ສິງກະໂປກຳລັງນຳໃຊ້ກົນລະຍຸດໃໝ່ “Concert Economics “ ເພື່ອດຶງດູດນັກທ່ອງທ່ຽວ ແລະ ຊຸກຍູ້ເສດຖະກິດ. ເຊິ່ງຄາດວ່າຈະມີລາຍຮັບຈາກການທ່ອງທ່ຽວສູງເຖິງ 371 ລ້ານໂດລາສະຫະລັດ ຈາກການສະແດງຄອນເສີດຂອງ Taylor Swift ປັອບສະຕາລະດັບໂລກ.
ກ່ອນໜ້ານີ້, ສິງກະໂປເຄີຍເປັນປະເທດທີ່ດຶງດູດການເດີນທາງເພື່ອການເຈລະຈາທາງທຸລະກິດມາໂດຍຕະຫຼອດ, ແຕ່ໃນປັດຈຸບັນ ການສະແດງຄອນເສີດຂອງນັກສິລະປິນທີ່ມີຊື່ສຽງລະດັບໂລກໄດ້ກາຍເປັນເຄື່ອງຈັກຊຸກຍູ້ທາງເສດຖະກິດ ໂດຍສະເພາະແມ່ນລາຍໄດ້ຈາກຂະແໜງບໍລິການທີ່ສາມາດເພີ່ມ GDP ໄດ້ຫຼາຍເຖິງ 10%.
ເມື່ອຢ້ອນກັບໄປໃນເດືອນມັງກອນທີ່ຜ່ານມາ ໄດ້ມີວົງດົນຕີຈາກປະເທດອັງກິດ Coldplay ມາຈັດຄອນເສີດ 6 ຮອບທີ່ສະໜາມກິລາແຫ່ງຊາດຂອງສິງກະໂປ, ພວກເຂົາສາມາດຈຳໜ່າຍປີເຂົ້າເບິ່ງ 2 ແສນໃບໝົດພາຍໃນ 2 – 3 ຊົ່ວໂມງ ແລະ ຍັງທໍາລາຍສະຖິຕິການຂາຍບັດທີ່ຫຼາຍທີ່ສຸດໃນເມືອງດັ່ງກ່າວໃນວັນດຽວກັນ. ອີງຂໍ້ມູນຈາກ Agoda ສະແດງໃຫ້ເຫັນວ່າ ຄວາມຕ້ອງການທີ່ພັກໃນສິງກະໂປໄດ້ເພີ່ມຂຶ້ນ 8.7 ເທົ່າ ໃນລະຫວ່າງງານຄອນເສີດ Coldplay.
ທັງນີ້, ປະເທດສິງກະໂປສາມາດຖືວ່າເປັນ ‘Asia’s Main Stop’ ສໍາລັບ Music of the Spheres World Tour ຂອງ Coldplay ເຊິ່ງໄດ້ຊ່ວຍສົ່ງເສີມອຸດສາຫະກໍາການທ່ອງທ່ຽວຂອງປະເທດຢ່າງຫຼວງຫຼາຍ.
ນັບຕັ້ງແຕ່ທ້າຍອາທິດນີ້ເປັນຕົ້ນໄປ ສິງກະໂປຈະກັບມາເຕັມໄປດ້ວຍບັນຍາກາດທີ່ຄຶກຄັກອີກຄັ້ງຈາກຄອນເສີດ “Taylor Swift ” ປັອບສະຕາຊາວອາເມຣິກາທີ່ມີຊື່ສຽງທີ່ສຸດໃນປັດຈຸບັນ. ໂດຍງານຄອນເສີດຄັ້ງນີ້ຖືເປັນການທົດສອບທີ່ສຳຄັນຂອງກົນລະຍຸດ “Concert Economics” ຂອງສິງກະໂປທີ່ມຸ່ງຫວັງຈະດຶງດູດນັກທ່ອງທ່ຽວ, ກະຕຸ້ນເສດຖະກິດ ແລະ ສ້າງຊື່ສຽງໃຫ້ປະເທດ.
ຜົນໄດ້ຮັບທີ່ຄາດໄວ້:
- ການສ້າງລາຍຮັບ: ຄາດວ່າຈະສ້າງລາຍຮັບຈາກການທ່ອງທ່ຽວ ແລະ ການບໍລິການ 350 – 500 ລ້ານໂດລາສິງກະໂປ (260.3 – 371.9 ລ້ານໂດລາສະຫະລັດ).
- ດຶງດູດນັກທ່ອງທ່ຽວ: ຄາດການວ່າປະມານ 70% ຂອງນັກຄອນເສີດຈະມາຈາກຕ່າງປະເທດ.
- ການສ້າງຊື່ສຽງ: ເປັນການສົ່ງເສີມປະເທດສິງກະໂປໃຫ້ກັບແຟນເພງທົ່ວໂລກ.
ໂດຍຫຼັງຈາກທີ່ Taylor Swift ປະກາດວັນສະແດງຄອນເສີດທີ່ສິງກະໂປກໍໄດ້ເຮັດໃຫ້ຍອດການຈອງໂຮງແຮມຂອງສິງກະໂປໃນເດືອນມີນາ 2024 ເພີ່ມຂຶ້ນ 10%, ສາຍການບິນໃຫຍ່ຂອງສິງກະໂປ Singapore Airlines ແລະ Scoot ມີຄວາມຕ້ອງການຖ້ຽວບິນໄປສິງກະໂປເພີ່ມຂຶ້ນຢ່າງວ່ອງໄວ ແລະ ບໍລິສັດ Jetstar Asia ກໍມີຄວາມຕ້ອງການຖ້ຽວບິນໄດ້ເພີ່ມຂຶ້ນ 20% ໃນເສັ້ນທາງ Bangkok, Manila ແລະ Jakarta ໄປສິງກະໂປ.
