ອີງຕາມການລາຍງານຂອງ VnExpress ບໍລິສັດໄຟຟ້າຫວຽດນາມ ຫຼື Vietnam Electricity (EVN) ພວມຊອກຫາການອະນຸມັດຈາກລັດຖະບານຫວຽດນາມ ເພື່ອເລັ່ງການນໍາເຂົ້າໄຟຟ້າຈາກລາວ ເນື່ອງຈາກມີການຄາດຄະເນການຂາດແຄນໃນພາກເໜືອ.
ບໍລິສັດ EVN ເຊິ່ງເປັນບໍລິສັດໄຟຟ້າທີ່ໃຫຍ່ທີ່ສຸດຂອງຫວຽດນາມ ມີແຜນຈະນໍາເຂົ້າ 225 MW ຈາກໂຄງການເຂື່ອນໄຟຟ້າສອງແຫ່ງໃນພາກເໜືອຂອງລາວ ລວມທັງເຂື່ອນໄຟຟ້ານໍ້າໂມ.
ໂດຍລາຍງານລະບຸວ່າ ບໍລິສັດ EVN ກໍາລັງຂໍອະນຸຍາດເຊື່ອມຕໍ່ໂຮງງານໄຟຟ້າພະລັງງານລົມ ສະຫວັນ 1 ແລະ 2 ຢູ່ລາວ ກັບຕາຂ່າຍໄຟຟ້າຫວຽດນາມ.
EVN ລະບຸອີກວ່າ ຮອດປີ 2025 ຍັງບໍ່ມີໂຮງໄຟຟ້າໃຫຍ່ແຫ່ງໃໝ່ຈະເຂົ້າສູ່ຕາຂ່າຍໄຟຟ້າຢູ່ພາກເໜືອຂອງຫວຽດນາມ, ເຊິ່ງຄາດວ່າຈະປະສົບກັບການຂາດແຄນ. ເຊິ່ງຮອດປີ 2025 ຄາດວ່າ ຂາດແຄນ 3,630 MW.
EVN ໃຫ້ຮູ້ອີກວ່າ: “ການຊື້-ຂາຍຈາກລາວແມ່ນປະຢັດ ເນື່ອງຈາກພະລັງງານໄຟຟ້າມີຕົ້ນທຶນພຽງແຕ່ 6.95 ເຊັນຕໍ່ກິໂລວັດໂມງ, ຕໍ່າກວ່າລາຄາທ້ອງຖິ່ນອີກ”
ໃນເດືອນສິງຫານີ້, ທ່ານນາຍົກລັດຖະມົນຕີ Pham Minh Chinh ໄດ້ອະນຸມັດຂໍ້ສະເໜີນຳເຂົ້າພະລັງງານໄຟຟ້າ 2,698 ເມກາວັດຈາກລາວ, ໂດຍ EVN ໄດ້ລົງນາມໃນສັນຍາຊື້ປະມານ 83%.
ຫຼາຍພື້ນທີ່ໃນພາກເໜືອຂອງ ສສ. ຫວຽດນາມ ປະສົບກັບບັນຫາຂາດແຄນໄຟຟ້າໃນລະດູຮ້ອນທີ່ຜ່ານມາ ເຊິ່ງຫຼາຍພື້ນທີ່ໄດ້ມີການລົດການໃຊ້ໄຟຟ້າລົງ.
ປັດຈຸບັນລາວໄດ້ສະໜອງພະລັງງານໃຫ້ຫວຽດນາມ 500 ກວ່າເມກາວັດ, ໃນນັ້ນມີຫຼາຍໂຄງການທີ່ຈະສົ່ງອອກໄປປະເທດເພື່ອນບ້ານ. ອີງຕາມກະຊວງພະລັງງານ ແລະ ບໍ່ແຮ່ແລ້ວ, ລາວມີແຜນການສົ່ງອອກໄຟຟ້າ 3.000 MW ໄປຫວຽດນາມໃນປີ 2025 ແລະ 5.000 MW ໃນປີ 2030.
ປະເທດລາວມີທ່າແຮງສູງໃນການພັດທະນາພະລັງງານໄຟຟ້ານ້ຳຕົກ ແລະ ແຫຼ່ງພະລັງງານອື່ນໆ ເພື່ອສົ່ງອອກໄປຍັງປະເທດເພື່ອນບ້ານ. ເມື່ອບໍ່ດົນມານີ້, ສັນຍາສຳປະທານຫຼາຍສະບັບໄດ້ຮັບການລົງນາມໃນການພັດທະນາໂຄງການໄຟຟ້ານ້ຳຕົກ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/