບທີ 4 ດ້ວຍຍອດມູນຄ່າການລົງທຶນໃໝ່ທີ່ຂຶ້ນທະບຽນເປັນມູນຄ່າ 3.020 ລ້ານໂດລາ ໃນປີ 2023. ບັກຊາງ ມີຂໍ້ໄດ້ປຽບທີ່ຕັ້ງຕິດກັບ ຮ່າໂນ້ຍ ເມືອງນີ້ຈຶ່ງໄດ້ຮັບຄວາມນິຍົມຈາກບັນດາບໍລິສັດຕ່າງຊາດທີ່ເຂົ້າມາເພື່ອຕັ້ງເປັນຖານການຜະລິດໃນຫວຽດນາມ. ປັດຈຸບັນ ບັກຊາງ ເປັນທີ່ຕັ້ງຂອງກຸ່ມອຸດສາຫະກຳ ຢ່າງໜ້ອຍ 36 ກຸ່ມ ກະຈາຍຢູ່ເທິງພື້ນທີ່ ກວ່າ 682 ເຮັກຕ້ສ ແລະ ກາຍເປັນສູນກາງຫຼັກສຳລັບບໍລິສັດຕ່າງຊາດ ທີ່ເຂົ້າໄປຕັ້ງເປັນຖານຜະລິດອຸປະກອນ ເອເລັກໂຕຣນິກ ໃນປະເທດຫວຽດນາມ.
ອັນດັບ 5 ທ້າຍບິ່ນ ຫ່າງຈາກນະຄອນຫຼວງຮ່າໂນ້ຍ ໄປທາງທິດຕາເວັນອອກສຽງໃຕ້ປະມານ 100 ກິໂລແມັດ, ເປັນອັນດັບທີ 5 ໃນການດຶງດູດການລົງທຶນ ດ້ວຍຈຳນວນທຶນໃໝ່ເກືອບ 2,800 ລ້ານໂດລາ ໃນປີ 2023. ປັດໄຈດຶງດູດການລົງທຶນເຂົ້າທ້າຍບິ່ນ ແມ່ນທີ່ຕັ້ງຢູ່ໃກ້ກັບທະເລ ຊັບພະຍາກອນທໍາມະຊາດທີ່ອຸດົມສົມບູນ, ການສະໜອງແຮງງານທີ່ພຽງພໍ ແລະໂຄງສ້າງພື້ນຖານທີ່ມີຄວາມພ້ອມສຳລັບການລົງທຶນ.
ໂດຍລວມແລ້ວ, ປີ 2023 ເປັນປີທີ່ດີພໍສົມຄວນຂອງການລົງທຶນໂດຍກົງຈາກຕ່າງປະເທດຢູ່ຫວຽດນາມ. ບົດບາດໃນການເປັນທາງເລືອກທີ່ສຳຄັນຂອງຈີນນັບມື້ນັບຈະແຈ້ງຂຶ້ນ ແລະ ສະພາບແວດລ້ອມແຫ່ງການດຳເນີນທຸລະກິດຂອງຕົນກໍມີຄວາມສະດວກ ຕໍ່ການລົງທຶນຈາກຕ່າງປະເທດ.
ຕິດຕາມຂ່າວທັງໝົດຈາກ LaoX: https://laox.la/all-posts/