ສິງກະໂປກຳລັງກ້າວເຂົ້າສູ່ຍຸກໃໝ່ຂອງການທ່ອງທ່ຽວ, ໂດຍກົນລະຍຸດ “Concert Economics” ໄດ້ດຶງດູດເອົາສິລະປິນກົນທີ່ມີຊື່ສຽງລະດັບໂລກເຊັ່ນ: Taylor Swift, Ed Sheeran, Bruno Mars, BLACKPINK ແລະອື່ນໆໃຫ້ມາຈັດຄອນເສີດ, ເຊິ່ງຄອນເສີດເຫຼົ່ານີ້ໄດ້ກາຍເປັນຈຸດໝາຍປາຍທາງທີ່ສຳຄັນຂອງນັກທ່ອງທ່ຽວ.
ຈຸດປ່ຽນ:
- ໃນອະດີດທີ່ຜ່ານມາ: ຂະແໜງການທຸລະກິດ MICE (ກອງປະຊຸມ, ແຮງຈູງໃຈ, ການສໍາມະນາ ແລະ ງານວາງສະແດງ) ດຶງດູດການເດີນທາງເພື່ອທຸລະກິດ.
- ໃນປັດຈຸບັນ: ຄອນເສີດ ແລະ ງານອີເວັນດຶງດູດນັກທ່ອງທ່ຽວໃນເຊີງກິດຈະກໍາ.
ສຳລັບໂອກາດທີ່ໄດ້ຮັບ:
- ກະຕຸ້ນເສດຖະກິດ: ລາຍໄດ້ຈາກການຂາຍປີ້, ທີ່ພັກ, ອາຫານ, ຂອງທີ່ລະນຶກ ແລະອື່ນໆ.
- ສ້າງຊື່ສຽງ: ສົ່ງເສີມປະເທດໂດຍຜ່ານນັກສິລະປິນທີ່ມີຊື່ສຽງ.
- ພັດທະນາຂະແໜງການທ່ອງທ່ຽວ: ດຶງດູດນັກທ່ອງທ່ຽວໃໝ່ໆໃຫ້ເຂົ້າມາປະເທດຫຼາຍຂຶ້ນ
ໃນກາງເດືອນກຸມພາທີ່ຜ່ານມາ ສິງກະໂປໄດ້ຫຼຸດລະດັບການເຕີບໂຕໃນປີ 2023 ເນື່ອງຈາກຂໍ້ມູນທາງການສະແດງໃຫ້ເຫັນວ່າເສດຖະກິດເຕີບໂຕ 1,1% ເມື່ອທຽບໃສ່ການຄາດການກ່ອນໜ້ານີ້ 1,2%.
ຂໍ້ມູນຈາກກະຊວງການຄ້າ ແລະ ອຸດສາຫະກຳ ເປີດເຜີຍວ່າ ເສດຖະກິດສິງກະໂປໃນໄຕມາດທີ 4 ປີ 2023 ເຕີບໂຕ 2.2% ເມື່ອທຽບໃສ່ປີກາຍ. ເຊິ່ງນີ້ແມ່ນຕໍ່າກວ່າການຄາດການໄວ້ລ່ວງໜ້າຂອງລັດຖະບານທີ່ຈະເຕີບໂຕຂຶ້ນ 2.8%, ໂດຍສາເຫດຫຼັກໆແມ່ນມາຈາກກິດຈະກຳການຜະລິດທີ່ຫຼຸດລົງ
ສຳລັບເປົ້າໝາຍຂອງສິງກະໂປໃນປີ 2024:
- ສິງກະໂປຄາດການວ່າການເຕີບໂຕຂອງ GDP ໄວ້ທີ່ 1-3%
- ຄວາມຕ້ອງການພາຍນອກຍັງຄົງບໍ່ປ່ຽນແປງ.
- ຂະແໜງການຜະລິດ ແລະ ການຄ້າຄາດວ່າຈະເຕີບໂຕໄປເທື່ອລະກ້າວ.
- ການຟື້ນຟູການທ່ອງທ່ຽວຈະຊ່ວຍເຫຼືອຂະແໜງການທ່ອງທ່ຽວ ແລະ ການບິນ.
ປັດໄຈສະຫນັບສະໜູນ:
- ການຟື້ນຕົວຂອງຄວາມຕ້ອງການອຸປະກອນເອເລັກໂຕຣນິກ
- ການຟື້ນຕົວຂອງການເດີນທາງທາງອາກາດ
- ທ່ອງທ່ຽວ
ຂະແໜງການຜະລິດ ແລະ ການຄ້າທີ່ກ່ຽວຂ້ອງຂອງສິງກະໂປຄາດວ່າຈະເຕີບໂຕເທື່ອລະກ້າວ. ຄຽງຄູ່ກັບການຟື້ນຕົວຂອງຄວາມຕ້ອງການອຸປະກອນເອເລັກໂຕຣນິກໃນທົ່ວໂລກ. ແລະ ການຟື້ນຕົວຂອງຄວາມຕ້ອງການທາງອາກາດ ແລະ ການທ່ອງທ່ຽວຢ່າງຕໍ່ເນື່ອງຈະສະໜັບສະໜູນຂະແໜງການທ່ອງທ່ຽວ ແລະ ການບິນຂອງສິງກະໂປ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
